Top Stories

అధికారంలో ఉన్నామా.. ప్ర‌తిప‌క్షంలో ఉన్నామా?

రాష్ట్రంలో ఎమ్మెల్సీ, స్థానిక సంస్థ‌లు ఇలా ఏ ఎన్నిక‌లు వ‌చ్చినా అధికార పార్టీ ఎమ్మెల్యేలు, నేత‌ల‌ హ‌వా వేరే లెవ‌ల్ లో ఉంటుంది. ఓటర్లను నమోదు చేయించడం దగ్గర నుంచీ  అన్నివిధాలా ప్ర‌తిప‌క్ష పార్టీ కంటే ప‌ది అడుగులు అధికార పార్టీ ఎమ్మెల్యేలు, నేత‌లు ముందుంటారు. కానీ ప్రస్తుతం ఏపీలో  ప‌రిస్థితి ఇందుకు విరుద్ధంగా ఉంది. ఏపీలో ఉమ్మడి కృష్ణా- గుంటూరు, ఉమ్మ‌డి తూర్పు- పశ్చిమగోదావరి జిల్లాల గ్రాడ్యుయేట్ ఎమ్మెల్సీ ఎన్నికల జ‌ర‌గ‌నున్నాయి. ఇప్ప‌టికే తెలుగుదేశం కూట‌మి అభ్యర్థులను ప్ ప్రకటించింది.  వైఎస్ఆర్‌ కాంగ్రెస్‌ పార్టీ కృష్ణా, గుంటూరు అభ్యర్థిని ప్రకటించింది, తెలుగేశం కూట‌మి నుంచి ఉమ్మడి కృష్ణా- గుంటూరు పట్టభద్రుల ఎమ్మెల్సీ స్థానానికి మాజీ మంత్రి ఆలపాటి రాజేంద్రప్రసాద్, అలాగే ఉభయగోదావరి జిల్లాల పట్టభద్రుల ఎమ్మెల్సీ స్థానానికి పేరాబత్తుల రాజశేఖర్ పేరును సీఎం చంద్ర‌బాబు నాయుడు ప్రకటించారు. అయితే, అక్టోబరు 1 నుంచి నవంబరు 6 వరకు ఓటు కోసం దరఖాస్తు చేసుకోవచ్చు. ఈ ఎన్నిక‌ల్లో ఓటర్ల నమోదు అత్యంత కీలకం.  కానీ, ఈ రెండు ప‌ట్ట‌భ‌ద్రుల నియోజ‌క‌వ‌ర్గాల్లో ప‌ట్ట‌భ‌ద్రుల‌ను ఓట‌ర్లుగా చేర్ప‌డంలో కూట‌మి ఎమ్మెల్యేలు, నేత‌లు విఫ‌మ‌వుతున్నార‌న్న విమ‌ర్శ‌లు ఉన్నాయి. ఓటర్ల  నమోదుకు   మ‌రో రెండు రోజులు మాత్ర‌మే గ‌డువు ఉంది. కానీ, కూట‌మి నేత‌ల నిర్ల‌క్ష్యం కార‌ణంగా ఉమ్మ‌డి గోదావ‌రి జిల్లాల్లో 3.5ల‌క్ష‌ల ఓట్ల‌కు గాను ల‌క్ష‌ మంది మాత్రమే ఓటర్లుగా నమోదయ్యారు. అదేవిధంగా ఉమ్మ‌డి కృష్ణా - గుంటూరు ప‌ట్ట‌భ‌ద్రుల నియోజ‌క‌వ‌ర్గంలో 3.5ల‌క్ష‌ల మంది ఉంటే కేవ‌లం 1.50ల‌క్ష‌ల మంది మాత్ర‌మే ఓట‌ర్లుగా న‌మోద‌య్యారు.  వారం రోజుల క్రితం సీఎం చంద్ర‌బాబు రెండు ప‌ట్ట‌భ‌ద్రుల నియోజ‌క‌వ‌ర్గాల్లోని ఎమ్మెల్యేలు, ఎంపీల‌తో స‌మావేశం అయ్యారు. ప‌ట్ట‌భ‌ద్రుల ఎమ్మెల్సీ ఎన్నిక‌ల్లో టీడీపీ అభ్య‌ర్థుల విజ‌య‌మే ల‌క్ష్యంగా కూట‌మి పార్టీల్లోని నేత‌లు క‌లిసి ప‌నిచేయాల‌ని సూచించారు.  6వ తేదీ వ‌ర‌కు ఓట్ల న‌మోదు ప్ర‌క్రియ పూర్త‌వుతుంద‌ని,  ఆ లోపు ఓట‌ర్ల న‌మోదును పూర్తి చేయాల‌ని ఆదేశించారు. కానీ, ఎమ్మెల్యేలు, ఎంపీలు, పార్టీ ముఖ్య‌నేత‌లు ప‌ట్ట‌భ‌ద్రుల ఓట్ల‌ను చేర్పించ‌డంపై పెద్ద‌గా దృష్టిసారించ‌డం లేదు. రాష్ట్ర స్థాయి నేతలు నియోజకవర్గ నేతలకు ఇచ్చిన ఆదేశం ఒకటి, ఆచరణలో జరుగుతున్నది ఇంకొకటి. పరస్పర సమన్వయలోపం బహిర్గతమ‌వుతోంది. ఉభయగోదావరి పట్టభద్రుల నియోజకవ ర్గంలో గతంలో మూడు లక్షలకుపైబడి ఓటర్లు ఉన్నారు. ఇప్పుడు తాజాగా ఓటర్ల చేర్పింపులో మాత్రం కూటమి నేతలు నిర్లిప్తంగా, ఇంకా స్పష్టంగా చెప్పాలంటే నిర్లక్ష్యంగా వ్యవహరిస్తున్నారు. దీనికి తోడు  కూటమి నేతల మధ్య కొన్ని నియోజకవర్గాల్లో సమన్వయం లేకపోవడం కూడా ఓటర్ల నమోదులో వెనుకబాటుకు దారితీసింద‌ని తెలుస్తోంది.  