గ్రేటర్‌లో కమ్మ ఓటర్లు టీఆర్‌ఎస్ వైపే?   ‘అమరావతి’పై ‘కమలం’ కప్పగంతులే కారణమట   గ్రేటర్ హైదరాబాద్ మున్సిపల్ కార్పొరేషన్ ఎన్నికల్లో కమ్మ సామాజిక వర్గం, మరోసారి టీఆర్‌ఎస్ ‘కారు’ వైపే  చూస్తోందా? నగరంలోని కమ్మ వర్గ పెద్దలు, వివిధ పార్టీల్లో ఉన్న ఆ సామాజిక వర్గ నేతలు చెబుతున్న విశ్లేషణ ప్రకారం.. పలు నియోజకవర్గాల్లో నిర్ణయాత్మక శక్తిగా ఉన్న కమ్మ సామాజికవర్గం, రానున్న గ్రేటర్ ఎన్నికల్లో టీఆర్‌ఎస్‌కే మళ్లీ పట్టం కట్టేందుకు సిద్ధమవుతున్నట్లు తెలుస్తోంది. బీజేపీ, కాంగ్రెస్, టీడీపీ కూడా కమ్మ వర్గానికి నాలుగు సీట్లు ఇచ్చినా.. ఆ కులం ఓటర్లు మాత్రం కారు ఎక్కేందుకే ఆసక్తి ప్రదర్శిస్తుండటం విశేషం.   కమ్మ వర్గం స్వాభావికంగా టీడీపీకి, సంప్రదాయ ఓటు బ్యాంకుగా దశాబ్దాల నుంచి కొనసాగుతోందన్నది బహిరంగమే. దాని పలితంగానే ఉమ్మడి రాష్ట్రంలో, నగరంలోని శేరిలింగంపల్లి, సనత్‌నగర్, కూకట్‌పల్లి, ఎల్బీనగర్, ఉప్పల్, మల్కాజిగిరి, రాజేంద్రనగర్, కుత్బుల్లాపూర్ వంటి నియోజకవర్గాల్లో టీడీపీ విజయం సాధించగలిగింది. అక్కడ సెటిలర్ల సంఖ్య ఎక్కువయినప్పటికీ, వారిలో కమ్మ వారి హవానే ఎక్కువ కావడం దానికి మరో ప్రధాన కారణం.   రాష్ట్ర  విభజన తర్వాత కూడా... నగరంలో టీడీపీ చెప్పుకోదగ్గ ఫలితాలే సాధించింది. అయితే, చంద్రబాబునాయుడు తెలంగాణపై దృష్టిసారించకపోవడంతో,  ఉన్న ఎమ్మెల్యేలంతా టీఆర్‌ఎస్‌లో చేరారు. పోనీ ఆ తర్వాత కూడా బాబు మేల్కొనకపోవడంతో, ద్వితీయ శ్రేణి నేతలు కూడా పార్టీని వీడారు. ఇప్పుడు మొత్తం 150 డివిజన్లలో 90 డివిజన్లకే పోటీ చేస్తుందంటే, ఆ పార్టీ పరిస్థితి ఎంత దయనీయంగా ఉందో అర్ధం చేసుకోవచ్చు. ఇప్పటికీ, ఎన్టీఆర్ హయాం నుంచి పనిచేస్తున్న నేతలు మాత్రమే టీడీపీలో కొనసాగుతుండగా, వారిలో కమ్మవారే ఎక్కువ. ఇతర పార్టీల్లో అవకాశం లేక, ఉన్నా అక్కడి వాతావరణంలో సర్దుకోలేక, విధిలేక టీడీపీలోనే కొనసాగుతున్న పరిస్థితి. నిజానికి ఈ ఎన్నికల్లో అంతమంది అభ్యర్ధులను వెతికి నామినేషన్లు వేయించడం.. టీడీపీ సీనియర్ నేత, ఆ పార్టీ నగర అధ్యక్షుడు పిన్నమనేని సాయిబాబా నాయకత్వ ప్రతిభ, పొలిట్‌బ్యూరో సభ్యుడయిన అరవిందకుమార్‌గౌడ్ పర్యవేక్షణ ఫలితమని చెప్పకతప్పదు.   అయితే, టీడీపీకి సంప్రదాయ మద్దతుదారుగా ఉన్న కమ్మవారికి.. ఈ ఎన్నికల్లో కేవలం 6 సీట్లు మాత్రమే ఇచ్చారంటే, టీడీపీని కమ్మ వారు ఎంత వేగంగా వీడిపోతున్నారో స్పష్టమవుతోంది. శేరిలింగంపల్లి, కూకట్‌పల్లి, కుత్బుల్లాపూర్, సనత్‌నగర్, ఉప్పల్, ఎల్బీనగర్ నియోజకవర్గాల్లో విజయాన్ని నిర్దేశించే స్థాయిలో ఉన్నప్పటికీ, కమ్మ వర్గ నేతలు.. టీడీపీ వైపు కాకుండా టీఆర్‌ఎస్-బీజేపీ వైపు చూడటం ఆశ్చర్యం. ఈ ఎన్నికల్లో టీఆర్‌ఎస్ 4, బీజేపీ 4, కాంగెస్ 2, టీడీపీ 6 సీట్లు కమ్మ వర్గానికి ఇవ్వడం విశేషం. అంటే కమ్మ వర్గం మాసికంగా టీడీపీని అభిమానిస్తున్నప్పటికీ, రాజకీయంగా ఇతర పార్టీల వైపు చూస్తుందని స్పష్టమవుతోంది. సనత్‌నగర్‌లో మంత్రి తలసాని శ్రీనివాసయాదవ్, కూకట్‌పల్లిలో టీఆర్‌ఎస్ ఎమ్మెల్యే మాధవరం కృష్ణారావు స్థానికంగా తమ నియోజకవర్గాల్లో కమ్మ వారితో తొలి నుంచీ కలసి ఉండటం ప్రస్తావనార్హం.   సహజంగా కమ్మవర్గం మిగిలిన కులాలకంటే ఒక తరం ముందు ఆలోచిస్తుంది. ఎవరితోనూ గొడవ పడకుండా, తమ వ్యాపారాలేవో తాము చేసుకునే తత్వం దాని సొంతం. ఏ ప్రభుత్వంలో ఉన్నా కావలసినవి ఇచ్చి, పనులు చేయించుకోవడం వారి ప్రత్యేకత. ఉమ్మడి రాష్ట్రంలో చంద్రబాబు చుట్టూ చేరిన కమ్మ వ్యాపారులు, వైఎస్ సీఎం అయిన వెంటనే ఆయన చుట్టూ చేరిపోయారు. ఆ తర్వాత వచ్చిన సీఎంల చుట్టూ కూడా వారే కనిపించేవారు. జగన్ కంపెనీల్లో ఎక్కువ పెట్టుబడులు పెట్టిన వారిలో కూడా కమ్మ వ్యాపారులే ఎక్కువ. అంటే వ్యాపారం వారి రక్తంలో ఒక భాగమన్నది తెలిసిందే.   ఎక్కడ.. ఏది లాభం అనుకుంటే,  అటే అడుగులేసే తెలివైన కులంగా పేరుంది. లాభనష్టాల బేరీజు.. ఇతరులను వాడుకోవడంలో,  కమ్మ వర్గ నైపుణ్యం ముందు ఎవరూ సరిరారన్నది బహిరంగ రహస్యం. ప్రతిదీ వ్యాపారకోణంలో ఆలోచించే కమ్మ వర్గానికి, ఇతర సామాజికవర్గం నుంచి సహకారం-మద్దతు లభించడం కష్టం. ఇతరులతో కలిసి నడిచే అలవాటు తొలి నుంచీ ఆ వర్గానికి లేదు. ఈ వ్యాపారతత్వం కృష్ణా జిల్లాలో.. బ్రాహ్మణ-వైశ్యులతో సహా, కుల-మతాలకు అతీతంగా అలవాటుకావటం మరో విశేషం. కృష్ణా జిల్లాకు చెందిన ప్రతి కులం-మతంలో, వ్యాపారధోరణి స్పష్టంగా కనిపిస్తుంటుంది. అది వేరే విషయం.   