TeluguOne Services
Copyright © 2000 - , TeluguOne Sahityam - All rights reserved.
మౌనం
తెలిసిపోతుంది
నిజమైన కొన్ని ప్రశ్నలకు
తికమకల్లో నిన్నుంచిన సమాధానాలకు
అవకతవకల ఆప్యాయతల అబద్ధాలను
తిప్పికొట్టే "ఆయుధమే" అదని!
అదను చూసి
కదం తొక్కే పరిహాసాల
పరంజాలను కూల్చి
నిన్ను నీలోకి చూపే
నీదైన స్వార్ధమే ఇదని!
జ్ఞాపకాల అజీర్తికి
అసలైన ఔషధమని
ఔననీ,కాదనీ చెప్పక
దోబూచులాడినా...
పరిచయాల మాటున
చీకటి,వెలుగుల వర్తమానాన్ని
దాహార్తి తీరేలా
నువ్వు తాగే రేయిలో..
నిలబడి
కలబడి
నిలుస్తుందో 'పదం'
నాకై నన్నాదరించిన
మౌనమనే అద్భుతం!
మౌనమే దివ్యౌషధం...
కాలం చేసిన గాయాలకు
రేయి పగటితో తీసిన ఈ రాగాలకు
నే ఓలలాడుతున్న నీ గారాలకు!!
- Raghu Alla