Top Stories

కేటీఆర్ వివరణ న్యాయ పరీక్షలో నిలుస్తుందా?

మాజీ మంత్రి కేటీఆర్ కు ఈ ఫార్ములా కార్ రేసు కేసు విషయంలో న్యాయపరమైన చిక్కులు తప్పవన్న భావన పరిశీలకులలో వ్యక్తం అవుతోంది. హైదరాబాద్ బ్రాండ్ ఇమేజ్ దెబ్బతినకుండా ఉండటం కోసం, పెట్టుబడుల ఆకర్షణ కోసమే ఫార్ములా ఈ కార్ రేస్ నిర్వాహకులకు సొమ్ము ఇవ్వాల్సి వచ్చిందన్న కేటీఆర్ వివరణ న్యాయ పరీక్షకు నిలబడే అవకాశాలు అంతంత మాత్రమేనని అంటున్నారు. ఈ కేసులో ఏసీబీ ఏ క్షణంలోనైనా కేటీఆర్ ను అరెస్టు చేసే అవకాశం ఉందన్న వార్తల నేపథ్యంలో కేటీఆర్ హైకోర్టులో క్వాష్ పిటిషన్ దాఖలు చేశారు. ఈ పిటిషన్ ను విచారణకు స్వీకరించిన హైకోర్టు కేటీఆర్ కు తాత్కాలిక ఊరట కల్పించింది. అది పక్కన పెడితే బీఆర్ఎస్ అధికారంలో ఉన్నప్పుడు నిర్వహించిన ఈ ఫార్ములా   రేసులో 55 కోట్ల ప్రభుత్వ నిధులను దుర్వినియోగం చేశారని ఆరోపిస్తూ ఏసీబీ  కేసు నమోదు చేసింది.  అవినీతి నిరోధక చట్టంలోని సెక్షన్లు 13(1)(ఏ),  13(2), అలాగే భారత శిక్షాస్మృతిలోని సెక్షన్  409  (విశ్వాస ద్రోహం), 120(బి) (నేరపూరిత కుట్ర) కింద ఎఫ్ఐఆర్ దాఖలు చేసింది. ఈ కేసులో కేటీఆర్ కు తెలంగాణ హైకోర్టు మధ్యంతర బెయిలు మంజూరు చేసింది. అదే సమయంలో ఈడీ కూడా కేటీఆర్ పై కేసు నమోదు చేసింది.  . ఈ కేసుకు సంబంధించి కేటీఆర్ ఇప్పటికే అనివార్యంగా ఫార్ములా ఈ కార్ రేస్ నిర్వాహకులకు 55 కోట్ల రూపాయలు బదిలీ చేయాల్సి వచ్చిందని అంగీకరించారు. హైదరాబాద్ బ్రాండ్ ను కాపాడటం, పెట్టుబడుల ఆకర్షణ, అలాగే ఎలక్ట్రికల్ వాహనాల వినియోగానికి ప్రోత్సాహం కోసం హైదరాబాద్ లో ఫార్ములా ఈ కార్ రేస్ జరగాలని తాను భావించాననీ, అయితే  స్పాన్సర్లు లేకపోవడం వల్ల హైదరాబాద్ నుండి వైదొలగాలని ఫార్ములా ఈ కార్ రేస్ నిర్వాహకులు భావించడంతో   తాను చొరవ తీసుకుని 55 కోట్లు నిర్వాహకులకు బదిలీ అయ్యేలా చేశాననీ కేటీఆర్ వివరణ ఇచ్చారు.  ఫార్ములా ఈ కార్ రేస్ వల్ల రాష్ట్రానికి ఆర్థిక ప్రయోజనం ఉంటుందని పేర్కొన్న కేటీఆర్, అదే ఈ రేసు రద్దు అయితే  హైదరాబాద్ బ్రాండ్ ఇమేజ్ దెబ్బతింటుందని పేర్కొన్నారు. అలా జరగకూడదన్న ఉద్దేశంతోనే నిర్వాహకులకు రూ.55 కోట్ల బదిలీ చేసినట్లు వివరించారు.   అయితే కేటీఆర్ వివరణ వల్ల చట్టపరమైన చిక్కుల తొలిగిపోయే అవకాశం ఇసుమంతైనా కనిపించడం లేదు.   రూ. 10 కోట్లకు పైగా ఖర్చులకు ఆర్థిక శాఖ,  రాష్ట్ర ప్రభుత్వంనుంచి పరిపాలనా అనుమతి అవసరం. కానీ అలాంటి అనుమతులేవీ తీసుకోకుండానే విదేశీ సంస్థకు రూ.55 కోట్ల బదిలీ జరిగిపోయింది. దీనికి కేబినెట్ ఆమోదం కూడా లేదు. అసలీ బదలాయింపుపై  ఆర్థిక శాఖకు కనీస సమాచారం కూడా లేదు.ఇవేమీ లేకుండానే  ఫార్ములా ఇ ఆపరేషన్స్ లిమిటెడ్ (ఎఫ్‌ఇఒ) కు బదిలీ చేశారు. ప్రభుత్వం విదేశీ బ్యాంకు ఖాతాలకు డబ్బును బదిలీ చేసినప్పుడు ఆర్‌బిఐకి తెలియజేయాలి, కనీసం అది కూడా జరిగిన దాఖలాలు లేవు.  కాబట్టి, ఈ కేసులో కెటిఆర్‌ కు చట్టపరమైన, న్యాయపరమైన చిక్కులు తప్పవని పరిశీలకులు విశ్లేషిస్తున్నారు. ఇది కచ్చితంగా విధాన లోపం,  నిధుల దుర్వినియోగం కిందకే వస్తుందని న్యాయనిపుణులు చెబుతున్నారు.  
Publish Date: Dec 21, 2024 7:06AM

