Episode – 39

రాంబాబు కంగారుగా “హయ్యో … హమ్మో …’’ అన్నాడు.

నందివర్థనరావు పడగా వచ్చిన “ధనేల్’’ అన్న శబ్దానికి క్యాబిన్ దగ్గరగా వున్న సర్వోత్తమరావు ఏమైందోనని హడావిడిగా లోపలికి వచ్చాడు.

లోపలి దృశ్యం కనుల విందుగా కనిపించిందతనకి.

రాంబాబు కాళ్ళమీద మేనజర్ నందివర్థనరావు.

గుమ్మంలో అలికిడికి తలెత్తి చూసిన నందివర్థనరావుకి సర్వోత్తమరావుకనిపించడంతో మరీ మండిపడిపోయాడు.

“నువ్వెందుకు వచ్చావ్ లోపలికి? నేను రమ్మని ఆనందే లోపలికి ఎవరూ రాకూడదు. గెటవుట్! లేకపోతే తోక కట్ చేస్తా …’’

సర్వోత్తమరావు అయోమయంగా మొహం పెట్టి క్యాబిన్ లోంచి బయటికి వెళ్ళిపోయాడు.

రాంబాబు ఇంకా నోటిమీద కొట్టుకుంటూ “హయ్యో … హయ్యో’’ అంటూనే వున్నాడు.

“ఏంటి హయ్యో హయ్యో! నీ హయ్యో హయ్యో మంటెట్టా … ముందు నన్ను కిందనుంచి లేవదియ్యి. లేకపోతే నీ తోక కట్ చేస్తా …’’ పళ్ళు బిగించి అన్నాడు నందివర్థనరావు.

రాంబాబు కంగారుగా ముందుకు వంగి అతనికి చెయ్యి అందించి పైకి లేపాడు.

“అసలు నా కాలు ఎందుకు ఇంత ఇదిగా జారింది …?’’ అయోమయంగా నేలమీద చూస్తూ అన్నాడు నందివర్థనరావు.

“మీరు ఆ పేపర్ వెయిట్ మీద కాలేసి జారిపడ్డారు సార్!’’

నందివర్థనరావుని క్రిందపడేసి క్యాబిన్ మూలకు దొర్లుకుంటూ చేరిన పేపర్ వెయిట్ ని చూపిస్తూ అన్నాడు రాంబాబు.

“పేపర్ వెయిటా …? టేబుల్ మీద వుండాల్సిన పేపర్ వెయిట్ క్రింద ఎందుకుంది?’’

రాంబాబు క్యాబిన్ మూలకెళ్ళి పేపర్ వెయిట్ ని అందుకున్నాడు. మళ్ళీ నందివర్థనరావు దగ్గరికి వచ్చాడు. అతని చేతిలోని పేపర్ వెయిట్ చూసి నందివర్థనరావు ఆశ్చర్యపోయాడు.

“ఇది నా టేబులుమీద వుండే పేపర్ వెయిట్ కాదే?!’’

“అవున్సార్! ఇది మీది కాదు సార్ … ఇది నాది సార్! అసలు దీనికోసమే నేను మీ క్యాబిన్ లోకి పాకుతూ వచ్చాను సార్’’ భయభాయంగా చెప్పాడు రాంబాబు.

“అసలిది నా క్యాబిన్ లోకి ఎలా వచ్చింది? రానురానూ ఇరిటేట్ అయిపోతున్నాడు అతను.

“అంటే నేనేమో మరేమో … టేబుల్ మీద గట్టిగా గుద్దాను సార్! ఇదేమో టేబుల్ మీదినుండి ఎగిరి క్రిందపడి దొర్లుకుంటూ మీ క్యాబిన్ లోకి వచ్చేసింది సార్! ఈసారి ఎప్పుడైనా టేబుల్ మీద గుద్దితే మెల్లగా గుద్దుతాను సార్! వస్తువులు ఎగిరి కిందపడేలా గుద్దను సార్!’’

“ఆ …’’ నెత్తిన రెండు చేతులు పెట్టుకుని బాధగా అరిచాడు అతను.

“అసలు నువ్వు టేబులు మీద ఎందుకు గుద్దాలి!’’

“ఈసారి గనుక నువ్వు టేబులు మీద మళ్ళీ గుద్దినట్టు తెలిసిందో ముందు నీ తోక కట్ చేస్తా … తర్వాత ఇంక్రిమెంటు కట్ చేస్తా … తెలిసిందా?’’

“తెల్సింది సార్!’’

ఇంట్లో ఇంటర్ కం కుయ్ కుయ్ అంది.

‘’ఇంటర్ కం ఎత్తి “హలో ‘’ అన్నాడు అతను.

“సార్! ఇందాక మీరిచ్చిన అర్జెంట్ లెటర్ టైప్ అయిపొయింది సార్! లోపలి తీసుకురమ్మంటారా?’’ అవతలి నుండి లీల అడిగింది.

“వద్దు! దాన్ని ప్యూన్ తో పంపు. నువ్వు లోపలి రాకు రాకు రాకు రాకు’’ గట్టిగా అరిచి ఇంటర్ కంని పెట్టేసి రాంబాబు వంక చూశాడు అతను.

“నువ్విక వెళ్ళొచ్చు … లోపల జరిగింది ఎవరికైనా చెప్పావో … నిన్ను శంకరగిరి మాన్యాలకు ట్రాన్స్ ఫర్ చేస్తా’’

“అబ్బే … చెప్పను సార్! ఒహవేళ చెప్తే మీరు లీలని సొంత చెల్లిల్లా చూసుకుంటారని చెప్తాను సార్!’’ వినయంగా అన్నాడు రాంబాబు.

“హబ్బా!’’ చేత్తో నెట్టి కొట్టుకున్నాడు అతను ‘’నువ్వు అసలు ఏమీ చెప్పక్కర్లేదు’’ పళ్ళు నూరుతూ అన్నాడు.

“అలాగే సార్!’’

“నువ్వింకా వెళ్ళొచ్చు’’

రాంబాబు క్యాబిన్ లోంచి బయటకు వచ్చాడు.

ఇంకావుంది …. Back

                          

TelugOne-Related posts:

1. Prema Pandem part -36
2. Prema Pandem part -34
3. Prema Pandem part -33
4. Prema Pandem-part 16
5. Prema Pandem-part 15