సంగీత దర్శకుడి కూతురు అనుమానాస్పద మృతి
on Feb 6, 2016
ఒక సినిమా షూటింగ్ కోసం హైదరాబాద్ వచ్చి, హోటల్లో మృతి చెందిన మళయాళ నటి కల్పన ఘటన మరువక ముందే, మరో మళయాళీ హోటల్ లో మరణించారు. ప్రముఖ మళయాళీ సింగర్ షాన్ జాన్సన్ (29) చెన్నైలోని ఒక హోటల్ లో అనుమానాస్పదంగా మృతి చెందారు. సాధారణంగా, తమ సాంగ్స్ రికార్డింగ్ కు సౌత్ ఇండియన్స్ అందరూ చెన్నై వస్తుంటారు. అలాగే తన పాట రికార్డింగ్ కోసం చెన్నై చేరుకున్న షాన్, ఒక ప్రైవేట్ హోటల్ లో బస చేశారు.
గురువారం తన సాంగ్ రికార్డింగ్ పూర్తయిన తర్వాత హోటల్ కు చేరుకున్న ఆమె, శుక్రవారం మరో రికార్డింగ్ ను కూడా పూర్తి చేసి, కేరళ బయలుదేరాల్సి ఉంది. ఇంతలోనే ఆమె హఠాన్మరణం చెందడం, తమిళ మళయాళ చిత్రసీమల్ని షాక్ కు గురి చేసింది. ఆమె మరణానికి గల కారణాలు ఇంకా తెలియనప్పటికీ, గుండెపోటు కారణంగానే ఆవిడ మరణించి ఉండవచ్చని అభిప్రాయపడుతున్నారు. షాన్ తండ్రి జాన్సన్ ప్రముఖ మళయాళ సంగీత దర్శకుడు. తన సంగీతానికి జాతీయ అవార్డును కూడా అందుకున్నారు. 2011లో తండ్రిని, 2012లో సోదరుడ్ని పోగొట్టుకున్నారు షాన్. ఇప్పుడు ఆవిడ కూడా మరణించడంతో ఆమె తల్లి రాణి జాన్సన్ శోకసంద్రంలో మునిగిపోయారు. ఆమె మృతికి పలువురు సినీ ప్రముఖులు సంతాపం వ్యక్తం చేశారు.