శ్రీశ్రీకి వందనం

                                                             ఉప్పెన

    వందనం... వందనం... వందనం...
    మా... వందేండ్ల శ్రీశ్రీకి... వందనం
    ఓ... మహాకవి... శ్రీశ్రీ...
    అందుకో అందుకో వందేండ్ల వందనం                                                   || వందనం ||

    మనిషిని మనిషే దోచే దోపిడి రాజ్యంలోన
    మనిషిని మనిషే మోసే బానిస బతుకులపైన
    రాజుల రాణుల చరితల వ్రాసుడే కవి పనికాదని
    పల్లకి మోసిన బోయీల బాధలను చెప్పినట్టి                                          || వందనం ||

    తాజ్ మహల్ అందాలు వర్ణించుటే కాదని
    ఆ కట్టుబడికి రాళ్లెత్తిన కూలీలు ఎవ్వరని
    శ్రామిక జన సౌందర్యం అందాలను చూడమన్న
    కష్టజీవి కిరువైపుల ఉన్నవాడే కవి అన్న                                               || వందనం ||

    జయభేరి నుండి మహాప్రస్థానం గీతాల వరకు
    కవితలకూపిరి ఊది కథలకు ప్రాణం పోసి
    గన్నులాగ పెన్నును ఎక్కుపెట్టి నిలిచినావు
    ఎదురు నాకు లేదంటూ ఈ శాతాబ్ది నాదేనన్న                                          || వందనం ||

    మరోప్రపంచం పిలిచింది పదండి ముందుకు అంటు
    యువతరం గుండెలను మండించిన అగ్ని కణం
    నేను సైతం ప్రపంచానికి సమిధనొక్కటి ఆహుతిచ్చానని
    సమసమాజ స్థాపనకు కలం ఎత్తి గళమిప్పిన                                            || వందనం ||

    దొరతనాన్ని ఎదిరించి దోపిడీని ప్రశ్నించి
    చైతన్యాన్ని నింపినావు సాహసాన్ని నేర్పినావు
    జనాన్ని మేల్కొలిపిన ఓ మహాకవి శ్రీశ్రీ
    నీ... వాణకి పదునుపెట్టి నీ... వేడిని మరిగిస్తం                                           || వందనం ||

    ఇక వెయ్యేండ్లు గడిచినా నీకు ఎదురు లేనే లేదు
    ఇంక ఎందరు పుట్టినా నీకు సాటి రానేరారు
    నింగిలోన ఎగురుతున్న అరుణారుణ ధ్రువతారవు
    సాహితీవనములోన విరబూసిన మందారమా                                              || వందనం ||

        ( 'పోరుబాటలో ఉప్పెన పాట' మార్చ్, 2015)

            కమ్యూనిజమంటే నీ
            కమ్మయ్యో ఎంత భయం?
            నిజం చెప్పనా, కమ్యూ
            నిజానిదే తుది విజయం !
        (దూదిపులి మీద పుట్ర.. 'మరో ప్రస్థానం' మే 1980)