ఫార్ములా ఈ కార్ రేస్... కేటీఆర్ కు మరో షాక్!

ఫార్ముల-ఈ కార్ రేసు  విషయంలో మాజీ మంత్రి, బీఆర్ఎస్ కార్యనిర్వాహక అధ్యక్షుడు కేటీఆర్‌కు వరుస షాకులు తగులుతున్నాయి. ఏసీబీ కేసు విషయంలో కోర్టు నుంచి వారం రోజుల ఉపశమనం లభించిందని ఊపిరి పీల్చుకునేలోగానే  ఇదే విషయంపై ఈడీ కేసు నమోదు చేసి షాక్ ఇచ్చింది.   ఏసీబీ నమోదు చేసిన ఎఫ్ఐఆర్ ఆధారంగా.. కేటీఆర్‌పై మనీలాండరింగ్ నిరోధక చట్టం కింద మరో కేసు నమోదు చేసినట్లు ఈడీ వెల్లడించింది.  తెలంగాణ హైకోర్టులో ఏసీబీ నమోదు చేసిన కేసుకు సంబంధించి కేటీఆర్‌కు ఊరట లభించిన గంటల వ్యవధిలోనే ఈడీ రంగంలోకి దిగి కేసు నమోదు చేసింది. ఏసీబీ ఫైల్ చేసిన ఎఫ్ఐఆర్ ఆధారంగా ఈడీ ఈసీఐఆర్‌ను నమోదు చేసింది. ఈడీ కేసు నమోదు చేయడంలో ఈ రేసు కేసు మళ్ళీ మొదటికొచ్చినట్లయింది. ఏసీబీ కేసు నమోదు చేసిన క్రమంలో అరెస్ట్ నుంచి ఊరట పొందిన కేటీఆర్.. ఇప్పుడు ఏం చేస్తారన్నది చూడాల్సి ఉంది. అంతేకాకుండా ఏసీబీ కేసులో ఊరట లభించగానే.. రేసు కేసు డొల్లఅని, అందుకే తొలి అడుగులోనే కాంగ్రెస్‌కు చుక్కెదురైందంటూ బీఆర్ఎస్ నేతలు వ్యాఖ్యానించారు.  అయితే ఏసీబీ ఎఫ్ఐఆర్ ఆధారంగా ఈడీ అధికారులు ఈసీఐఆర్ (ఎన్ ఫోర్స్ మెంట్ కేస్ ఇన్ఫర్మేషన్ రిపోర్ట్) నమోదు చేసి మనీలాండరింగ్ నిరోధక చట్టం కింద అభియోగాలు మోపడంతో బీఆర్ఎస్ నేతలకు గొంతులో పచ్చి వెలక్కాయపడినట్లైంది. ఈ కేసులో కేటీఆర్ తో పాటు ఐఏఎస్ అధికారి అర్వింద్ కుమార్, అప్పటి హెచ్ఎండీఏ చీఫ్ ఇంజీనీర్ బీఎల్ఎన్ రెడ్డిలను నిందితులుగా ఈడీ పేర్కొంది.  ఫార్ములా ఈ-కార్ రేసింగ్ ఈవెంట్లో నిధుల దుర్వినియోగం జరిగిందంటూ ఏసీబీ కేసు నమోదు చేయడం తెలిసిందే. ఈ కేసుకు సంబంధించి ఎఫ్ఐఆర్, ఇతర డాక్యుమెంట్ల కాపీలు ఇవ్వాలని ఈడీ   ఏసీబీని కోరింది. నిబంధనలకు విరుద్ధంగా... విదేశీ సంస్థకు విదేశీ కరెన్సీ రూపంలో నిధులు చెల్లించాలని కేటీఆర్ మౌఖిక ఆదేశాలు ఇచ్చినట్టు ఆరోపణలు వచ్చాయి. కాగా, ఏసీబీ నమోదు చేసిన కేసుపై కేటీఆర్ తెలంగాణ హైకోర్టులో క్వాష్ పిటిషన్ వేయడం తెలిసిందే. ఈ పిటిషన్ పై విచారణ చేపట్టిన ఉన్నత న్యాయస్థానం ఈ నెల 30 వరకు కేటీఆర్ పై ఎలాంటి తొందరపాటు చర్యలు తీసుకోవద్దని ఏసీబీని ఆదేశించింది. ఈ క్రమంలో, కేటీఆర్ ఈడీ కేసుపైనా తెలంగాణ హైకోర్టును ఆశ్రయించే అవకాశాలు మెండుగా ఉన్నాయని పరిశీలకులు అంటున్నారు.
Publish Date: Dec 21, 2024 6:18AM