గ్రాడ్యుయేట్స్‌ ఎక్కువగా ఉన్న ఏలూరు కార్పొరేషన్‌తో సహా మునిసిపాలిటీలు భీమవరం, పాలకొల్లు, నరసాపురం, తణుకు, నిడదవోలు, కొవ్వూరు, జంగారెడ్డిగూడెం, తాడేపల్లి గూడెం వంటి ముఖ్యప్రాంతాలలో ఓటర్ల నమోదు అత్యధికంగా సాగాలని పక్షం రోజుల క్రితమే మంత్రి నిమ్మల రామానాయుడు నేతృత్వంలో ఏలూరులో ప్రత్యేక సమావేశం జరిగింది. కానీ ఆ త‌రువాత ఓట్ల న‌మోదులో పార్టీల నేత‌లు ఆశించిన స్థాయిలో శ్ర‌ద్ద చూప‌డం లేద‌న్న విమ‌ర్శ‌లు ఉన్నాయి.  సార్వ‌త్రిక ఎన్నిక‌ల్లో కూట‌మి ప్ర‌భుత్వం భారీ మెజార్టీతో అధికారంలోకి వ‌చ్చింది. రెండు ప‌ట్ట‌భ‌ద్రుల ఎమ్మెల్సీ నియోజ‌క‌వ‌ర్గాల ప‌రిధిలోని అసెంబ్లీ నియోజ‌క‌వ‌ర్గాల్లో అధిక శాతం కూట‌మి ఎమ్మెల్యేలే ఉన్నారు. అయినా  ప‌ట్ట‌భ‌ద్రుల ఓట్ల న‌మోదులో వెనుక‌బ‌టం వారి నిర్ల‌క్ష్యాన్ని ఎత్తుచూపుతోంది. పార్టీ అధికారంలోకి వ‌చ్చిన త‌రువాత కొంద‌రు ఎమ్మెల్యేలు త‌మ సొంత ప‌నుల‌పై దృష్టి పెట్టడం వ‌ల్ల ఇలాంటి ప‌రిస్థితి నెల‌కొంద‌న్న వాద‌న‌లు ఉన్నాయి. ప‌ట్ట‌భ‌ద్రుల ఓట్ల న‌మోదులో వెనుక‌బ‌డ‌టంతో సీఎం చంద్ర‌బాబు నాయుడు ఆయా నియోజ‌క‌వ‌ర్గాల్లోని ముఖ్య‌నేత‌లు, ఎమ్మెల్యేల‌పై ఆగ్ర‌హం వ్య‌క్తం చేసిన‌ట్లు తెలుస్తోంది. ఇలా అయితే, రాబోయే కాలంలో క‌ఠిన చ‌ర్య‌లు ఉంటాయ‌ని.. వ‌చ్చే రెండు రోజుల్లో అనుకున్న స్థాయిలో ప‌ట్ట‌భ‌ద్రుల ఓట్ల న‌మోదు జ‌ర‌గాల‌ని ఆదేశించిన‌ట్లు స‌మాచారం.  ఇలా ఉండగా తెలుగుదేశం కూటమి పార్టీల్లోని నిర్లిప్తతను ఆసరాగా చేసుకుని వైసీపీ పట్టభద్రుల ఓట్ల నమోదు విషయంలో దూకుడుగా వెడుతున్నది. వాస్తవానికి గ్రాడ్యుయేట్ ఎమ్మెల్సీ ఎన్నికలు జరుగుతున్న రెండు చోట్లా కూడా ఇటీవలి అసెంబ్లీ ఎన్నికలలో వైసీపీ జీరో రిజల్ట్ సాధించింది. అయినా కూడా ఓట్ల నమోదు విషయంలో దూకుడుమీద వెడుతూ పైచేయి సాధిస్తున్న దాఖలాలు కనిపిస్తున్నాయి.  దీంతో తాజాగా చంద్రబాబు టెలీ కాన్ఫరెన్స్ లో తెలుగుదేశం ఎమ్మెల్యేలపై ఆగ్రహం వ్యక్తం చేశారు. రామచంద్రాపురం ఎమ్మెల్యే వాసంశెట్టి సుభాష్ ను అయితే నేరుగా రాజకీయాల పట్ల సీరియస్ లేకపోతే కష్టం అని వార్నింగ్ ఇచ్చారు.  ఈ నేపథ్యంలో రెండు ప‌ట్ట‌భ‌ద్రుల ఎమ్మెల్సీ నియోక‌వ‌ర్గాల్లోని కూట‌మి ఎమ్మెల్యేలు, నేత‌లు రాబోయే రెండు రోజుల్లో ఏమేర‌కు ఓటర్లను న‌మోదు చేయిస్తారో వేచి చూడాల్సిందే.
Publish Date: Nov 4, 2024 4:13PM