సహజంగా కష్టపడి పనిచేసే మనస్తత్వం, డబ్బు సంపాదన మెళకువల్లో నిష్ణాతులైన కమ్మ వర్గం.. ఆ ధ్యాసలో పడి, ఇతర సామాజికవర్గాల సహకారం తమకు అవసరం లేదని భావిస్తుంటుంది. కమ్మ సామాజికవర్గం దేనినయినా వదులుకునేందుకు సిద్ధంగా ఉంటుంది కానీ,  డబ్బును పోగొట్టుకునేందుకు మాత్రం  సిద్ధంగా ఉండదన్న సామెత వినిపిస్తుంటుంది. అందుకే.. రెడ్డి, వెలమ వర్గాలతో పోలిస్తే, కమ్మ వర్గానికి ఉండే ఇతర వర్గాల దన్ను బహు తక్కువ. ఇన్ని లక్షణాలున్న కమ్మవర్గం.. ఇతరుల సొమ్ముకు ఆశపడకుండా, కష్టపడి వ్యాపారాల్లోనే సంపాదించడంపైనే ఎక్కువ దృష్టి సారిస్తుందన్నది కూడా అంతే నిజం.   ఇప్పుడు హైదరాబాద్‌లో దశాబ్దాల నుంచి స్థిరపడిన కమ్మ వర్గం, ఇదే ధోరణిలో టీఆర్‌ఎస్‌కు మద్దతుదారుగా మారటం గమనార్హం. గత గ్రేటర్ ఎన్నికల్లోనూ ఈ వర్గం టీఆర్‌ఎస్‌కే జై కొట్టింది. చంద్రబాబు ఇక్కడి నుంచి వెళ్లినందున, తమ రక్షణ కోసమే వారు ఆ నిర్ణయం తీసుకున్నట్లు కనిపించింది. అసెంబ్లీ ఎన్నికల్లోనూ అదే తీరు కొనసాగించింది. చంద్రబాబు హైదరాబాద్‌లో పార్టీని వదిలేయడంతో, కమ్మ వర్గం తమకు టీఆర్‌ఎస్ ఒక్కటే  సురక్షితమైన పార్టీగా ఎంచుకున్నారు. దాని ఫలితమే సెటిలర్లు ఉండే నియోజకవర్గాల్లో ఆ పార్టీ గెలుపు. ఇప్పుడు ఆ వర్గం నేతలు బీజేపీలో చేరినా, కమ్మ ఓటర్లు మాత్రం కారు ఎక్కేందుకే ఇష్టపడుతున్నట్లు కనిపిస్తోంది.   ఇక ఇతర పార్టీల్లో స్థానిక అంశాల కారణంగా చోటు లభించక కొందరు.. ఆయా పార్టీల్లో ఇమడలేని మరికొందరు కమ్మ వర్గ నేతలు మాత్రమే, ప్రస్తుతం టీడీపీలో కొనసాగుతున్నారు. గత గ్రేటర్ ఎన్నికల్లో కమ్మ వర్గ ప్రాధాన్యతను గుర్తించిన టీఆర్‌ఎస్, ఆ వర్గ నేతలకు సీట్లిచ్చింది. కూకట్‌పల్లి అసెంబ్లీ ఎన్నికల సమయంలో.. చంద్రబాబుకు అత్యంత సన్నిహితుడైన కొమ్మినేని వికాస్ ఇంటికి స్వయంగా కేటీఆర్ వెళ్లి, కేసీఆర్ వద్దకు తీసుకువెళ్లి, వికాస్ సహకారం కోరారు. ఆ తర్వాత శేరిలింగంపల్లి, జూబ్లీహిల్స్‌తోపాటు, ఖమ్మం జిల్లాలో కూడా కమ్మ వర్గ నేతలకే టీఆర్‌ఎస్ ఎమ్మెల్యే సీట్లిచ్చింది. పువ్వాడకు క్యాబినెట్‌లో చోటు కూడా ఇచ్చింది.  తాజా గ్రేటర్ ఎన్నికల్లో కూడా కమ్మ వర్గం చూపు, టీఆర్‌ఎస్ వైపే కనిపిస్తోంది. మంత్రి పువ్వాడ అజయ్ నివాసంలో.. కమ్మ వర్గ ఎమ్మెల్యేలు భేటీ అయి, నగరంలోని కమ్మ ప్రముఖులతో భేటీ కావాలని నిర్ణయించుకున్నారట.   ఇదిలాఉండగా... నగరంలో కమ్మ వర్గంతోపాటు, సెటిలర్ల అభిప్రాయాలపై తాము వివిధ నియోజకవర్గాల్లోని, ఆయా వర్గాల వారితో ముచ్చటించడం జరిగింది.  ఆ ప్రకారంగా... నిజానికి సెటిలర్లలో ఎక్కువ శాతం ఈసారి బీజేపీకి ఓటు వేయాలన్న ధోరణిలో ఉన్నట్లు కనిపించింది. కానీ ఏపీలో,  అమరావతి అంశానికి బీజేపీ మద్దతు ఇవ్వని కారణంగా.. ఆ పార్టీకి బదులు, గతంలో మాదిరిగానే ఈసారి కూడా టీఆర్‌ఎస్ మద్దతునివ్వాలని నిర్ణయించుకున్నట్లు, వారి మాటల్లో స్పష్పమయింది. ఈ విషయంలో వారి వాదన-వైఖరి విచిత్రంగా అనిపించింది. అమరావతికి అడ్డంకులు సృష్టిస్తున్న ఏపీ సీఎం జగన్... తెలంగాణ సీఎం కేసీఆర్‌తో సఖ్యతగానే ఉన్నారు. అయితే, జగన్‌తో దోస్తానా చేస్తున్న కేసీఆర్‌పై కరుణ.. కేసీఆర్ మద్దతునిస్తున్న జగన్‌పై కోపం ప్రదర్శించడమే విచిత్రం. -మార్తి సుబ్రహ్మణ్యం
తెలంగాణ బీజేపీ రెండు వర్గాలుగా విడిపోయిందా? జనసేనతో పొత్తు కొందరికి ఇష్టం లేదా? పవన్ తో చర్చలకు ఆయన ఎందుకు వెళ్లలేదు? గ్రేటర్ ఎన్నికల వేడి రోజురోజుకు పెరుగుతుండగా బీజేపీలో పరిణామాలు ఆసక్తిగా మారుతున్నాయి. గ్రేటర్ ఎన్నికల కార్యాచరణ విషయంలో తెలంగాణ బీజేపీ నేతలు రెండు వర్గాలుగా విడిపోయారని ప్రచారం జరుగుతోంది. ముఖ్యంగా జనసేన పొత్తు విషయంలో పార్టీ చీఫ్ బండి సంజయ్, కేంద్ర మంత్రి కిషన్ రెడ్డి మధ్య విభేదాలు ఉన్నట్లు తెలుస్తోంది. గ్రేటర్ ఎన్నికల్లో జనసేనతో కలిసి పోటీ చేయడంపై బండి సంజయ్ ఓ అభిప్రాయంతో ఉండగా కిషన్ రెడ్డి