అల్లు అర్జున్ పై జాతీయ మానవహక్కుల కమిషన్ కు ఫిర్యాదు

సంధ్యా థియేటర్ వద్ద తొక్కిసలాట ఘటనకు సంబంధించి నటుడు అల్లు అర్జున్ పై జాతీయ మానవహక్కుల సంఘానికి ఫిర్యాదు అందింది. ఇప్పటికే ఈ ఘటనకు సంబంధించి పోలీసులు కేసు నమోదు చేశారు. పుష్ప-2 ప్రీమియర్స్‌కు నటీనటులను ఎవరినీ రావొద్దని చెప్పాలని తాము సంధ్యా థియేటర్ యాజమాన్యానికి ముందుగానే సమాచారం ఇచ్చామని పోలీసులు తెలిపారు. ఘటన జరిగినప్పటి నుంచి స్పందించని సంధ్య థియేటర్ యాజమాన్యం.. అల్లు అర్జున్ అరెస్ట్ అయిన నేపథ్యంలో.. బందోబస్తు చేయాలంటూ పోలీసులను కోరుతూ రాసిన లేఖను విడుదల చేసింది. దీనిపై పోలీసులు కూడా  ప్రీమియర్స్‌కు హీరో, హీరోయిన్ రావడంతో ఇక్కడ తీవ్ర స్థాయిలో జనాలు గుమిగూడే అవకాశాలు ఉన్నాయని థియేటర్ యాజమాన్యానికి సూచించామని చెప్పిన పోలీసులు. ఈ క్రమంలో ప్రీమియర్స్‌కు నటీనటులు, మూవీ టీమ్ ఎవరినీ అనుమతించవద్దంటూ థియేటర్ యాజమాన్యానికి   చిక్కడిపల్లి పోలీసులు రాతపూర్వకంగా సమాచారం ఇచ్చారు. ఆ లేఖను పోలీసులు విడుదల చేశారు.   పోలీసులు సూచనలను ఖాతరు చేయకుండా హీరో అల్లు అర్జున్ ఆరోజు థియేటర్‌కు చేరుకున్నారు. పోలీసులు ఊహించిన విధంగానే భారీ సంఖ్యలో అభిమానులు ఎగబడటం, వారిని కంట్రోల్ చేయడం కోసం అల్లు అర్జున్ పర్సనల్ సెక్యూరిటీ అభిమానులను తోసేయడంతో తోపులాట చోటు చేసుకుందని పోలీసు వర్గాలు చెప్పాయి. అంతే కాకుండా పోలీసుల సూచనలను తుంగలోకి తొక్కి ధియేటర్ కు వచ్చిన అల్లు అర్జున్.. సైలెంట్‌గా థియేటర్‌లోకి వెళ్లకుండా నిబంధనలను ఉల్లంఘించి అనుమతి లేకుండా ర్యాలీ నిర్వహించారని పోలీసులు చెబుతున్నారు. ఈ క్రమంలోనే తొక్కిసలాటలో రేవతి అనే యువతి మరణించిందనీ, ఆమె కుమారుడు శ్రీతేజ పరిస్థితి విషమంగా ఉందనీ పేర్కొన్నారు. ఈ నేపథ్యంలోనే.. ఈ నెల 13న  అల్లు అర్జున్‌ను ఉ పోలీసులు అరెస్ట్ చేశారు. ఆ తర్వాత గాంధీ ఆసుపత్రిలో వైద్య పరీక్షలు చేయించి.. నాంపల్లి కోర్టులో హాజరుపరిచారు. కోర్టు ఆయనకు14 రోజుల రిమాండ్ విధించింది.  దీంతో పోలీసులు ఆయనను చంచల్ గూడ జైలుకు తరలించారు. అయితే హైకోర్టు.. అల్లు అర్జున్‌కు వ్యక్తిగత పూచీకత్తుతో మధ్యంతర బెయిల్ మంజూరు చేయడంతో మరుసటి రోజు ఉదయం అంటే డిసెంబర్ 14న ఆయన జైలు నుంచి విడుదలయ్యారు. ఈ నేపథ్యంలోనే  ఓ వ్యక్తి  ప్రచారం మోజులో పడి ఓ యువతి మృతికి కారకులయ్యారంటూ అల్లు అర్జున్ పై జాతీయ మానవహక్కుల కమిషన్ కు ఫిర్యాదు చేశారు.  ప్రేక్షకులను నియంత్రించడం కష్టమని పోలీసులు ముందుగానే  చెప్పినా అల్లు అర్జున్ పట్టించుకోలేదని ఆ ఫిర్యాదులో పేర్కొన్నారు.  దీనిపై జాతీయ మానవహక్కుల కమిషన్ స్పందన ఏమిటననది తెలియాల్సి ఉంది. 
Publish Date: Dec 21, 2024 5:54AM