నందిగం సురేష్ కు మరో సారి షాక్

వైసీపీ మాజీ ఎంపీ నందిగం సురేష్ కు మరోసారి షాక్ తగిలింది. మంగళగిరి కోర్టు అతనికి రిమాండ్ పొడిగించింది. మహిళ హత్యకేసులో ఆయన అరెస్ట్ అయ్యాడు. నేటితో రియాండ్ ముగియడంతో పోలీసులు అతడిని  మంగళగిరి కోర్టులో హాజరుపరిచారు. అయితే కోర్టు రిమాండ్ ను పొడిగించింది. మరో 14 రోజులు రిమాండ్ పొడిగిస్తున్నట్లు కోర్టు పేర్కొంది. 2020లో రెండు సామాజిక వర్గాల గొడవలో మరియమ్మ ప్రాణాలు కోల్పోయింది. ఈ హత్యకేసులో నందిగం సురేష్ 78వ నిందితుడు. ఈ కేసునమోదైన తర్వాత నందిగం అరెస్ట్ అయ్యాడు. తొలుత రెండు రోజుల విచారణలో నందిగంపై ఆధారాలు లభ్యం కావడంతో కోర్టు 14 రోజు ల రిమాండ్ విధించింది. తాజాగా సోమవారం మరో 14 రోజులు రిమాండ్ విధించింది. అంటే ఈ నెల 14 వరకు నందిగం జైల్లో ఉంటాడు. 
Publish Date: Nov 4, 2024 4:08PM