అందుకు భిన్నంగా వ్యవహరించారనే చర్చ బీజేపీలో జరుగుతోంది. కిషన్ రెడ్డి, బండి సంజయ్ మధ్య సఖ్యత లేదని. నగర సీనియర్ నేతలు కూడా రెండు వర్గాలుగా విడిపోయారని చెబుతున్నారు. జనసేనతో పొత్తు విషయంలో బండి సంజయ్ కు ఇష్టం లేకున్నా కిషన్ రెడ్డి చొరవ తీసుకుని పవన్ కల్యాణ్ తో మాట్లాడరనే చర్చ జరుగుతోంది. ఎందుకంటే శుక్రవారం రోజంతా హైదరాబాద్ లోనే  ఉన్నారు బండి సంజయ్. కాంగ్రెస్ మాజీ నేత సర్వే సత్యనారాయణ ఇంటికి వెళ్లి ఆయన్ను బీజేపీలోకి ఆహ్వానించారు. మరికొందరు నేతలతోనూ సంజయ్ మంత్రాంగం జరిపారని చెబుతున్నారు. హైదరాబాద్ లోనే ఉన్నా పవన్ కల్యాణ్ తో చర్చలకు సంజయ్ వెళ్లకపోవడం చర్చనీయాంశంగా మారింది. జనసేనతో పొత్తు ఇష్టం లేదు కాబట్టే.. పవన్ దగ్గరకు బండి వెళ్లలేదని చెబుతున్నారు. అంధ్రా పార్టీగా ముద్రపడిన జనసేనతో పొత్తు పెట్టుకుంటే గ్రేటర్ లో పార్టీకి నష్టం జరిగే అవకాశం ఉందని కూడా కొందరు బీజేపీ నేతలు ఆందోళన పడుతున్నారని తెలుస్తోంది. అందుకే బండి సంజయ్ జనసేన విషయంలో పెద్దగా ఆసక్తి చూపలేదని చెబుతున్నారు.  జీహెచ్ఎంసీ ఎన్నికలకు సంబంధించి బీజేపీ, జనసేన పొత్తుపై మొదటి నుంచి తీవ్ర గందరగోళం నడిచింది. సొంతంగానే పోటీ చేస్తామని ప్రకటించిన పవన్ కల్యాణ్ ..అభ్యర్థుల ఎంపిక కోసం కసరత్తు  చేస్తున్నామని చెప్పారు. గ్రేటర్ లో పోటీ చేయడానికి భారీగా దరఖాస్తులు వస్తున్నాయని తెలిపిన జనసేన.. పార్టీ కార్యాలయంలో హెల్ప్ డెస్క్ కూడా ఏర్పాటు చేసింది. సొంతంగానే పోటీ చేస్తామని బయటికి చెబుతూనే... బీజేపీతో పొత్తుకు జనసేన నేతలు ప్రయత్నించారని తెలుస్తోంది. అయితే జనసేనతో పొత్తుకు బీజేపీ ఆసక్తి చూపలేదు. జనసేనతో పొత్తు పెట్టుకుంటే వారికి కొన్ని డివిజన్లు ఇవ్వాల్సి వస్తుందని. దాంతో పార్టీలో అసంతృప్తి వస్తుందని తెలంగాణ బీజేపీ చీఫ్ బండి సంజయ్ భావించారట. అందుకే గ్రేటర్ ఎన్నికల్లో తమకు ఎవరితోనూ పొత్తు లేదని ఆయన ప్రకటించారు. అంతేకాదు జనసేనతో పొత్తు ఏపీ వరకే పరిమితమని కూడా స్పష్టం చేశారు. సంజయ్ ప్రకటన తర్వాత కూడా గురువారం జనసేన నుంచి మరో ప్రకటన వచ్చింది. గ్రేటర్ ఎన్నికలపై  పవన్ తో మాట్లాడేందుకు బండి సంజయ్ వస్తున్నారని ప్రకటించింది. జనసేన లేఖపై మరోసారి స్పందించిన బండి సంజయ్.. జనసేనతో పొత్తు సమస్యే లేదని తేల్చి చెప్పారు.  బండి సంజయ్ పొత్తు లేదని రెండోసారి స్పష్టం చేయడంతో జనసేన ఒంటరిగానే పోటీ చేస్తుందని భావించారు. అయితే శుక్రవారం మళ్లీ పొలిటికల్ సీన్ మారిపోయింది. జనసేన పొత్తు మేటర్ లోకి కేంద్రమంత్రి కిషన్ రెడ్డి ఎంటరయ్యారు. పార్టీ మరో ముఖ్య నేత లక్ష్మణ్ తో కలిసి వెళ్లి ఆయన పవన్ కల్యాణ్ తో చర్చలు జరిపారు. జనసేన పోటీ చేయకుండా బీజేపీకి మద్దతిచ్చేలా పవన్ ను ఒప్పించారు. కిషన్ రెడ్డి తో సమావేశం తర్వాత గ్రేటర్ ఎన్నికల్లో జనసేన పోటీ చేయడం లేదని అధికారికంగా ప్రకటించారు జనసేన చీఫ్. జీహెచ్ఎంసీ ఎన్నికల్లో బీజేపీకి జనసేన పార్టీ సంపూర్ణ మద్దతు ఉంటుందని ప్రకటించారు. బండి సంజయ్, కిషన్ రెడ్డిల తీరుతో బీజేపీలో కన్ఫ్యూజన్ నెలకొన్నదని చెబుతున్నారు. టికెట్ల ఎంపికలోనూ సంజయ్, కిషన్ రెడ్డి వర్గాల మధ్య గొడవలు జరిగాయంటున్నారు. బంజారాహిల్స్, కూకట్ పల్లి ప్రాంత నేతలు కొందరు కిషన్ రెడ్డిపై బహరంగంగానే తీవ్ర ఆరోపణలు చేశారు.  గ్రేటర్ హైదరాబాద్ ఎన్నికల్లో బీజేపీ దూకుడు మీద ఉన్నట్లు కనిపిస్తోంది. దుబ్బాక ఉప ఎన్నిక విజయంతో జీహెచ్ఎంసీలోనూ పాగా వేస్తామనే ధీమా కమలనాధుల్లో పెరిగిందని చెబుతున్నారు. గ్రేటర్ పరిధిలో బీజేపీలోకి జోరుగా వలసలు కొనసాగుతున్నాయి. నగర కాంగ్రెస్ లోని కొందరు ముఖ్య నేతలు, టీఆర్ఎస్ సిట్టింగ్ కార్పొరేటర్లు కూడా కమలం గూటికి చేరారు. గ్రేటర్ ఎన్నికల్లో బీజేపీ నుంచి  పోటీ  చేసేందుకు నేతలు పోటీ పడ్డారు. ఒక్కో డివిజన్ నుంచి 10 నుంచి 10 మంది టికెట్ కోసం పోటీ పడ్డారని బీజేపీ నేతలు చెబుతున్నారు. గ్రేటర్ లో దాఖలైన నామినేషన్లలోనూ అధికార టీఆర్ఎస్ కంటే బీజేపీ పేరుతో వేసినవే ఎక్కువగా ఉన్నాయి. ఇంత వరకు  బాగానే రాష్ట్ర బీజేపీ ముఖ్య నేతల తీరే గందరగోళంగా మారిందని తెలుస్తోంది. ముఖ్య నేతల తీరుతో గ్రేటర్ ఎన్నికల్లో పార్టీకి నష్టం కలగవచ్చనే ఆందోళన కమలం కేడర్ లో కనిపిస్తోంది.