ఒక్కడిగా వచ్చాడు ఒక్కడిగా మిగిలిపోయాడు... నేడు వైఎస్ జగన్ బర్త్ డే

అధికారమే పరమావధిగా రాజకీయాల్లో ఎంట్రీ ఇచ్చిన వైకాపా అధినేత వైఎస్ జగన్ మోహన్ రెడ్డి జన్మ దినోత్సం డిసెంబర్ 21. ఆయనపై పలు కేసులు, అవినీతిపరుడంటూ ఆరోపణలు రావడంతో  గత ఎన్నికల్లో ప్రజలు ఇంటికి పంపించి వేశారు. ఒక్కడిగా రాజకీయాలు ప్రారంభించిన జగన్ ఒక్కడిగానే మిగిలిపోయారు. .   గెలిచిన ఎమ్మెల్యేలను  పార్టీ ఫిరాయింపులకు ప్రోత్సహించిన ధీశాలి వైఎస్ జగన్.   ప్రజా సంకల్ప యాత్రతో  అకారణంగా జనంతో మమేకమైన నేతగా పేరు మూటగట్టుకున్నారు.  యువభేరీ పేరుతో ప్రత్యేకహోదా నినాదాన్ని  మోసిన జగన్ తనకు  ముఖ్యమంత్రి హోదా రాగానే ప్రత్యేక హోదా నినాదాన్ని సజీవంగా  సమాధి చేశారు.  తనని తాను అవకాశ వాద నేతగా ఐడెంటిటీ ఇచ్చుకున్నారు. .  వైసీపీ అధినేత వైఎస్ జగన్మోహన్ రెడ్డి ఒక్క చాన్స్ ఇవ్వండి  అని 2019 ఎన్నికల్లో ప్రచారం చేసుకున్నారు. ఈ ఒక్క చాన్స్ చివరి చాన్స్ అవుతుందని ఆనాడు జగన్ మోహన్ ఊహించి ఉండరు.   నవ్యాంధ్రలో రెండోసారి జరిగిన ఎన్నికల్లో(2019) గెలిచి వైకాపా కు విక్టరీని అందుకున్నప్పటికీ మూడో సారి జారవిడుచుకున్నారు. తన అధర్మ, అరాచకపాలను ఎపి ప్రజలు తగిన బుద్ది చెప్పారు.  ప్రస్తుతం ఏపీలో ప్రతిపక్ష నేతగా కూడా ప్రజలు గుర్తించలేకపోతున్నారు. వైనాట్ 175 అనే జగన్ 11 సీట్లకే పరిమితమయ్యారు. రెండు సీట్లు పెరిగి డబుల్ డిజిట్ హోదా దక్కినందుకు జగన్ లోలోపల ముసిముసి నవ్వులు నవ్వుకుంటున్నారు.  వైఎస్ జగన్ డిసెంబర్ 21 (శనివారం)తో 52 వ వసంతంలోకి అడుగుపెడుతున్నారు. పులివెందులలో రాజకీయ ఎంట్రీ ఇచ్చిన  వైఎస్ జగన్మోహన్​రెడ్డి.. 2004లో రాజకీయ అరంగేట్రం చేశారు. . తండ్రి చనిపోయిన సమయంలో పరామర్శించడానికి వచ్చిన నేతలకు ముఖ్యమంత్రి సీటు కట్టబెట్టాలని రికమెండ్ చేసుకున్న వారసుడు  వైఎస్ జగన్. అప్పట్లో  కాంగ్రెస్ తరఫున ప్రచారం చేశారు. 