గొప్ప విలువలకు పట్టంగట్టిన కారా మాస్టారు

కథా రచనలోనూ, నిజజీవితంలోనూ కాళీపట్నం రామా రావు మాస్టారికి గొప్ప విలువలు ఉన్నాయి. వాటిని ప్రతి వ్యక్తి అలవర్చు కోవాలి.  శ్రీకాకుళం సాహితి, సాహితీ స్రవంతి సంస్థలు ఆదివారం స్థానిక బాపూజీ కళామందిర్ లో ప్రముఖ రచయిత, కేంద్ర సాహిత్య అకాడమీ అవార్డు గ్రహీత కాళీపట్నం రామారావు శత జయంతి కార్యక్రమాన్ని సంయుక్తంగా నిర్వహించాయి. ఈ కార్యక్రమానికి విశిష్ట అతిథిగా డాక్టర్ అంబేద్కర్ విశ్వవిద్యాలయం (ఎచ్చెర్ల) ఉప కులపతి కె.ఆర్. రజని పాల్గొన్ని ప్రసంగించారు.  అక్షరమే దైవంగా భావించిన కారా మాస్టారి జీవితం, చేసిన రచనలు ఎన్నటికీ ఆదర్శనీయమని రజజని అన్నారు. జ్ఞానం, విజ్ఞత, విలువలు, ధీరత్వం వంటి సుగుణాలు కారా మాస్టారు నుంచి నేటి తరం గ్రహించాలని, ఇవి ప్రతి ఒక్కరికీ ఉపయోగపడాలన్నారు. తల్లి లాంటి మాతృభాషా పరిరక్షణకు, అందులోని రచనలను భావితరాలకు అందించేందుకు కృషి జరగాలని సూచించారు.   మాజీ  ఎమ్మెల్సీ ఎం.వి.ఎస్. శర్మ మాట్లాడుతూ ఆంగ్ల మాధ్యమం ప్రభావంతో రచయితలకు కూడా ప్రాంతీయ తత్వాన్ని అంటగడుతు న్నారని, తెలుగు వారు విడిపోతున్నారని అన్నారు. ప్రముఖ కథా రచయిత అట్టాడ అప్పలనాయుడు మాట్లాడుతూ కారా లాంటి కథకుడు లేరని, తన జీవిత సార్థకతకు కొన్ని నియమాలను ఆయన పెట్టుకున్నారని చెప్పారు. ఎవరూ చెప్పని గొప్ప విషయాలు సాహిత్యం చెప్పిందని భావించి సాహిత్యానికి అంకితమైనటువంటి గొప్ప వ్యక్తి కారా మాస్టారు అని కొనియాడారు. ప్రకృతి నియమాలు, సమాజ నియమాలు పాటించాలన్న నియమాన్ని ఆయన  జీవితాంతం ఉల్లంఘించలేదని తెలిపారు. రాజాం రచయితల వేదిక నిర్వాహకుడు గార రంగ నాథం మాట్లాడుతూ సమాజంలోని సమస్యల మూలాలను తెలుసుకోగలిగితే మంచి కథలు రాసి సమస్యలకు పరిష్కారం అన్వేషించ గలమని కారా మాస్టారు చెబుతుండేవారని అన్నారు. ముఖ్య అతిథిగా హాజరయిన శ్రీకాకుళం ఎమ్మెల్యే గొండు శంకర్ మాట్లాడుతూ కథానిలయంను పూర్తి స్థాయిలో డిజిటలైజేషన్ చేసి రచనలను ప్రపంచానికి పరిచయం చేయడమే కారా మాస్టారుకు మనం ఇచ్చే నివాళి  అన్నారు. ఈ కార్యక్రమానికి అధ్యక్షత వహించిన ప్రముఖ రచయిత చీకటి దివాకర్ మాట్లాడుతూ తెలుగు కథకుల్లో మూడు తరాలు వారికి ప్రతినిధిగా కారా మాస్టారు నిలిచారన్నారు. గోనె సంచులు పట్టుకుని ఊరురా తిరిగి కథలు సేకరించారని అన్నారు. విశ్వసాహితి అధ్యక్షులు పొన్నాడ వరాహ నరసింహులు, సాహితీ స్రవంతి సంస్థ అధ్యక్షులు కె.శ్రీనివాస్, కారా మాస్టారి కుమారుడు కె.సుబ్బారావు, గరిమెళ విజ్ఞాన సమితి అధ్యక్షుడు వి.జి.కె.మూర్తి తదితరులు పాల్గొన్నారు.  కార్యక్రమం కొనసాగింపులో భాగంగా ప్రత్యేక సదస్సు జరిగింది. కారా మాస్టారు రచనలు, కథలపై రచయితలు, ఉపాధ్యాయులు దుప్పల రవికుమార్, కంచె రాన భుజంగరావు, మల్లిపురం జగదీష్, డా. కె. ఉదయ్ కిరణ్, ఎ.మోహనరావు, బాడాన శ్యామలరావు, బాల సుధాకర మౌళి, చింతాడ తిరుమలరావు, పూజారి దివాకర్ పత్ర సమర్పణ చేశారు. ఉదయం పది గంటల నుంచి సాయంత్రం ఆరు గంటల వరకు జరిగిన ఈ శత జయంతి కార్యక్రమంలో అనేకమంది సాహితీవేత్తలు, భాషాభిమా నులు, అనుచరులు, విద్యార్థులు పాల్గొన్నారు.
Publish Date: Nov 4, 2024 3:52PM

అరెస్టు ప్రచారంలో నిజమెంత?.. బీఆర్ఎస్ వ్యూహం ఏంటి?