​దేశంలో గుణాత్మక మార్పు రావాలి.. బీజేపీ, కాంగ్రెస్‌ దొందూ దొందే.. ఆ పార్టీల వల్లే దేశం ఆగమైంది.. జాతీయ స్థాయిలో బీజేపీ, కాంగ్రెస్ కు వ్యతిరేకంగా అన్ని పార్టీలను ఏకం చేస్తా.. ఇవి తెలంగాణ ముఖ్యమంత్రి, తెలంగాణ రాష్ట్ర సమితి పార్టీ అధినేత కేసీఆర్ గత రెండేండ్లుగా చెబుతున్న మాటలు. ఎన్నికల సమయాల్లోనూ, తనకు ఇబ్బందికర పరిస్థితులు వచ్చినపుడే, బీజేపీ, కాంగ్రెస్ లపై ఈ తరహా కామెంట్లు చేస్తూ వచ్చారు కేసీఆర్. ఇంకా చేస్తూనే ఉన్నారు. తాజాగా గ్రేటర్ హైదరాబాద్ ఎన్నికల వేళ మరోసారి అవే వ్యాఖ్యలు చేశారు గులాబీ బాస్. బీజేపీని టార్గెట్ చేస్తూ జాతీయ రాజకీయాలపై మాట్లాడారు. కేంద్ర ప్రభుత్వ ప్రజా, రైతు, కార్మిక వ్యతిరేక విధానాలపై దేశవ్యాప్త పోరాటానికి టీఆర్ఎస్ సన్నద్ధమవుతోందని తెలిపారు. చాలా మంది ప్రాంతీయ నేతలతో మాట్లాడానని చెప్పారు కేసీఆర్.    జాతీయ రాజకీయాలపై కేసీఆర్ చేసిన తాజా ప్రకటనపై జనాల్లో ఆసక్తికర చర్చ జరుగుతోంది. రెండేండ్ల నుంచి చెబుతున్న మాటలే మళ్లీ చెప్పారనే అభిప్రాయమే వ్యక్తమవుతోంది. 2018లో అసెంబ్లీ ఎన్నికల్లో గెలవగానే జాతీయ పార్టీలపై ఓ రేంజ్ లో ఫైరయ్యారు కేసీఆర్. బీజేపీ, కాంగ్రెస్ వల్లే దేశం అభివృద్దికి నోచుకోలేదని ఆరోపించారు. ఈ రెండు పార్టీలు దేశానికి అరిష్టమంటూ ఘాటు వ్యాఖ్యలు చేశారు. బీజేపీ, కాంగ్రెస్ కు వ్యతిరేకంగా ఫెడరల్ ఫ్రంట్ ఏర్పాటు చేస్తామని తెలిపారు. అంతేకాదు త్వరలోనే ఢిల్లీ వెళ్తునున్నానని కూడా చెప్పారు గులాబీ బాస్. భువనేశ్వర్ వెళ్లి ఒడిశా ముఖ్యమంత్రితో మాట్లాడారు. చెన్నె వెళ్లి స్టాలిన్ తో సమావేశమయ్యారు. కోల్ కతా వెళ్లి బెంగాల్ ముఖ్యమంత్రి మమతా బెనర్డీతోనూ మంత్రాగం చేశారు. లక్నో వెళ్లి ఎస్పీ అధినేత అఖిలేష్ యాదవ్, బీఎస్పీ చీఫ్ మాయావతిని కలిశారు. దీంతో ఫెడరల్ ఫ్రంట్ పై కేసీఆర్ సీరియస్ గా వర్కవుట్ చేస్తున్నారనే అభిప్రాయం వచ్చింది.    తర్వాత ఏమైందో ఏమోకాని తుస్సుమనిపించారు కేసీఆర్. ఫెడరల్ ఫ్రంట్ మాట కూడా మర్చిపోయారు. అప్పటి నుంచి ఇంతవరకు ఆయన ఢిల్లీ వెళ్లింది లేదు.. ఫెడరల్ ఫ్రంట్ వచ్చింది లేదు. గత లోక్ సభ ఎన్నికల్లో బీజేపీకి సంపూర్ణ మెజార్టీ రావడంతో ఢిల్లీకి వెళ్లినా చేసేది ఏమి లేదని భావించిన కేసీఆర్ సైలెంట్ అయ్యారని చెబుతున్నారు. బీజేపీకి సంపూర్ణ మెజార్టీ రాకపోతే.. ప్రాంతీయ పార్టీలతో కలిసి హడావుడి చేయాలని చూశారని, మోడీ ప్రభంజనం వీచడంతో కేసీఆర్ ఆశలు ఆవిరయ్యాయనే ప్రచారం జరిగింది. కేసీఆర్ ఫెడరల్ ప్రంట్ ఏర్పాట్లకు సంబందించి మరో ప్రచారం కూడా జరిగింది. ఎన్డీఏ నుంచి బయటికొచ్చిన టీడీపీ అధినేత,అప్పటి ఏపీ ముఖ్యమంత్రి చంద్రబాబు బీజేపీకి వ్యతిరేకంగా దేశ వ్యాప్తంగా ప్రచారం చేశారు. బీజేపీపై ఆయన తీవ్ర స్థాయిలో ఆరోపణలు చేశారు. ఢిల్లీలో కేజ్రీవాల్ , కోల్ కతాల్లో మమతా బెనర్జీలు నిరసనకు దిగితే అక్కడికి వెళ్లి వారికి మద్దతు తెలిపారు. చంద్రబాబు దూకుడుతో లోక్ సభ ఎన్నికల తర్వాత జాతీయ రాజకీయాల్లో ఆయనే చక్రం తిప్పబోతున్నారనే ప్రచారం జరిగింది. చంద్రబాబుకు జాతీయ స్థాయిలో వస్తున్న క్రేజీని జీర్ణించుకోలేకే.. ఆయనకు పోటీగా కేసీఆర్ ఫెడరల్ ఫ్రంట్ ప్రస్తావన తెరపైకి తెచ్చారని కొందరు రాజకీయ విశ్లేషకులు చెబుతున్నారు.    గత ఆగస్టులో మరోసారి జాతీయ రాజకీయాల ప్రస్తావన తెచ్చారు కేసీఆర్. మోడీ సర్కార్ రైతు వ్యతిరేక విధానాలకు వ్యతిరేకంగా దేశ వ్యాప్తంగా ఉద్యమానికి ప్లాన్ చేస్తున్నానని చెప్పారు. హైదరాబాద్ లోనే విపక్ష పార్టీలతో సమావేశం పెట్టబోతున్నానని, అన్ని ప్రాంతీయ పార్టీ నేతలను ఆహ్వానిస్తానని చెప్పారు. అప్పుడు కూడా కేసీఆర్ ఢిల్లీకి  వెళ్తారేమోనని జనాలు భావించారు. కేటీఆర్ కు ముఖ్యమంత్రి పగ్గాలు అప్పగించి ఢిల్లీకి వెళ్లేందుకు కేసీఆర్ సిద్ధమవుతున్నారనే చర్చ కూడా జోరుగా జరిగింది. కాని అప్పుడు కూడా కేసీఆర్ మాటలు గాలి మాటలుగానే మిగిలిపోయాయి. హైదరాబాద్ లో సమావేశం జరగలేదు.. ఏ పార్టీ నేత వచ్చి కేసీఆర్ ను కలవలేదు. టీఆర్ఎస్ అధినేత కూడా ఏ లీడర్ తోనూ మాట్లాడలేదు. కనీసం ఫోన్ లో కూడా కేసీఆర్ ఏ ప్రాంతీయ పార్టీ నేతతోనూ మాట్లాడినట్లు కనిపించ లేదు. జీఎస్టీ బకాయిలను కేంద్రం విడుదల చేయడం లేదంటూ లేఖలు రాసి సెప్టెంబర్ లో మరోసారి హడావుడి చేశారు కేసీఆర్. కేంద్రం తీరుకు నిరసనగా ప్రాంతీయ పార్టీలు అధికారంలో ఉన్న రాష్ట్రాల ఆర్థికమంత్రులతో సమావేశం పెడతామని కూడా ప్రకటించారు. కాని అది కూడా జరగలేదు.    