బ్యాంకులకు రుణాలిచ్చే బడాబాబులు ఎలాగూ ఎగ్గొట్టి దర్జాగా తిరుగుతున్నారనుకున్నారో ఏమో, కొందరు అధికారులే ఇప్పడు తమ బ్యాంకుకి కన్నం వేస్తూ పట్టుపడ్డారు. సిండికేటు బ్యాంకులలోని ఉత్తరాది శాఖలలో ఇలా ఒకటి కాదు రెండు కాదు.... వెయ్యి కోట్ల రూపాయల కుంభకోణం జరిగినట్లు సమాచారం. నకిలీ బిల్లులను ఉపయోగించి, ఓవర్‌డ్రాఫ్టుల పేరు చెప్పుకుని కోట్లాది సొమ్ముని కైంకర్యం చేసిన విషయం ఇప్పుడు సంచలనం సృష్టిస్తోంది. ఈ విషయంలో నిజానిజాలను తేల్చేందుకు, పోయిన సొమ్ములెంతో లెక్కని తేల్చేందుకు సీబీఐ రంగంలోకి దిగింది. ఫిర్యాదులు వచ్చిన శాఖలమీదా, కొందరు బ్యాంకు అధికారుల ఇళ్ల మీదా దాడులు చేసి సోదాలను నిర్వహించింది. ఈ దెబ్బతో షేర్‌మార్కెట్‌లో సిండికేట్‌ బ్యాంకు షేరు విలువ దారుణంగా పడిపోయింది. ఒకపక్క మొండిబకాయిలు పేరుకుపోతూ నిస్తేజంలోకి జారుకుంటున్న బ్యాంకింగ్‌ రంగానికి ఇది నిజంగా దుర్వార్తే!