స్మార్ట్‌ఫోన్ దిగ్గజం శామ్‌సంగ్ తన తాజా ఫ్లాగ్‌షిప్ సిరీస్ 'గెలాక్సీ S26' వినియోగదారుల కోసం ఒక సంచలన అప్‌డేట్‌ను తీసుకొచ్చింది. ఆండ్రాయిడ్ మరియు ఐఫోన్ వినియోగదారుల మధ్య దశాబ్దాలుగా ఉన్న ఫైల్ షేరింగ్ అడ్డంకులను తొలగిస్తూ, శామ్‌సంగ్ తన 'క్విక్ షేర్' ఫీచర్‌ను ఆపిల్ 'ఎయిర్‌డ్రాప్‌లతో అనుసంధానించింది. దీనివల్ల థర్డ్ పార్టీ యాప్‌ల అవసరం లేకుండానే గెలాక్సీ ఫోన్ల నుండి ఐఫోన్‌లకు ఫోటోలు, వీడియోలు మరియు డాక్యుమెంట్లను వేగంగా పంపవచ్చు.

ఈ కొత్త ఫీచర్ తొలుత దక్షిణ కొరియాలో ప్రారంభం కాగా, ప్రస్తుతం భారత్ సహా యూరప్, అమెరికా వంటి ప్రధాన మార్కెట్లలో అందుబాటులోకి వచ్చింది. గెలాక్సీ S26, S26 ప్లస్ మరియు S26 అల్ట్రా మోడల్స్ ఉపయోగిస్తున్న వారు తాజా సాఫ్ట్‌వేర్ అప్‌డేట్ ద్వారా ఈ సౌకర్యాన్ని పొందవచ్చు. గతంలో ఐఫోన్లకు ఫైల్స్ పంపాలంటే వాట్సాప్ లేదా గూగుల్ డ్రైవ్ వంటి ఇతర మార్గాలపై ఆధారపడాల్సి వచ్చేది, కానీ ఇప్పుడు ఆ సమస్యకు శామ్‌సంగ్ శాశ్వత పరిష్కారం చూపింది.

సాంకేతికంగా చూస్తే, వినియోగదారులు తమ క్విక్ షేర్ సెట్టింగ్స్‌లో 'షేర్ విత్ ఆపిల్ డివైజెస్ అనే ఆప్షన్‌ను ఎనేబుల్ చేసుకోవాల్సి ఉంటుంది. అదే సమయంలో అవతలి వైపు ఉన్న ఐఫోన్ యూజర్లు తమ ఎయిర్‌డ్రాప్ విజిబిలిటీని 'ఎవ్రీవన్'మోడ్‌లో ఉంచాలి. ఇలా చేయడం ద్వారా రెండు వేర్వేరు ఆపరేటింగ్ సిస్టమ్స్ ఉన్నప్పటికీ, లోకల్ వైఫై మరియు బ్లూటూత్ సాయంతో డేటా ట్రాన్స్‌ఫర్ అత్యంత వేగంగా జరుగుతుంది.

గూగుల్ తన పిక్సెల్ 10 సిరీస్‌లో ఇప్పటికే ఇటువంటి ఫీచర్‌ను ప్రవేశపెట్టగా, శామ్‌సంగ్ ఇప్పుడు ఆ జాబితాలో చేరిన రెండో పెద్ద ఆండ్రాయిడ్ బ్రాండ్‌గా నిలిచింది. శామ్‌సంగ్‌కు ఉన్న భారీ వినియోగదారుల సంఖ్య దృష్ట్యా, ఈ మార్పు స్మార్ట్‌ఫోన్ మార్కెట్‌లో పెద్ద ప్రభావాన్ని చూపే అవకాశం ఉంది. ముఖ్యంగా ఆఫీసు పనుల్లో లేదా స్నేహితుల మధ్య డేటా పంచుకునే సమయంలో ఈ ఫీచర్ ఎంతో ఉపయోగకరంగా ఉంటుందని టెక్ నిపుణులు భావిస్తున్నారు.

ప్రస్తుతానికి కేవలం గెలాక్సీ S26 సిరీస్‌కే పరిమితమైన ఈ ఎయిర్‌డ్రాప్ సపోర్ట్, త్వరలోనే పాత గెలాక్సీ మోడల్స్‌కు కూడా వస్తుందని తెలుస్తోంది. రాబోయే వన్ UI 8.5 (One UI 8.5) అప్‌డేట్‌తో గెలాక్సీ S25, S24 సిరీస్ ఫోన్లకు కూడా ఈ ఫీచర్ అందే అవకాశం ఉంది. వినియోగదారులు తమ ఫోన్లలో సుమారు 900MB పరిమాణం ఉన్న లేటెస్ట్ సిస్టమ్ అప్‌డేట్‌ను ఇన్‌స్టాల్ చేసుకోవడం ద్వారా ఈ సరికొత్త అనుభూతిని పొందవచ్చు.