తాజాగా పార్టీ నేతలతో నిర్వహించిన గ్రేటర్ ఎన్నికల సన్నద్దత సమావేశంలో జాతీయ రాజకీయాలపై మాట్లాడారు కేటీఆర్. కేంద్రంలోని నరేంద్రమోడీ ప్రభుత్వం గత ఆరున్నరేళ్లలో దేశానికి చేసిందేమీ లేదని, తప్పుడు ప్రచారాలతో, తప్పుడు విధానాలతో దేశాన్ని తిరోగమనం వైపు నెట్టిందని కేసీఆర్‌ విమర్శించారు. బీజేపీ, కాంగ్రెస్‌ దొందూ దొందేనని, బడేభాయ్‌ వెంట చోటే భాయ్‌ అన్నట్లు దేశాన్ని సరైన దిశ చూపెట్టడంలో విఫలం అయ్యాయన్నారు. ఆ రెండు మూస పార్టీల నుంచి దేశానికి విముక్తి కావాలని, అందుకు  హైదరాబాద్‌ నుంచే యుద్ధం ప్రకటిస్తామన్నారు. దేశంలోని ఇతర ప్రతిపక్షాలన్నింటినీ ఒక్క తాటిపై నిలిపేందుకు  ప్రయత్నాలు చేస్తున్నామని  చెప్పారు. ఇప్పటికే పశ్చిమబెంగాల్‌ ముఖ్యమంత్రి మమతా బెనర్జీ, కేరళ సీఎం విజయన్‌, ఢిల్లీ ముఖ్యమంత్రి కేజ్రీవాల్‌, ఒడిశా సీఎం నవీన్‌ పట్నాయక్‌, డీఎంకే నేత స్టాలిన్‌, ఉత్తర్‌ప్రదేశ్‌, మహారాష్ట్ర, పంజాబ్‌, కర్ణాటక మాజీ ముఖ్యమంత్రులు అఖిలేశ్‌ యాదవ్‌, శరద్‌పవార్‌, ప్రకాశ్‌సింగ్‌ బాదల్‌, కుమారస్వామి, సీపీఐ, సీపీఎం నాయకులతో మాట్లాడానని తెలిపారు. డిసెంబరు రెండోవారంలో హైదరాబాద్‌లో సమావేశం నిర్వహించి దేశవ్యాప్త ఉద్యమం గురించి చర్చిస్తామన్నారు కేసీఆర్.    కేసీఆర్ తాజా ప్రకటనకు ఇటీవల జరిగిన దుబ్బాక ఉప ఎన్నికలో బీజేపీ గెలవడం, గ్రేటర్ హైదరాబాద్ ఎన్నికల్లోనూ బీజేపీ తమకు గట్టి పోటీ ఇస్తుండటంతో కారణమనే చర్చ జరుగుతోంది. తెలంగాణలో బీజేపీ బలమైన శక్తిగా ఎదగడంతో.. ఆ పార్టీని టార్గెట్ చేస్తున్నారని చెబుతున్నారు. జీహెచ్ఎంసీలో గెలిచేందుకు ఇలా ఎత్తులు వేస్తున్నారని, గ్రేటర్ ఎన్నికలు ముగియగానే జాతీయ రాజకీయాలపై మళ్లీ కేసీఆర్ మాట్లాడరని చెబుతున్నారు. ఫెడరల్ ఫ్రంట్ పై కేసీఆర్ కు నిజంగా చిత్తశుద్ది ఉంటే ఎప్పుడో ఆ పని చేసేవారంటున్నారు. కేంద్రం తీసుకువచ్చిన వ్యవసాయ చట్టాలపై ఉద్యమం చేస్తానంటున్న కేసీఆర్.. ఆ బిల్లులు పార్లమెంట్ ముందుకు వచ్చిన సమయంలో ఆ పని ఎందుకు చేయలేదనే ప్రశ్న ప్రజల నుంచి వస్తోంది. కేంద్రం తీసుకువచ్చిన మెజార్టీ బిల్లులకు మద్దతు ఇచ్చిన టీఆర్ఎస్.. ఇప్పుడు కేంద్రం ఏం చేయడం లేదని విమర్సిండంలో అర్ధం లేదంటున్నారు. కేసీఆర్ జాతీయ రాజకీయాలపై చేస్తున్న ప్రటనకను ఎవరూ సీరియస్ గా తీసుకోవడం లేదని పొలిటికల్ అనలిస్టులు చెబుతున్నారు.
విశాఖ పీఠం, టీటీడీ కేసుపై పెదవి విప్పరేం?   చావులో విషాదం చూస్తాం. గుండెలోతుల్లో దాగున్న బడబాగ్ని చూస్తాం. ఆ కుటుంబాలు పడే వేదన- ఆవేదన-ఆర్తి చూస్తాం. ఎందుకంటే మనం మనుషులం కాబట్టి. ఎంత కఠిన పాషాణ  హృదయులకయినా, మానవత్వం అనేది ఉంటుంది. అందుకే మనసున్న మనుషులెవరూ చావును విషాదంగానే భావిస్తారు. కానీ ఏపీ బీజేపీ అధ్యక్షుడు సోము వీర్రాజు మాత్రం దీనికి భిన్నం. మరణంలోనూ మతాన్ని దర్శించే మహా రాజకీయ దార్శనికుడాయన. అందుకు నంద్యాలలో జరిగిన ఓ ముస్లిం కుటుంబ సామూహిక ఆత్మహత్య నిదర్శనం.   ప్రాణాలు ఎవరికి చేదు? ఎవరు మాత్రం కోరి మృత్యు ఒడిలోకి వెళతారు? ఆత్మహత్య చేసుకోవడానికి చాలా గుండె ధైర్యం కావాలి. దానికి ఎవరూ సిద్ధపడరు. చిన్న రోగం వస్తేనే హైరానా పడతారు. కరోనా వస్తే, తమ ప్రాణాలు కాపాడుకునేందుకు, పరాయి రాష్ర్టాలకు పరుగులు తీసిన మంత్రులు, ఎమ్మెల్యేలను చూస్తూనే ఉన్నాం. అదీ ప్రాణభయమంటే. కానీ ప్రాణాలు కూడా పోగొట్టుకునేందుకు ఓ చిన్న కుటుంబం సిద్ధపడిందంటే.. వారి గుండెకయిన గాయం, అతి పెద్దదయి ఉండాలి. తిన్న ఎదురుదెబ్బలతో,  మనిషి ఆత్మస్థైర్యాన్ని చంపేదంత పెద్దదయినా ఉండాలి. వ్యక్తులు, లేదా వ్యవస్థ చేతులో ఎదురయిన అవమానభారం తాలూకు,  విషాదజ్ఞాపకాలయినా అందుకు కారణమయి ఉండాలి. దీనికి కులాలు-మతాలతో సంబంధం లేదు. మరణానికి  కులం-మత ంతో పనిలేదు. మృత్యువు అందరికీ సమానమే. బీజేపీ అధ్యక్షుడు సోము వీర్రాజు, నంద్యాలలో ముస్లిం కుటుంబ సామూహిక ఆత్మహత్యానంతర పరిణామాలపై చేసిన వ్యాఖ్యలు, ఆయన ప్రాతినిధ్యం వహిస్తున్న పార్టీ మరువు-ప్రతిష్ఠను పెంచాయా? తుంచాయా అన్నది ఓసారి చూద్దాం.   