2009 ఎన్నికల్లో కాంగ్రెస్ పార్టీ కండువా కప్పుకుని  కడప పార్లమెంటు  అభ్యర్థిగా గెలుపొందారు. కానీ వైఎస్ జగన్ టార్గెట్ ఎంపీ కాదు . ముఖ్యమంత్రి సీటు. వైఎస్ రాజశేఖర్ రెడ్డి వారసుడిగా కాంగ్రెస్ పార్టీలో ఇమేజ్ సృష్టించారు. . ఈ ఇమేజి తన రాజకీయ భవిష్యత్తుకు వాడుకున్న ఊసరవెల్లి వైఎస్ జగన్ . 2009లో వైఎస్ రాజశేఖర్ రెడ్డి రెండోసారి అధికారం చేపట్టగానే  హెలికాప్టర్ ప్రమాదంలో మరణించారు. ఈ డెత్ మిస్టరీ ఇంకావీడలేదు. సిఎం కుర్చీ కోసం తండ్రిని చంపించినట్లు ఆరోపణలు ఎదుర్కొన్నారు.  వైఎస్ రాజశేఖరరెడ్డికి ముఖ్యమంత్రి పదవి దక్కడంలో ముఖ్యభూమిక వహించిన సోనియాగాంధీని ఎదిరించి మాతృసంస్థ కాంగ్రెస్​ పార్టీ నుంచి జగన్ బయటికొచ్చారు. కాంగ్రెస్ పార్టీలో పుట్టి పెరిగిన వైఎస్ జగన్ అధికార దాహంతోనే కాంగ్రెస్ పార్టీని వీడారు. తండ్రి మరణవార్తతో వైఎస్ అభిమానులు గుండెపగిలి చనిపోయారు. తన క్రిమినల్ బ్రెయిన్ ఉపయోగించి  ఆ కుటుంబాలను పరామర్శించాలని స్కెచ్ వేశారు జగన్ . .ఓదార్పు యాత్ర ప్రారంభించారు.తండ్రిని అడ్డం పెట్టుకుని అక్రమాస్తులు సంపాదించిన ఆరోపణ మీద 16 నెలలు జైలు జీవితాన్ని గడిపారు. ఈ సమయంలో తల్లి, చెల్లి జగన్ కు బాసటగా ఉన్నారు. 2019లో ముఖ్యమంత్రికాగానే వారిని పక్కనపెట్టేసారు. కాంగ్రెస్ పార్టీ నుంచి గెలిచిన ఎమ్మెల్యేలకు ఫిరాయింపులు ప్రోత్సహించారు. 18 మంది  కాంగ్రెస్ ఎమ్మెల్యేలు రాజీనామా చేసి వైకాపాలో చేరారు.  ప్రత్యేక తెలంగాణ ఉద్యమ సయయంలో వైకాపా  సంక్షోభంలో చిక్కుకుంది. సమైక్యాంధ్ర నినాదాన్ని భుజానికెత్తుకోవడంతో తెలంగాణ ప్రజలకు దూరమయ్యారు. అసెంబ్లీ ఎన్నికల్లో పోటీ చేసిన  వైకాపా రెండు రాష్ట్రాల్లో పరాజయం చెందింది.  ఎపిలో ఒక శాతానికి పడిపోయింది.  గత అసెంబ్లీ ఎన్నికల్లో ప్రశాంత్ కిషోర్ వ్యూహాలతో  వైకాపా పూర్తిగా చిత్తయ్యింది మాజీ ముఖ్యమంత్రి అనే పేరు తప్ప జగన్ సాధించింది ఏమీ లేదు.అక్రమాస్తులు, అరాచకపాలన తప్ప. 
Publish Date: Dec 20, 2024 6:15PM

కెటీఆర్ అరెస్ట్ తెలంగాణ రాష్ట్రంలో అల్లకల్లోలానికి కారణమవుతుందా..?

