జె.ఆర్.డి.కి. లీఅయోకోకాకి, సాయ్ ఛిరోహోండాకి, ఆగ్నెల్లీకి తనకున్న క్వాలిఫికేషన్స్ లేకపోయినా నిజజీవితపు వ్యాపార పరమపద సోపాన పటంపై నష్టాల పాముకాటుని తప్పించుకుంటూ లక్ష్యాన్ని చేరుకున్నారని తెలిసినప్పుడు తను సిగ్గుతో చితికిపోయాడు.

 

    నలుగురూ మరింతగా నవ్వకముందే తన విజిటింగ్ కార్డ్ పై జస్ట్ పి.రవికిరణ్, ఫైనాన్స్ సెక్రటరీ అని వేసుకొని తన వెర్రిబాగులతనాన్ని దూరం చేసుకున్నాడు.

 

    లక్షల నష్టాన్ని కోట్ల లాభంగా మార్చే రియల్ లైఫ్ జీనియస్ రాఘవేంద్రనాయుడి, మూసిన కనురెప్పల వెనుక దాగిన తెలివితేటల ముందు తను అబ్సెషన్ తో, గొప్పకోసం సాధించుకున్న డిగ్రీలు ఎందుకైనా పనికొస్తాయా అని అనిపించిన దగ్గర్నుంచే- యూనివర్శిటీల చదువుకున్నా, సిలబస్ కన్నా, నిజజీవితపు వ్యాపార సూత్రాలే గొప్పవనిపించాయి.

 

    పదిలక్షల ఖరీదు కూడా చేయని బార్ ని మధుకర్ ముప్ఫయి లక్షలకు కొన్నప్పటినుంచి తను తీవ్రంగా మధనపడుతున్నాడు. దాన్ని లాభంగా మార్చగలరు ఎలా?

 

    అదే డిగ్రీలూ ఇవ్వలేనిది.

 

    "బార్ ఒరిజినల్ గా ఎంతుంటుంది...?" వున్నట్లుండి అడిగాడు రాఘవేంద్ర నాయుడు.

 

    "సరిగ్గా లెక్కవేస్తే ఎనిమిది లక్షలకంటే పలకదు సార్" సెక్రటరీ సమాధానమిచ్చాడు.

 

    "ఏ సెంటర్ లో వుంది?"

 

    "క్రాఫోడ్ సెంటర్ లో సార్!"

 

    "ఎన్ని గజాలుంటుంది?"

 

    "సుమారు ఆరువందల గజాలు."

 

    "ఆ స్థలం మీద ఎలాంటి వివాదాలు లేవుగా?"

 

    "లేవు సార్!"

 

    తిరిగి నిశ్శబ్దం అలుముకుంది ఆ హాల్లో.

 

 

    ఆ నిశ్శబ్దం అలాగే కొద్దినిముషాలు రాజ్యమేలాక, నెమ్మదిగా లేచాడు రాఘవేంద్రనాయుడు. ఆయన ముఖంమీద చిరునవ్వు లీలమాత్రంగా ,మెరిసి అదృశ్యమైపోయింది.  

 

    "ఆ బార్ యజమాని ఎవరు?" కనురెప్పల్ని మృదువుగా రబ్ చేసుకుంటూ అడిగాడు రాఘవేంద్రనాయుడు.

 

    "రాజేంద్రప్రసాద్ అని... స్మాల్ టైప్ బిజినెస్ మెన్ సార్" ఫైనాన్స్ సెక్రటరీ నెమ్మదిగా అన్నాడు.

 

    "ఆ ప్రాంతాన్ని మీరు చూశారా?"

 

    "సారీ సార్! చూశానుగాని- అంత పరిశీలనగా చూడలేదు" సెక్రటరీ ఒకింత నొచ్చుకుంటున్నట్లుగా అన్నాడు.

 

    "ముందా ప్రాంతాన్ని చూద్దాం పదండి" అంటూ బయటకు నడిచాడు రాఘవేంద్రనాయుడు.

 

    Right on the bull's eye. Raghavendra naidu's life should be required reading in every Indian company and in every business school. I should give copy of his biography to each member of my family. Motivating people to be the transcendls Cultury. Must reading for anyone who wants to learn how to make a company perform at the cutting edge of excellence.

 

    వాస్తవాలకు దూరంగా ప్రాక్టికాలిటీకి అందనంత ఎత్తుల్లో, నిజజీవితపు పరమపద సోపాన పటంపై విషయాన్ని అందించలేని కామర్స్, బి.కామ్., ఎమ్.కామ్., ఎం.బి.ఏ. లాంటి చదువులు నేర్పేది ఏమిటి? సింగిల్ ఎంట్రీ, డబుల్ ఎంట్రీలు లెడ్జర్స్ లో ఎలా ఎంటర్ చెయ్యాలనేగా? ఎప్పటి విద్యా విధానం? మెఖాలే ఎప్పుడో కాలగతిలో కలిసిపోయాడు. ఏ కాలంలో సిలబస్ తయారు చేసాడో? ఎవరికీ పట్టదేమో?

