"మగపిల్లాడు ఎదిగితే చాలా సమస్యలు వస్తాయి. వాడు సిగరెట్లు తాగుతున్నాడేమో గమనించాలి మందు పార్టీలకు వెళుతున్నాడేమోనని భయపడాలి.  పేకాట ఆడుతున్నాడేమేనని  ఆరా తీయాలి.  ఏ అమ్మాయి కొంపముంచుతున్నాడేమోనని హడలి చావాలి. ఆడపిల్ల  ఎదిగితే ఒకే ఒక సమస్య ఎదురవుతుంది. ఆ సమస్య నీకూ వచ్చింది రూపమ్మా"

    అతను ఉపోధ్ఘాతంగా చెప్పిన విషయం ఏమిటో అర్దమైంది శతరూపకు. వివరాలు  తెలియాలి. అంతే.

    "సరిగా చెప్పన్నా" అప్పటికే వేదన గొంతుకు అడ్డంపడుతోంది.

    "రాత్రి ఇందుమతి అంకాళమ్మ గుడిదగ్గర కనపడింది. కుర్రాడెవరో నాకు తెలియదు. అంతగా గమనించలేదు. మగ దిక్కు లేని సంసారం. మీరు ఇలాంటి  సమస్యల్లో చిక్కుకుంటే వచ్చే ప్రమాదాలు"
మీకు తెలియనివా?" జాగ్రత్తగా వుండమని ఓసారి చెబుదామని....." అని మధ్యలో ఆపాడు రామదాసు.

    "వస్తానన్నా" అని శతరూప అక్కణ్నుంచి వచ్చేసింది.

    మొత్తం ప్రపంచమంతా తలకిందులుగా తిరుగుతున్నట్టు తోస్తోంది ఆమెకు. ఇప్పుడేం చేయాలో, ఎలా ఈ ఉపద్రవాన్ని ఆపాలో తెలియడం లేదు. వయసుకొచ్చిన  ఓ అమ్మాయి ఎవరి ప్రేమలోనైనా పడడం సహజం కావచ్చు. కానీ తమ పరిస్థితి .ఇది నలుగురికీ తెలిస్తే తన దరిద్రంతోపాటు నిందల్నీ మోయాల్సివస్తుంది. జీవితంలో మరి ఇందుమతికి పెళ్లవుతుందా? అదే ఆమె భయం.  కష్టాలన్నీ తన ఒక్కదానికోసమే ఎందుకు పుట్టుకొస్తున్నాయో ఆమెకీ అర్దంకాని విషయం.

    మౌనంగా ఇంటికెళ్లింది.

    కూతురు పెరట్లో గిన్నెలను తోముతోంది. అనసూయమ్మ పడక మీద నుంచి లేచి నోట్లో పుల్ల వేసుకుని పచార్లు చేస్తోంది. ఉదయం పూట అలా నీరెండలో తిరగడం ఆమెకి అలవాటు.

    శతరూపకు తలనొప్పిగా అనిపించింది దేని గురించైనా దీర్ఘంగా ఆలోచిస్తే ఈ మధ్య తలనొప్పి వస్తోంది. డాక్టర్ దగ్గరికి వెళ్లాలనుకుంటూనే వెళ్లడంలేదు. డాక్టర్ కి చూపించాలంటే వందరూపాయలు ఖర్చయిపోతాయి. ఆ వంద వుంటే ఓ పదిరోజులు దొర్లిపోతాయి. తలనొప్పి  తగ్గుతుందేమోననిపించి మంచంపై పడుకుంది శతరూప.

    కూతుర్ని పిలిచి మందలించాలనిపించడంలేదు.  ప్రేమించకుండా  ఇంట్లోనే  వుండిపో అని  చెప్పడం దారుణంగా అనిపించింది. కడుపునిండా తిండి పెట్టలేని తను, కావాల్సినవాటిని సమకూర్చలేని తను, చదువుకుంటానంటే చదివించలేని తను ఆమెమీద  - కూతురైనా సరే అధికారాన్ని ప్రదర్శించి  ఆమె ఇష్టాలను  బలవంతంగా అణచివేయాలనుకోవడం రాక్షసత్వం  అనిపించింది.

    అందులోనూ తనకే ఏది మంచో, ఏది చెడో తెలియదు. తన కూతురిలాగా  ఎవరో కుర్రాడ్ని ప్రేమించి. పెళ్ళి చేసుకోవడం ఉత్తమమో లేకపోతే తనలాగా బుద్దిగా పెద్దలు కుదిర్చిన పెళ్ళిని చేసుకుని, ఆ తరువాత ఏం జరిగినా విధివ్రాత అని రాజీపడిపోయి జీవించడం ఉత్తమమో తెలియడంలేదు.