కొంతమంది చాలా గ్లామర్‌గా వుంటారు.. చాలా ఆకర్షణ శక్తి కలిగి వుంటారు. వాళ్ళ పెద్దలు సాధించిన విజయాలు, వారి ఇమేజ్ వాళ్ళని కాపాడుతూ వుంటుంది. వాళ్ళు రోడ్డుమీదకి వస్తే చూడటానికి లక్షలమంది ఎదురుచూస్తూ వుంటారు. బట్.. అలాంటివారిలో చాలామంది నోరు తెరిస్తే చాలు.. ఏం మాట్లాడతారో వారికే తెలియదు. అలాంటి వారిలో మొన్నటి వరకూ రాహుల్ గాంధీ మాత్రమే వుండేవాడు. ఇప్పుడు ఆ జాబితాలో రాహుల్ గాంధీ సోదరి ప్రియాంక కూడా చేరిపోయింది. ఇంతకాలం అమ్మాయిగారు నోరు విప్పి మాట్లాడిన దాఖలాలు లేవు కాబట్టి ఈమె మీద అందరిలో ఏవేవో అంచనాలున్నాయికానీ, ప్రియాంక నోరువిప్పి మాట్లాడిన తర్వాత గానీ, ఈమెలో గ్లామర్ తప్ప రాజకీయాలకు పనికొచ్చే మెటీరియల్ లేదని అర్థమవుతోంది. మొన్న ఢిల్లీలో భర్త రాబర్ట్ వధేరాతో కలసి ఓటేయడానికి వచ్చిన ప్రియాంకతో మీడియా మోడీ గాలి గురించి ప్రస్తావించినప్పుడు ‘‘మోడీ గాలా? నాకు ఏ గాలీ కనిపించడం లేదు’’ అని వెటకారంగా మాట్లాడి మీడియా మొత్తం బిత్తరపోయేలా చేసింది. అలాగే ఈరోజు ఆమె ఇచ్చిన రెండు స్టేట్‌మెంట్లు ప్రియాంకలో వున్న అనుభవ రాహిత్యం, మాట తీరు సరిగా లేకపోవడం బయటపడింది. తన సోదరుడి వరస అయిన వరుణ్ గాంధీ గురించి మాట్లాడుతూ, వరుణ్ గాంధీ మంచోడేగానీ అతను ప్రస్తుతం తప్పుదారిలో నడుస్తున్నాడు. అతన్ని మంచి దారిలోకి నడిపించాల్సిన అవసరం వుందని కామెంట్ చేసింది. దీనికి వరుణ్ గాంధీ తల్లి మేనకాగాంధీ ఘాటుగా స్పందించి, ప్రియాంకని నోరు అదుపులో పెట్టుకోమని హెచ్చరించింది. ఇదిలా వుంటే, తాను తలుచుకుంటే మోడీ మీద పోటీ చేయగలనని, కాకపోతే తానే వద్దనుకున్నానని చెప్పింది. తాను పోటీ చేయాలని అనుకుంటే తననెవరూ ఆపలేరని తన మొండితనం గురించి ప్రస్తావించింది. చిన్న అమ్మగారు ప్రియాంక ఇస్తున్న వెరైటీ స్టేట్‌మెంట్లు చూసి కాంగ్రెస్ వర్గాలు కంగారు పడుతున్నాయి. ఇప్పటికే రాహుల్ బాబుకి సరిగా మాట్లాడ్డం రాదన్న పేరు వచ్చేసింది. ఇప్పుడు ప్రియాంకకి కూడా జనం ఆ సర్టిఫికెట్ ఇస్తే పరిస్థితేంటని భయపడిపోతున్నారు.