అధికారంలో ఉన్నంత కాలం పట్టపగ్గాల్లేకుండా వ్యవహరించిన బీఆర్ఎస్ ఓటమి తరువాత తెలంగాణలో తీవ్రమైన సంక్షోభంలో కూరుకుపోయింది. రాష్ట్రంలో కాంగ్రెస్, బీజేపీల నుంచి ఎదుర్కొంటున్న సవాళ్లతో పార్టీ ఉనికే ప్రమాదంలో పడిన పరిస్థితులు నెలకొన్నాయి. పార్టీ ఓటమి తరువాత బీఆర్ఎస్ అధినేత అసెంబ్లీకి కూడా డుమ్మా కొట్టి మరీ ఫామ్ హౌస్ కు పరిమితమయ్యారు. పార్టీ నేతలకు కూడా అందుబాటులోకి రావడం లేదు. అసెంబ్లీ ఎన్నికలలో ఓటమి తరువాత లోక్ సభ ఎన్నికల ప్రచారం కోసం బయటకు వచ్చినప్పటికీ.. ఆ ఎన్నికల్లో పార్టీ జీరో ఫలితాన్ని సాధించడంతో  ప్రజలకు పూర్తిగా మొహం చాటేశారు. మరి కొంత కాలం ఆయన ఇదే విధంగా అజ్ణాత వాతం కొనసాగిస్తే.. జనం ఆయనను మరచిపోయే ప్రమాదం ఉందని పార్టీ శ్రేణులే అంటున్నాయి. కేసీఆర్ ఆబ్సెన్స్ లో పార్టీని ఆయన కుమారుడు బీఆర్ఎస్ కార్యనిర్వాహక అధ్యక్షుడు కేటీఆర్ ఏదో విధంగా నడుపుతున్నారు. అయితే ఆయన ఎక్కువగా సామాజిక మాధ్యమంపై ఆధారపడతారు. ఈ నేపథ్యంలో పార్టీ సోషల్ మీడియా వింగ్ పైనే ఆయన ఎక్కువగా ఆధారపడుతున్నారు. క్షేత్రస్థాయిలో పరిస్థితులపై అవగాహన కంటే సోషల్ మీడియాలో వైరల్ అయితేనే లాభం అన్నట్లుగా కేటీఆర్ వ్యవహార శైలి ఉందన్న విమర్శలు పార్టీలోనే ఉన్నాయి. ఈ నేపథ్యంలోనే సింపతీ గెయినింగ్ ఎత్తుగడలో భాగంగా బీఆర్ఎస్ సోషల్ మీడియా వింగ్ లో త్వరలో అంటే ఇహనో ఇప్పుడో ఓ కీలక నేత అరెస్టునకు రేవంత్ సర్కార్ కుట్ర పన్నిందన్న సమాచారం బాగా వైరల్ అవుతోంది. స్వయంగా కేటీఆర్ కూడా ఇదే విషయాన్ని  చెబుతున్నారు. అయితే ఆ అరెస్టు ద్వారా తన ఏడాది పాలనా వైఫల్యాల నుంచి జనం దృష్టి మరల్చాలని రేవంత్ భావిస్తున్నారని కేటీఆర్ పేర్కొన్నారు.  అయితే ఈ కీలక అరెస్టు అన్నది ఎంత వ రకూ నిజమో ఎవరికీ తెలియదు కానీ  బీఆర్ఎస్ మాత్రం దీనికి విపరీతంగా ప్రచారం ఇస్తోంది. తద్వారా ప్రజల నుంచి సానుభూతిని మద్దతును కూడగట్టుకోవాలని ప్రయత్నిస్తోంది.  
Publish Date: Nov 4, 2024 3:05PM