నంద్యాలలో ఓ ముస్లిం కుటుంబం.. పోలీసుల వేధింపులకు నిరసనగా రైలుకింద పడి సామోహిక ఆత్మహత్య చేసుకుంది. ఆత్మహత్యకు ముందు ఆ కుటుంబం ఓ సెల్ఫీ తీసింది. తమ ఆత్మహత్యలకు కారణం ఫలానా పోలీసులే కారణమని చెప్పి, ఆత్మహత్య చేసుకుంది. అది సోషల్ మీడియాలో వైరల్ అయింది. ఫలితంగా సీఐ, హెడ్‌కానిస్టేబుల్‌పై సర్కారు కేసు పెట్టి అరెస్టు చే సి, జైలుకు పంపింది. అయితే, సరైన సెక్షన్లు నమోదుచేయకపోవడంతో,  స్థానిక కోర్టు పోలీసులకు బెయిల్ ఇచ్చింది. దానిపై ఎస్పీ స్పందించి, పోలీసులకు ఇచ్చిన బెయిల్ రద్దు చేస్తూ, పైకోర్టుకు వెళతామని చెప్పారు. ఈ విషయంలో సీఎం జగన్ కూడా వ్యక్తిగత శ్రద్ధ తీసుకుని, పోలీసుల బెయిల్ రద్దు చేయించాలని ఆదేశించారు. కేసులోని తీవ్రత-విషాదం దృష్ట్యా జగన్ సర్కారు, డీజీపీ వాయువేగంతో స్పందించడాన్ని సమాజం హర్షించింది. ఇంతవరకూ అందరికీ తెలిసిన కథే ఇది.   తాజాగా బీజేపీ చీఫ్ సోము వీర్రాజు.. ఈ వ్యవహారాన్ని మతంతో ముడిపెట్టడమే అమానవీయం. ఆత్మహత్య చేసుకున్న కుటుంబమేమీ, ఆ వ్యవహారాన్ని పబ్లిసిటీకి వాడుకోలేదు.  తమ ప్రాణాలు పణంగా పెట్టి, సెల్ఫీ తర్వాత నిజంగానే మృతువును ఆహ్వానించింది. తమ కుటుంబాన్ని వేధిస్తున్నారని బాధితులు చెప్పిన దానినే సర్కారు పరిగణనలోకి తీసుకుంది. ఆ మేరకే పోలీసులను అరెస్టు చేసింది. దాన్ని వీర్రాజు తప్పుపట్టడమే ఆశ్చర్యం. ‘‘ ముస్లింలు కోరగనే డ్యూటీలో ఉన్న పోలీసులను జగన్ అరెస్టు చేయిస్తున్నారు. పోలీసులకు టీడీపీ బెయిల్ ఇప్పించి,  చంద్రబాబు ముస్లింలను సమీకరించి ఉద్యమాలు చేయిస్తున్నారు. హిందువులెవరూ ఓటర్లు కాదు. ఆ రెండు పార్టీలకు ముస్లిం ఓట్లు చాలా? మనమెవ్వరం మనుషులం కాదా? రాష్ట్రంలో హిందువులు, ఇతర కులాలు వద్దు. ఎంత దారుణం’’ ఇదీ వీర్రాజు గారి ప్రసంగంలో దొర్లిన  ఆణిముత్యాలు. పైగా అంతర్వేది ఘటనపై మేం స్పందిస్తే,  మాది మతత్వ పార్టీ అన్న వాళ్లు.. ఇప్పుడు చేస్తున్నది ఏంటని కూడా  ప్రశ్నించారు.   అంటే సోము కవిహృదయమమేమిటంటే.. టీడీపీనే నిందితులయిన పోలీసులకు బెయిలిప్పించింది. అంటే ఆ కేసు విచారించిన కోర్టు ఎలాంటి విచారణ చేపట్టకుండా, టీడీపీ అడిగిన వెంటనే బెయిలిచ్చేసిందని అనుకోవాలా? ఇక ముస్లింలు కోరగనే జగన్ పోలీసులను అరెస్టు చేశారట. అంటే ఒక సీఎంకు అంతకుమించిన పనులేవీ లేవన్న మాట! సరే.. అంతర్వేది, టీటీడీ ఘటనలపై తామేదే పోరాటాలు చేశారని సోమన్న  చెప్పుకోవడమే వింత. నిజానికి, అంతర్వేది ఘటనలో తొలుత  స్పందించింది స్థానికులు, అగ్నికుల క్షత్రియులు మాత్రమే. ఆ తర్వాత టీడీపీ, హిందూ మహాసభ, కాంగ్రెస్ నేతలు వెళ్లారు. అప్పటికీ బీజేపీ నేతలు భూతద్దం వేసి వెతికినా కనిపించలేదు.  సినిమాలో ఫైటింగ్ సీనంతా అయ్యాక, చివరాఖరలో పోలీసులు వచ్చినట్లు,  బీజేపీ నేతలు చివరలో కనిపించారు. అంత ర్వేది కేసు సీబీఐకి అప్పచెప్పిన తర్వాత, దాని పురోగతి ఏమిటన్నది ఒక పార్టీ అధ్యక్షుడిగా ఆయన ప్రశ్నించిన పాపాన పోలేదు.   ఇక టీటీడీ వ్యవహారాలపైనా,  బీజేపీ స్వరం ఇప్పటికీ బలహీనమే. ఇప్పుడు పోయిందంటున్న శ్రీవారి  పింక్ డైమండ్ కేసు కొత్త మలుపు తిరిగింది. ఈ ఆర్నెల్లలో దాని గురించి వీర్రాజు ఎక్కడా మాట్లాడిన దాఖలాలు లేవు. విజయసాయిరెడ్డి-రమణ దీక్షితులుపై, టీటీడీ పరువునష్టం కేసు ఎందుకు ఉపసంహరించుకుందని గర్జించిన  దాఖలాలు లేవు. పింక్ డైమండును తేల్చాలని పట్టుపట్టిన సందర్భాలు లేవు.  ఇక విశాఖ పీఠాథిపతి అతిపై హిందూసమాజమే తిరగబడుతోంది. ఆయన మఠం అతిచేష్ఠలపై హిందువులే నవ్వుకుంటున్నారు. దానిపై మీడియాలో చర్చ జరుగుతుంటే, హిందూ సామ్రాజ్యాధిపతిగా భావిస్తున్న వీర్రాజు.. ఆ ఆధ్యాత్మిక తప్పిదాలపై ఎందుకు ప్రశ్నించడం లేదు? అప్ప ఆర్భాటమే గానీ బావ బతికుంది లేదన్నట్లు... ఎంత హిందూకార్డు వాడాలని ప్రయత్నించినా,‘ విషయం’ లేకపోతే..   ఏ కార్డయినా చిరునామా లేని పోస్టు కార్డులాంటిదేనంటున్నారు. ఇంతకూ... టీడీపీ ఎమ్మెల్యే పయ్యావుల కేశ వ్ అడిగినట్లు... ఈ వ్యాఖ్యలు సోము వీర్రాజు వ్యక్తిగతమా? పార్టీ పరమైనదా అన్నదే చెప్పాలి.   అన్నట్లు... మతం- మత రాజకీయాల గురించి మాట్లాడుతున్న వీరన్న వ్యాఖ్యలపై,  ఇప్పుడు ‘కులవాదులు’  కొత్త సందేహాలు వ్యక్తం చేస్తున్నారు.  నంద్యాలలో అరెస్టయిన సీఐ తమ సామాజికవర్గానికి చెందిన వారే కాబట్టి, ఆయనను రక్షించేందుకు మతం ముసుగులో..  వీర్రాజు ‘కుల రాజకీయాలు’ చేస్తున్నారన్నది కులవాదుల అనుమానం. నిజం నారాయణుడికెరుక? -మార్తి సుబ్రహ్మణ్యం