మాజీ మంత్రి కెటీఆర్ అరెస్ట్ తెలంగాణ రాష్ట్రంలో అల్లకల్లోలానికి కారణమవుతుందా..? అసలు కేటీఆర్ అరెస్ట్ ఎందుకు జరగాలి ఈ విషయంలో తెలంగాణ రాష్ట్ర ప్రభుత్వం పక్కా ఆధారాలతో సిద్ధంగా ఉందా..!? కేటీఆర్ అరెస్ట్ అనంతరం ఎదురు కాబోయే పరిస్థితులను తట్టుకుని నిలబడేందుకు తెలంగాణ ప్రభుత్వం అన్ని ఏర్పాట్లు చేసుకుంటుందా...   అసలు కేటీఆర్ అరెస్ట్ ఎందుకు జరగాలి..ఆయన ఏం తప్పు చేశారు..ఈ విషయంలో రేవంత్ రెడ్డి ప్రభుత్వం ఏ విధంగా ముందుకు వెళ్లబోతోంది..  ఆ వివరాలు తెలుసుకుందాం.. ఫార్ములా 1 కార్ రేస్ ఉదంతంలో గత బిఆర్ఎస్ ప్రభుత్వం హయాంలో అక్రమాలు జరిగాయని.. అప్పటికి మంత్రిగా ఉన్న కేటీఆర్ ఈ వ్యవహారంలో నిధుల గోల్మాల్ కు పాల్పడ్డారని ప్రధానంగా ఆరోపిస్తూ ఆయన అరెస్టుకు రంగం సిద్ధం చేసినట్టు సమాచారం..కేటీఆర్ ను ప్రాసిక్యూట్ చేయడానికి తెలంగాణ గవర్నర్ ఇప్పటికే అనుమతి ఇచ్చినట్టు కూడా వార్తలు ఉన్నాయి.  ప్రతి ఉదంతంలో జరిగినట్టే  ఈ వ్యవహారంలో కూడా ప్రధాన నిందితుడుగా పేర్కొనే కేటీఆర్ తాను ఏ తప్పు చేయలేదని..ప్రభుత్వం చేస్తున్న అక్రమాలను గురించి ప్రశ్నిస్తున్నందుకే తమపై ఇలా కక్ష సాధింపులకు పాల్పడుతున్నారని  ఆరోపిస్తున్నారు.  ఈ విషయంలో న్యాయపోరాటానికి తాము సిద్దంగా ఉన్నామని ఆయన ఇప్పటికే ప్రకటించారు. తన వంతుగా ఆయన ఈసరికే న్యాయస్థానాన్ని ఆశ్రయించి తన అరెస్టును అడ్డుకోవడానికి ప్రయత్నాలు ప్రారంభించారు నిజానికి ఫార్ములా 1 రేసు ఉదంతంలో తాను మంత్రిగా విధాన నిర్ణయం తీసుకున్నానని.. ఈ విషయంలో ఎటువంటి అవినీతి జరగలేదని ఆయన నిర్డవంధ్వంగా చెబుతున్నారు. ఇప్పటి వరకు తనను అరెస్ట్ చేయడానికి ఎన్నో విధాలుగా ప్రయత్నించిన రేవంత్ ప్రభుత్వం అది సాధ్యపడకపోవడంతో ఇప్పుడు మరో కొత్త తప్పుడు ఆరోపణతో తన అరెస్టుకు రంగం సిద్ధం చేసుకుంటోందని ఆయన దుయ్యబడుతున్నారు. ఏదోలా తనను జైలుకు పంపాలని రేవంత్ రెడ్డి లక్ష్యంగా పెట్టుకున్నారని కేటీఆర్ ఆరోపిస్తున్నారు  ఇదిలా ఉండగా కేటీఆర్ ను అరెస్టు చేయడం అంటూ జరిగితే అల్లర్లు సృష్టించి రేవంత్ రెడ్డి ప్రభుత్వాన్ని ఇరుకున పెట్టేందుకు కేటీఆర్ అభిమానులు..బిఆర్ఎస్ కార్యకర్తలు రంగం సిద్ధం చేసుకుంటున్నారు.ప్రభుత్వం కూడా అరెస్టు విషయంలో వెనకంజ వేయకుండా ముందుకు వెళ్లాలని.. ఒకవేళ అరెస్టు అనంతరం ఎటువంటి పరిణామాలు ఏర్పడినా ఎదుర్కొనేందుకు సిద్ధపడే ఉన్నట్టుగా అధికార వర్గాలు వెల్లడిస్తున్నాయి. కాగా తెలంగాణ ఏసీబీకి ఈడి అధికారులు ఇప్పటికే ఒక లేఖ రాసినట్టు సమాచారం ఉంది. కేటీఆర్ పై నమోదైన కేసు వివరాలను ఎఫ్ఐఆర్ కాపీలతో సహా తమకు అందజేయాలని.. ఈ విషయంలో డబ్బు ఎంత మేరకు చేతులు మారిందో  ఆ వివరాలు కూడా తమకు చెప్పాలని ఈడి ఏసీబీని కోరింది..కేటీఆర్ అరెస్ట్ విషయంలో ఇప్పటికే ఫార్మాలిటీస్ అన్నీ పూర్తయ్యాయని.. ఏ క్షణానైనా అరెస్టు జరగొచ్చని తెలుస్తోంది.  