ఎయిర్ పోర్టులో ప్రత్యక్షమైన యూట్యూబర్ హర్షసాయి

పరారిలో ఉన్న యూట్యూబర్ హర్షసాయి అకస్మాత్తుగా శంషాబాద్ ఎయిర్ పోర్టులో ప్రత్యక్షమయ్యాడు.  కూల్ డ్రింక్ లో మత్తుమందు కలిపి తనపై అత్యాచారం చేసినట్లు ఓ సెలబ్రిటీ ఆరోపించిన సంగతి తెలిసిందే. ఈ నేపథ్యంలో  ఆ సెలబ్రిటీ సెప్టెంబర్‌ నెల 24 వ తేదీన   హర్షసాయిపై నార్సింగ్ పోలీసులకు ఫిర్యాదు చేసింది. పెళ్లి పేరుతో మోసం చేశాడని ఆరోపించింది. రూ.2 కోట్ల రూపాయలు సైతం తీసుకున్నాడని ఫిర్యాదులో పేర్కొంది. యువతి ఫిర్యాదును స్వీకరించిన పోలీసులు  హర్షసాయిపై కేసు నమోదు చేశారు. కేసు నమోదైన తర్వాత హర్ష సాయి పరారీలో ఉన్నాడు. అరెస్ట్ తప్పించుకోవడానికే హర్షసాయి విదేశాలకు పారిపోయినట్టు  ప్రచారం జరిగింది.  హర్షసాయి కోసం పోలీసులు గాలించారు. ఏ క్షణమైనా అరెస్ట్ అవుతాడన్న ప్రచారం జరుగుతుండగా తెలంగాణ హైకోర్టు అతడికి బెయిల్ మంజూరు చేసింది. బెయిల్ మంజూరయిన తర్వాత  హర్ష సాయి  శంషాబాద్ ఎయిర్ పోర్ట్ లో ప్రత్యేక్షమయ్యాడు. తనపై వచ్చిన ఆరోపణలు అసత్యమన్న హర్షసాయి నిజాలు బయటకొచ్చాయి కాబట్టే కోర్టు తనకు బెయిల్ ఇచ్చిందన్నాడు.
Publish Date: Nov 4, 2024 2:40PM

తెలుగోళ్లపై నటి కస్తూరి అక్కసు 

కాంట్రావర్సీకి కేర్ ఆఫ్ అడ్రస్ గా మారిన నటి కస్తూరి మరో సారి వివాదంలో చిక్కుక్కున్నారు. భారతీయుడు చిత్రంలో కమల్ హాసన్ పక్కన మెరిసిన నటి కస్తూరి ప్రస్తుతం బిజెపి సభలో తెలుగువారిపై విద్వేష వ్యాఖ్యలు చేశారు. కస్తూరి వ్యాఖ్యలు దేశ వ్యాప్త సంచలనమయ్యాయి.  300 ఏళ్ల క్రితం తమిళనాడుకు వచ్చిన తెలుగు వాళ్లు అంతపురంలో చెలి కత్తెలుగా నియామకమయ్యారన్నారు.   తమిళ బ్రాహ్మణులు పరస్త్రీ వ్యామోహం, ఇతరుల ఆస్తులను  కొల్లగొట్టకూడదని చెబుతున్న కారణంగానే కొందరు తమిళులను వ్యతిరేకిస్తున్నారని ఆమె ఉక్రోశం వ్యక్తం చేశారు. రాష్ట్ర కేబినేట్ లో ఐదుగురు తెలుగు వచ్చిన మంత్రులున్నారని ఆమె అన్నారు. తమిళనాడుకు వలస వచ్చిన వారు తమిళులపై పెత్తనం సాగిస్తున్నారని కస్తూరి వ్యాఖ్యలు చేశారు. తెలుగు సినిమాల్లో మంచి మంచి పాత్రలు పోషించిన కస్తూరి తెలుగువారిపై అక్కసు వెళ్లగక్కడం తగదని నెటిజన్లు కామెంట్ చేస్తున్నారు. తమిళనాడుకు  వలస వచ్చిన తెలుగు వాళ్లు తమిళ బ్రాహ్మణులను తమిళులు కాదనడం సరైంది కాదని కస్తూరి అన్నారు. 
Publish Date: Nov 4, 2024 11:53AM

News Videos

    See More News Videos

    Movie News

    Get all the updates about andhra pradesh news, political news, articles, sr journalists books, regional news, telugu cinema news etc. Find information about Telugu film news, regional news, current affairs, gallery, wallpapers, etc. See Telugu news, news videos along with latest news only at TeluguOne.com.
    TeluguOne Services
    TeluguOne For Your Business
    About TeluguOne
    Keywords: Telugu News

    Copyright © 2024 TeluguOne NEWS - All Rights Reserved

    Disclaimer:
    All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
    You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.