దుబ్బాక ఉప ఎన్నిక రాజేసిన కాక చల్లారకముందే తెలంగాణలో మరో ఎన్నిక హీట్ పుట్టిస్తోంది. ముందస్తుగా జరగబోతున్న గ్రేటర్ హైదరాబాద్ ఎన్నిక అన్ని పార్టీల్లోనూ సెగలు రేపుతోంది. దుబ్బాక విజయంతో జోష్ మీదున్న బీజేపీ గ్రేటర్ పై దూకుడు పెంచింది. బల్దియాపై జెండా ఎగురవేయడమే లక్ష్యంగా పావులు కదుపుతోంది. జీహెచ్ఎంసీ ఎన్నికలను వచ్చే అసెంబ్లీ సమరానికి సెమీ ఫైనల్ గా భావిస్తోంది బీజేపీ. అందుకే అన్ని శక్తులను గ్రేటర్ లో మోహరిస్తోంది. జీహెచ్ఎంసీ ఎన్నికల ఇంచార్జ్ గా  పార్టీకి జాతీయ స్థాయిలో కీలకంగా ఉన్న నేతను నియమించింది బీజేపీ. హైదరాబాదు లో అణువణువు తెలిసిన ఎంపీ గరికపాటి మోహన్ రావును రంగంలోకి దించింది.  రాష్ట్ర స్ఠాయిలోనూ సీనియర్లతో  ప్రత్యేక కమిటిని ఏర్పాటు చేసింది. గ్రేటర్ హైదరాబాద్ ఎన్నికను బీజేపీ హైకమాండ్ నేరుగా పర్యవేక్షిస్తుందని చెబుతున్నారు.దీన్ని బట్టే గ్రేటర్ ఎన్నికలపై కమలదళం ఎంత సీరియస్ గా ఉందో తెలిసిపోతోంది.     పార్టీ జాతీయ ప్రధాన కార్యదర్శిగా ఉన్న భూపేంద్రయాదవ్ ను జీహెచ్ఎంసీ ఎన్నికల ఇంచార్జీగా నియమించింది బీజేపీ. ఇదే ఇప్పుడు రాజకీయ వర్గాలను అశ్చర్యపరుస్తోంది. భూపేంద్రయాదవ్ ను బీజేపీలో ట్రబుల్ షూటర్ గా చెప్పుకుంటారు. బీజేపీలో ప్రసుతం ఆయన ప్రధాని మోడీ, అమిత్ షా, పార్టీ చీఫ్ జేపీ నడ్డా తర్వాత స్థానంలో ఉన్నారని చెబుతారు. బీజేపీ ఎన్నికల వ్యూహాలు రచించండలో దిట్ట భూపేంద్ర యాదవ్. ఇటీవల జరిగిన బీహార్ అసెంబ్లీ ఎన్నికలకు బీజేపీ ఇంచార్జ్ గా భూపేంద్రనే వ్యవహరించారు. బీహార్ లో తేజస్వి యాదవ్ సీఎం కావడం ఖాయమని మెజార్డీ ఎగ్డిట్ పోల్స్, రాజకీయ విశ్లేషకులు అంచనా వేసినా బీజేపీ కూటమే గెలిచిందంటే అందుకు భూపేంద్ర యాదవ్ వ్యూహాలే కారణమంటున్నారు. ఆయన ఎత్తుల వల్లే జేడీయూ ఆశించిన ఫలితాలు సాధించకపోయినా.. 65 శాతం సక్సెస్ రేటుతో బీజేపీ గెలవడం వల్లే బీహార్ లో ఎన్డీఏ కూటమికి మళ్లీ అధికారం దక్కిందని చెబుతున్నారు.     2019 సార్వత్రిక ఎన్నికల్లోనూ దేశవ్యాప్తంగా బీజేపీ హవా చూపడంలో  భూపేంద్ర యాదవే కీలకంగా వ్యవహరించారని కమలం నేతలు చెబుతున్నారు. అంతేకాదు కీలక రాష్ట్ర్రాల అసెంబ్లీ ఎన్నికల బాధ్యతలన్ని బీజేపీ అధినాయకత్వం భూపేంద్ర యాదవ్ కే అప్పగిస్తారని తెలుస్తోంది. బీజేపీలో ఏ సమస్యలు వచ్చినా పరిష్కార బాధ్యతలు భూపేంద్రకే ఇస్తారని కూడా చెబుతున్నారు. తనకు అప్పగించిన టాస్క్ లో ఎక్కువ సార్లు భూపేంద్ర సక్సెస్ అయ్యారని టాక్ ఉంది. జాతీయ స్థాయిలో తమ పార్టీ కీలక వ్యూహకర్తగా ఉన్న వ్యక్తిని ఒక నగరం స్థానిక ఎన్నికకు ఇంచార్జ్ గా నియమించిందంటేనే గ్రేటర్ హైదరాబాద్ పై బీజేపీ ఎంత ఫోకస్ చేసిందో ఊహించవచ్చు.   గ్రేటర్ హైదరాబాద్ ఎన్నికల్లో బీజేపీకి ఎంపీ గరికపాటి మెహన్ రావు కీలకంగా మారారు. గతంలో టీడీపీలో కీలక నేతగా ఉండి ప్రస్తుతం బీజేపీలో ఉన్న ఎంపీ గరికపాటి మోహన్ రావుకు సిటీలో చాలా పరిచయాలున్నాయి. రాజకీయంగానూ ఆయనకు బలమైన అనుచరవర్గం ఉంది. ఎలాగైనా గ్రేటర్ లో టీఆర్ఎస్ కు షాకిచ్చేందుకు ఏ ఒక్క అవకాశాన్ని వదులుకోవడానికి ఇష్టపడటం లేదు బీజేపీ. అందుకే గ్రేటర్ లో గట్టి పట్టున్న టీడీపీతో పొత్తుకు ప్రయత్నాలు చేస్తోందని చెబుతున్నారు. టీడీపీతో పొత్తు కోసం ఆ పార్టీ అధినేత చంద్రబాబుతో గరికపాటి మోహన్ రావు  రాయబారం నడుపుతున్నారని తెలుస్తోంది. బలమైన లీడర్లు లేకున్నా గ్రేటర్ లో టీడీపీకి భారీగా ఓటు బ్యాంక్ ఉంది. గ్రేటర్ ఎన్నికలకు సంబంధించి పలు సర్వేలు నిర్వహించిన సర్వేల్లోనూ టీడీపీకి 15 శాతం ఓటు బ్యాంక్ ఉందని తేలింది. అందుకే టీడీపీ పొత్తు కోసం బీజేపీ ప్రయత్నాలు చేస్తుందని చెబుతున్నారు. బీజేపీతో పొత్తుకు చంద్రబాబు అంగీకరిస్తే గ్రేటర్ పోల్ సీన్ పూర్తిగా మారిపోనుంది. ఇప్పటికే జనసేనతో పొత్తున్న బీజేపీకి టీడీపీ తోడైతే గ్రేటర్ వార్ వన్ సైడ్ అయ్యే అవకాశం ఉందంటున్నారు. బీజేపీ, టీడీపీ, జనసేన కూటమి ఈజీగానే గ్రేటర్ పీఠాన్ని కైవసం చేసుకుంటుందని రాజకీయ వర్గాలు కూడా అంచనా వేస్తున్నాయి.    