నగరంలో వృషభం
నగరం నడివీధిలో
వృషభం తీరుబాటుగా
గత జన్మ సంస్మృతులు కాబోలు
కనులరమోడ్చి నెమరేస్తూ
కదలకుండా మెదలకుండా
నగరం హృదయంలో వృషభం
దారికి హక్కుదారు తానే అయినట్టు
పరిత్యజించి కాలానికి బాధ్యత
పరిహసించి నాగరికత పరుగు
నిలబడింది నేను రాజునని
ఎవరు పొమ్మనగల రీ ఎద్దుని
ఎలా చూస్తుందో చూడు
ఏయ్ ఏయ్ మోటారుకారూ
ఏఁవిటేఁవిటి నీ తొందర
భాయ్ భాయ్ సైక్లిస్ట్
భద్రం సుమీ ఎద్దు నిన్ను తప్పుకోదు
యంత్ర విరోధి అహింసావాది శాకాహారి
మద్యనిషేద ప్రజ్ఞాశాలి
నగరం నడివీధిలో
నాగరికత గమనాన్ని నిరోధిస్తూ
ఇలా యెంతసేపయినా సరే
ఈ యెద్దు నిలబడగలదు
ఎద్దుకి లేకపోతే బుద్ధి
మనిషికేనా ఉండొద్దా?
- అబ్బూరి ఛాయాదేవి సంకలించిన 'కవిత' - ఆగస్టు, సెప్టెంబరు, 1954
