ఆంధ్రప్రదేశ్ ముఖ్యమంత్రి నారా చంద్రబాబు నాయుడు మాటల ముఖ్యమంత్రి కాదు.. చేతల ముఖ్యమంత్రి. రాజకీయంగా చంద్రబాబును వ్యతిరేకించేవారు కూడా ఆయన పనితనాన్ని ఎంతమాత్రం విమర్శించరు. ఏదైనా అనుకుంటే దాన్ని సాధించడం కోసం నిర్విరామంగా శ్రమించే తత్వం చంద్రబాబుది. ప్రస్తుతం చంద్రబాబు నాయుడు ఆంధ్రప్రదేశ్ రాష్ట్రాన్ని అభివృద్ధి పథంలో నడిపించడానికి కృషి చేస్తున్నారు. ఏ విషయంలో అయినా మెరుపు వేగంతో చకచకా దూసుకువెళ్తూ ప్రతి విషయంలోనూ తనదైన ముద్ర వేస్తున్నారు. అయితే ఈ చంద్రబాబు చకచక రాష్ట్రం నుంచి ఎంపికైన తెలుగుదేశం ఎంపీలు విలవిలలాడేలా చేస్తోంది. చంద్రబాబు నాయుడు ప్రతి పనినీ తానే చేస్తూ వుండటం వల్ల ఎంపీలు చేయడానికి ఏమీ మిగలటం లేదు. కేంద్రంతోగానీ, కేంద్రమంత్రులతోగానీ సంప్రదింపులు జరిపే విషయం గానీ, వారు రాష్ట్రానికి వచ్చినప్పుడు గానీ చంద్రబాబు ఎంపీల ప్రమేయం లేకుండా ప్రతి విషయాన్నీ తానే డీల్ చేస్తున్నారు. ఎంపీలు చేయాల్సిన పనులు కూడా తానే చేసేస్తూ ఎంపీలను కేవలం ఉత్సవ విగ్రహాల మాదిరిగా కూర్చోబెడుతున్నారు. ఎంపీలు ఏదైనా పని చేయాలని అనుకుని అడుగు ముందుకు వేసేలోపు చంద్రబాబు నాయుడు అప్పటికే ఆ పని పూర్తి చేస్తున్నారు. దాంతో తెలుగుదేశం ఎంపీల పరిస్థితి అయోమయంగా తయారైంది. మాక్కూడా పనిచేసే అవకాశం ఇవ్వండి సార్ అని చంద్రబాబుతో చెప్పలేక, మింగలేక, కక్కలేక ఎంపీలు అల్లాడిపోతున్నారు. చంద్రబాబు తమను ఏ పనీ చేయనివ్వడం లేదని, తమకూ పనిచేసే అవకాశం ఇస్తే ఎంపీలుగా ఎన్నికైనందుకు సార్థకత వుంటుందని టీడీపీ ఎంపీలు సహచరుల దగ్గర వాపోతున్నారు. అందుకే ఇప్పటికైనా చంద్రబాబు నాయుడు ‘బొమ్మరిల్లు’ సినిమాలో తండ్రిలా అన్ని పనులూ తానే చేయడం కాకుండా, ఎంపీలకు కూడా పనిచేసే అవకాశం, వారి శక్తి సామర్థ్యాలను కూడా వినియోగించుకునే ఆలోచన చేస్తే బాగుంటుందన్న అభిప్రాయాలు వ్యక్తమవుతున్నాయి.