శ్రీ శామ్యుయెల్, జి.జె.

    చైనా దురాక్రమణ

    గుటకాయ స్వాహా యన
    తటస్థ రాజ్యంబుపైన దండెత్తు మిమున్
    నిటలాక్షుం డుగ్రుండై
    కుటిలపు తంత్రములనెల్ల గూలుచుగాతన్.    

    కైలాస మునికిగా గల
    ఫాలాక్షునికైన సుంత - భయపడకుండన్
    ఆలమునకు సిద్ధపడిన
    బాలీశుల పీచమణచ - బాధ్యత మనదే.

    చైనాను బిలువకుండుట
    నానాజాతుల సమితికి - నగుబాటంచున్
    మానక వాదించిన, యభి
    మానంబును సాంతముగను-మంట గలిపిరే!

    మా దేశపు సిద్ధార్థుని
    నాదర్శముగగొని వాని-యాజ్ఞలపట్లన్
    సూదిమొన యంతయైనను
    నాదరణను జూపకుండు టతి దారుణమౌ

    కైకొనియు, పంచశీలము
    లేకముగా విస్మరించి-యిచ్చకపు నుడుల్
    వాకొని యిప్పట్లను, మర
    మేకై కూర్చుండినారు-మ్లేచ్చులరీతిన్.

    సహనము మా నైజమయిన
    అహింస బాల్యంబునుండి-యలవాటైనన్
    అహరహము బోరి మీతో
    తుహినాద్రినె పడయగలము తుది విజయంబున్.

    ఇరువేల యేండ్లనుండియు
    సరాసరిగ సాగుచున్న - సభ్యత తృటిలో
    పరిమార్చిన మిము, దురమున
    పరాహితుల జేయకుండ-పట్టు విడుతుమా!

    సన్ యెట్ సేను-చరిత్రను
    తెనుగున ప్రచురించునట్టి-దేశస్థులపై
    అని చాటించిన చైనా
    జనాంగమును మెచ్చలేరు-సజ్జను లెవరున్.

    రవులుకొనిన యుద్ధమునకు
    సవిస్తరముగ సమకూర్చి-సకలాయుధముల్
    పవరములో మన పగతుర
    సవాలు నెదురుకొనదగిన - సమయం బిదియే.

    పంచశీలంబుల ననుసరించ నెంచి
    పంచశిల లాక్రమించిన - వంచకులుగ
    సిద్ధమైనారు బౌద్ధులు-యుద్ధమునకు
    సత్యశౌచాళి గాలికి జారవిడచి.

                                        *  *  *  *