ఇంట్లో ఇది ఉంటే పార్లర్ అక్కర్లేదు

 

ఇంట్లో ఇది ఉంటే పార్లర్ అక్కర్లేదు!

 

 

ప్రతి సమస్యకీ పరిష్కారం ఉంటుంది. ఒక్కోసారి అది మన చేతిలోనే ఉంటుంది. ఆ విషయం మనకి తెలియక కంగారు పడిపోతుంటాం. ముఖ్యంగా సౌందర్య సమస్యలకి బ్యూటీషియన్ల మీద, డాక్టర్ల మీద ఆధారపడుతుంటాం. నిజానికి చిన్ని చిన్న చిట్కాలతో వాటి నుంచి బయట పడిపోవచ్చు. ఉదాహరణకి... దాల్చినచెక్క ఉంటే చాలు, బోలెడు సమస్యలు తీరిపోతాయి. అదెలా అంటే...

 

- దాల్చిన చెక్క చర్మాన్ని తేమగా ఉండేలా చేస్తుంది. స్కిన్ పొడిబారడం వల్ల వచ్చే దురదల్ని తగ్గిస్తుంది. దాల్చినచెక్కని మెత్తని పౌడర్ లా చేసి, దానిలో కాస్త తేనె కలిపి, రాత్రి పడుకోబోయే ముందు దురద ఉన్నచోట రాసుకోవాలి. ఉదయాన్న లేచి చల్లని నీటితో కడిగేసుకుంటే చర్మంలో తేమ పెరిగి దురదలు తగ్గిపోతాయి. ఏదైనా కుట్టి ర్యాషెస్ వచ్చినా ఈ చిట్కా చక్కగా పని చేస్తుంది.

 

- దాల్చిన చెక్క పొడిలో నిమ్మరసం కలిపి మొటిమలు, బ్లాక్ హెడ్స్ మీద పూయాలి. ఆరిన తర్వాత కడిగేసుకోవాలి. కొన్నాళ్లు ఇలా చేస్తే అవి పూర్తిగా మాయమైపోతాయి. మచ్చలు కూడా మిగలవు.
- దాల్చిన చెక్కను పొడి చేసి, కొద్దిగా తేనె, కాసింత ఆలివ్ ఆయిల్ కలిపి పేస్ట్ లా చేయాలి. దీనిలో ఎగ్ వైట్ కలిపి జుత్తుకీ, మాడుకీ పట్టించాలి. పావుగంట సేపు అలా ఉంచి, తర్వాత తలంటుకోవాలి. వారానికోసారి ఇలా చేస్తే చుండ్రు వదిలిపోతుంది. జుత్తు బలంగా, పొడవుగా పెరుగుతుంది.

 

- పెట్రోలియం జెల్లీలో దాల్చిన చెక్క పొడి కలిపి పెదవులను బాగా రుద్దుకుంటే పగుళ్లు మానిపోతాయి. డెడ్ స్కిన్ తొలగిపోయి పెదవులు మృదువుగా, అందంగా తయారవుతాయి.

 

- దాల్చినచెక్క పొడిని నీటిలో వేసి మరిగించాలి. ఈ నీరు కాస్త చల్లారి గోరువెచ్చగా అయ్యాక పుక్కిలిస్తే... నోటి దుర్వాసన వదిలిపోతుంది.

 

- గోరువెచ్చని నీటిలో దాల్చిన చెక్క పొడి, ఆలివ్ ఆలియ్, నిమ్మరసం, కొద్దిగా పాలు కలిపి... ఇందులో పాదాలు ముంచాలి. పదిహేను నిమిషాలు అలా ఉంచిన తరువాత రుద్ది కడిగేసుకోవాలి. తరచూ ఇలా చేస్తే పాదాలు పగలకుండా స్మూత్ గా ఉంటాయి. ఆల్రెడీ పగుళ్లు ఉంటే మూసుకుపోతాయి.

వంటల్లో మాత్రమే పనికొస్తుందనుకునే దాల్చినచెక్క మన అందాన్ని పెంచడానికి ఎలా దోహదపడుతుందో చూశారు కదా! అందుకే ఇంట్లో ఎప్పుడూ దాల్చినచెక్క ఉండేలా చూసుకోండి. అన్ని సమస్యలకీ అదే పరిష్కారం.
 

- Sameera