 

    జె.ఆర్.జీ. రస్పీమోడీ, జి.డి. బిర్లా, హెన్రీఫోర్డ్, గియోవానీ ఆగ్నేల్లీ, కాన్రాడ్ హిల్టన్, రాక్ ఫెల్లర్, గళధారీ బ్రదర్స్, సర్ జాన్ హర్వే జోన్స్, రాబర్ట్ ఏండర్సన్, ఆకిమో మోరిటా, ముషారు ఇబుకా జీవితాన్ని గ్రంథస్థం చేసి వాటినే సిలబస్ గా ఎందుకు ఎందుకు మార్చరు?

 

    ఆ... ఎవడికి పట్టింది?

 

    ఎలక్షన్స్, రిగ్గింగ్, బాంబింగ్....

 

    గెలవటాలు, మెజారిటీ ఆఫ్ ఓట్స్...

 

    ఆపైన పదవులు, ప్రజాధనాన్ని పంచుకోవటాలు. వెధవలు. ఇండియన్ పొలిటీషియన్స్ ఉత్త వెధవాయిలు, పెద్ద బడుద్ధాయిలు. ఇందులో సందేహం లేనేలేదు.

 

    వారి వారి వ్యక్తిగత సంపద సామ్రాజ్యాన్ని విస్తరించుకోవటంతోనే వారి కాలమంతా వినియోగమయిపోతుంటే... దేశాన్ని, దేశ ప్రజల్ని, యువతని బాగుచేసే తీరిక, శ్రద్ధ వారికెక్కడుంది?

 

    అయినా సిగ్గు, ఎగ్గు లేని ప్రజలు ఎలక్షన్స్ అనగానే పనులు మానుకొని, బారులు తీరి ఓట్లేస్తారు. ఛీ... ఛీ....

 

    కేవలం ఐదో తరగతి వరకే చదువుకోగలిగిన రాఘవేంద్రనాయుడు - ఎగ్రికల్చర్ బ్యాగ్రౌండ్ మాత్రమే వున్న రాఘవేంద్రనాయుడు ఇరవై లక్షల నష్టాన్ని రెండు కోట్ల లాభంగా మార్చబోతున్నారు. అదే సిలబస్ లో ఇన్ క్లూడ్ చేస్తే పదికి ఒక్క విద్యార్ధి అయినా ఎంటర్ ప్రెన్యూర్ కాలేడా? అవుతాడు- ఖచ్చితంగా అయి తీరుతాడు. కానీ శ్రద్ధ ఎవరికుంది...?

 

    ఏదో విప్లవం ఈ దేశంలో రావాలి- వచ్చి తీరాలి. అది సామాజికమైనదైనా, ఆర్థికమైనదైనా వచ్చి తీరాలి.

 

    కారు ఫ్రంట్ సీట్లో కూర్చున్న ఫైనాన్స్ సెక్రటరీ మదిలో మెదిలే ఆలోచనలివి.

 

    కొద్దిసేపటికి కారు మధువన్ బార్ ముందు ఆగింది.

 

    అప్పటికే రాఘవేంద్రనాయుడి సిబ్బంది అక్కడ వుంది. ఒకరు గార్డులా కాపలా కాస్తూ కనిపించాడు.

 

    ఛైర్ మెన్ కారుని చూస్తూనే వాళ్ళు అలర్ట్ అయిపోయారు. రాఘవేంద్రనాయుడు కారుదిగి పరిశీలనగా గమనించాడు.

 

    "ఫర్వాలేదు. ఒక మాదిరి సెంటరే. వూ...."

 

    రాఘవేంద్రనాయుడు స్వగతంలో అనుకున్నాడు.

 

    ఆ తర్వాత చకచకా ఆ ప్రాంతమంతటినీ సుడిగాలిలా చుట్టివేసాడు.

 

    "ఆ ప్రాంతానికున్న విలువను ఎన్నో రెట్లు పెంచితేనే మన స్థలానికంత లాభం వస్తుందన్న మాట. అంతేగదా...!" రాఘవేంద్రనాయుడు నెమ్మదిగా అంటోంటే ఫైనాన్స్ సెక్రటరి తికమక పడిపోయాడు.

 

    ఓవర్ నైట్ లో అయ్యే పనికాదది.

 

    క్రాఫోర్డ్ సెంటర్ రాఘవేంద్రనాయుడి లాంటి జీనియస్ దృష్టిలో పడి ఆ నగరం మొత్తంలోకే అతి విలువైన వ్యాపార కేంద్రంగా మారబోతున్నదనే విషయం ఫైనాన్స్ సెక్రటరీ నాన్ క్రియేటివ్- ఎకడమిక్ బ్రెయిన్ కి అందటం చాలా కష్టం.

 

    "అర్బన్ డెవలప్ మెంట్ అధారటీ ఆఫీసుకి పోనివ్వు" అన్నాడు రాఘవేంద్రనాయుడు గంభీరంగా. ఆయన కనురెప్పల వెనుక కదిలే కల నిజరూపం ధరించబోతోంది.

 

                              *    *    *    *    *