కేటీఆర్ అరెస్టు విషయంలో ఎటువంటి పొరపాట్లు జరగకుండా అన్ని జాగ్రత్తలు తీసుకొని అప్పుడే అడుగు ముందుకు వేయాలని రేవంత్ రెడ్డి సర్కార్ భావిస్తున్నట్టు సమాచారం.మొన్నటికి మొన్న సినిమా హీరో అల్లు అర్జున్ అరెస్టు విషయంలో తెలంగాణ ప్రభుత్వం కొంత అభాసు పాలయింది..అల్లుఅర్జున్ అరెస్టు నిజంగా అవసరమా కాదా..సంధ్య థియేటర్ ఉదంతంలో అల్లు అర్జున్ కు ఎంతవరకు బాధ్యత ఉంది.. ఈ విషయంలో అల్లు అర్జున్ పై కేసు నమోదు చేసినా అది ఏ మేరకు నిలబడుతుంది.. ఇత్యాది అంశాలను కూలంకషంగా పరిశీలించకుండా...  చట్టపరమైన కొన్ని అంశాలను నిశితంగా పరిగణనలోకి తీసుకోకుండా అదేదో  కాకతాళీయ వ్యవహారం అన్నట్టు బన్నీ అరెస్టు విషయంలో దుందుడుగ్గా వ్యవహరించిన రేవంత్ రెడ్డి ప్రభుత్వం తీరా ఒక రోజులోనే పుష్పరాజ్ కు బెయిల్ రావడంతో ఒక రకంగా చెప్పాలంటే నవ్వులు పాలైంది. ఈ చేదు అనుభవాన్ని దృష్టిలో పెట్టుకొని కేటీఆర్ అరెస్టు విషయంలో పకడ్బందీగా వ్యవహరించాలని రేవంత్ రెడ్డి ప్రభుత్వం పక్కా ప్రణాళికతో ముందుకు వెళ్తున్నట్టు సమాచారం.. ఇప్పటికే ప్రాథమిక వ్యవహారాలన్నీ పూర్తయ్యాయి గనుక పక్కా ఆధారాలతో కేటీఆర్ అరెస్టు విషయంలో ముందడుగు వేయాలని రేవంత్ ప్రభుత్వం నిశ్చయించింది.  ఇదిలా ఉండగా కేటీఆర్ అరెస్ట్ అనగానే బిఆర్ఎస్ పార్టీలో కొందరు పనిగట్టుకొని ఒక రకమైన ప్రకారాన్ని ఇప్పటికే జనాల్లోకి వదులుతున్నారు. రాజకీయ ప్రముఖులు ఎవరు అరెస్టు అయినా వారు వచ్చే ఎన్నికల నాటికి ముఖ్యమంత్రి అవుతున్నారని..ఈ లెక్కన ఖచ్చితంగా రానున్న ఎన్నికల్లో కేటీఆర్ ముఖ్యమంత్రి కావడం తద్యమనే టాక్ తెలంగాణలో ఇప్పుడు బలంగా నడుస్తోంది. వైసీపీ అధినేత జగన్ అరెస్టు అయి జైల్లో ఉండి విడుదలైన తర్వాత ముఖ్యమంత్రి అయ్యారని..తాజాగా తెలుగుదేశం పార్టీ అధినేత నారా చంద్రబాబునాయుడు కూడా జగన్ ప్రభుత్వంలో అరెస్టై విడుదలైన కొన్నాళ్లకే ముఖ్యమంత్రి పీఠాన్ని అధిష్టించారు కనుక ఇప్పుడు అదే సెంటిమెంట్ వచ్చే ఎన్నికల నాటికి పనిచేసి కేటీఆర్ తెలంగాణ ముఖ్యమంత్రి కావడం గ్యారంటీ అని ఆయన అభిమానులు అంటున్నారు. ఇదంతా ఇల్లు కాలి ఒకడేడుస్తుంటే అన్న సామెత చందాన లేదూ.. అన్నట్టు మరో విషయం.. ఇంతకు ముందు కవితని అరెస్టు చేసినప్పుడు తెలంగాణ ప్రజలు ఎటువంటి యాగీ చెయ్యలేదు. చాలా కూల్ గా తీసుకున్నారు. కవితలు బెయిల్ వచ్చిందా లేదా అనే విషయం పట్ల కనీస ఆసక్తి కూడా కనబరచలేదు..తమకు సంబంధం లేని వ్యవహారం అన్నట్టు ఉండి పోయారు. మరి ఇప్పుడు కేటీఆర్ అరెస్టు అయితే మాత్రం తెలంగాణ ప్రజలు వేరుగా రియాక్ట్ అవుతారని..అల్లర్లు.. నిరసనలు..ఆందోళనలకు తెగబడతారని ఎలా అనుకోవడం. మరి అల్లర్ల విషయంలో వినిపిస్తున్న హెచ్చరికలు ముందస్తు ప్రణాళికతో బీఆర్ ఎస్ పార్టీ చేస్తున్నవేనా.. ప్రజలు అప్పుడొకలా ఇప్పుడొకలా రియాక్ట్ అవడం అంటూ జరిగితే మాత్రం రేవంత్ సర్కార్ పాలనపై కొంత విముఖత మొదలైందని భావించవచ్చా..అదే జరిగితే ఇదంతా దేనికి సంకేతం అనుకోవచ్చు..చూద్దాం..
Publish Date: Dec 20, 2024 5:13PM

హర్యానా మాజీ ముఖ్యమంత్రి ఓం ప్రకాశ్ చౌతాలా కన్నుమూత

ఇండియన్ నేషనల్ లోక్ దళ్ అధినేత  హర్యానా మాజీ ముఖ్యమంత్రి ఓం ప్రకాశ్ చౌతాలా కన్నుమూశారు. హర్యానా రాష్రానికి ఐదు సార్లు సీఎంగా సేవలందించిన నాయకుడు ఓం ప్రకాశ్ చౌతాలా శుక్రవారం (డిసెంబర్ 20) మధ్యాహ్నం కార్డియాక్ అరెస్ట్ తో తుదిశ్వాస విడిచారు.  గురుగ్రావ్ లోని తన నివాసంలో కార్డియాక్ అరెస్ట్ తో చౌతాలా చనిపోయారని ఐఎన్ఎల్ డీ వర్గాలు తెలిపాయి. చౌతాలా వయసు 89 ఏళ్లు.  హర్యానా రాజకీయాల్లో చౌతాలా తనదైన ప్రత్యేక ముద్ర వేశారు.   1989 నుంచి 2005 వరకు హర్యానాకు ఐదుసార్లు సీఎంగా చౌతాలా సేవలందించారు. వృద్ధాప్యం కారణంగా చౌతాలా కొంతకాలంగా రాజకీయాల్లో ఇన్ యాక్టివ్ అయ్యారు.
Publish Date: Dec 20, 2024 2:44PM

News Videos

    See More News Videos

    Movie News

    Get all the updates about andhra pradesh news, political news, articles, sr journalists books, regional news, telugu cinema news etc. Find information about Telugu film news, regional news, current affairs, gallery, wallpapers, etc. See Telugu news, news videos along with latest news only at TeluguOne.com.
    TeluguOne Services
    TeluguOne For Your Business
    About TeluguOne
    Keywords: Telugu News

    Copyright © 2024 TeluguOne NEWS - All Rights Reserved

    Disclaimer:
    All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
    You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.