గ్రేటర్ పరిధిలోని సికింద్రాబాద్ లోక్ సభ నియోజకవర్గానికి  కేంద్రమంత్రి కిషన్ రెడ్డి నాయకత్వం వహిస్తున్నా.. ఆయనపై పార్టీ హైకమాండ్ కు నమ్మకంగా లేదంటున్నారు. అందుకే కిషన్ రెడ్డిని కాదని భూపేంద్రయాదవ్ ను ఇంచార్జీగా నియమించారని, గరికపాటికి కీలక బాధ్యతలు అప్పగించారని చెబుతున్నారు. రాష్ట్రానికి చెందిన కేంద్రమంత్రి కాబట్టి.. ప్రజల్లో అనుమానాలు రాకుండా ఉండేందుకే ఆయనను ఎన్నికల కమిటి కన్వీనర్ గా నియమించారని బీజేపీ నేతలే గుసగుసలాడుకుంటున్నారు. దుబ్బాక ఉప ఎన్నిక గెలుపులోనూ కిషన్ రెడ్డికి ఏమాత్రం పాత్ర లేదంటున్నారు. కిషన్ రెడ్డి ఒంటెద్దు పోకడల వల్లే తెలంగాణలో బీజేపీ ఎదగలేదనే ఆరోపణలు పార్టీ నేతల నుంచి వస్తున్నాయి. అందుకే కిషన్ రెడ్డిని నామ్ కే వాస్తాగా కన్వీనర్ గా పెట్టి.. భూపేంద్ర, గరికపాటికి కి గ్రేటర్ ఎన్నిక బాధ్యతలను హైకమాండ్  ఇచ్చిందని చెబుతున్నారు.    23 మందితో ఏర్పాటు చేసిన గ్రేటర్ ఎన్నికల కమిటీలో పార్టీ సీనియర్లతో పాటు మంచి వ్యూహకర్తలుగా పేరున్న, ఆర్థికంగా బలంగా ఉన్న నేతలను  నియమించింది బీజేపీ. ఎంపీ గరికపాటి మోహన్ రావుతో మాజీ ఎంపీలు వివేక్, జితేందర్ రెడ్డి, మాజీ మంత్రులు డీకే అరుణ, మోత్కుపల్లి నర్సింహులు గ్రేటర్ బీజేపీ కమిటిలో ఉన్నారు. అంతేకాదు అన్ని సామాజిక వర్గాల నేతలకు అందులో చోటు కల్పించారు. ఈ కమిటి ద్వారా అన్ని రకాలుగా గ్రేటర్ ఎన్నికలకు బీజేపీ సమాయత్తమవుతున్నట్లు కనిపిస్తోంది. అలాగే  గ్రేటర్ లోని ఇతర పార్టీల నేతలకుు వల  వేస్తోంది. ఇప్పటికే బీజేపీలోకి వలసలు జోరందుకున్నాయి. ఎల్బీ నగర్ ఏరియాకు చెందిన కాంగ్రెస్ సీనియర్ నేత కొప్పుల నర్సింహరెడ్డి బీజేపీలో చేరారు. ఆయన బాటలోనే మరికొందరు నేతలు ఉన్నారని చెబుతున్నారు. మైలార్ దేవ్ పల్లి కార్పొరేటర్ ఇటీవలే బీజేపీలో చేరగా.. మరికొందరు టీఆర్ఎస్ కార్పొరేటర్లు కూడా కాషాయ కండువా కప్పుకోనున్నారని తెలుస్తోంది. కారు, కాంగ్రెస్ పార్టీలకు చెందిన కొందరు ముఖ్య నేతలు కూడా తమకు సపోర్ట్ చేయబోతున్నారని కమలం నేతలు చెబుతున్నారు.    దుబ్బాక ఫలితం తర్వాత టీఆర్ఎస్ కు బలమైన ప్రత్యర్థిగా మారిపోయింది బీజేపీ, ఇప్పుడు భూపేంద్రయాదవ్ , గరికపాటి మోహన్ రావు వంటి ఉద్దండులను ఇంచార్జులుగా నియమించి గ్రేటర్ ఎన్నికల్లోనూ అధికార పార్టీకి సవాల్ విసురుతోంది.  దీంతో ఎన్నికల వ్యూహాల్లో దిట్టమైన ఆ ఇద్దరు బాహుబలులలను టీఆర్ఎస్ ఎలా ఎదుర్కొంటుదన్నది ఆసక్తిగా మారింది. బీజేపీ బాహుబలి వ్యూహాల ముందు కారు పార్టీ చిత్తవుతుందా లేద తట్టుకుని  నిలబడుతుందా చూడాలి మరీ...
దండోరాతో ధన్యమవుతున్న దేవదాయశాఖ   అంకుల్ రేపు నా హ్యాపీబర్త్‌డే.. చిన్నారి ‘బ్యాడ్మింటన్ ప్రభాకర్’ మురిసిపోతూ ఇచ్చిన హింట్ అది.  ఓహో.. అంటే రేపు తనకు బర్త్‌డే గ్రీటింగ్‌తో పాటు, గిఫ్టు కూడా తీసుకురావాలన్న మాట. జగన్నాధరెడ్డి అంకుల్ మట్టిబుర్రకు, చాలాసేపటి తర్వాత గానీ చిన్నారి విశ్వనాధ్ ‘కవిహృదయం’ అర్ధం కాలేదు. సహజంగా చిన్నపిల్లలు తమ హ్యాపీబర్త్‌డేకి రమ్మని, ఎవరినీ పిలవరు. ఫలానా రోజున తమ హ్యాపీబర్త్‌డే అని మాత్రమే చెబుతారు. అంటే ఆరోజున మనమే ఆ చిరంజీవులకు.. చాక్లెట్లో, బిస్కెట్లో గిఫ్టుగా ఇవ్వాలన్నమాట. ఇది సహజంగా అందరికీ తెలిసిన ఛైల్డ్ సైకాలజీ.   కానీ ఇప్పుడు ‘ఓల్డేజీ సైకాలజీ’ కూడా ఒకటి పుట్టుకొచ్చింది. ఫలానా రోజు పెద్దాయన పుట్టినరోజు కాబట్టి, మీరంతా వచ్చి ఆయనను ఆశీర్వదించి వెళ్లాలనే న్యూట్రెండన్నమాట! అది కూడా ఆ పెద్దాయన మఠం వేసుకున్న, పీఠం నుంచే అందిన వినతిలాంటి ఆదేశం. అంటే బలవంతపు బ్రాహ్మణార్ధమన్న మాట. మరి ‘చిన్నారి బ్యాడ్మింటన్ ప్రభాకర్’ హ్యాపీబర్త్‌డేకు, ‘పెద్దయిన’ పీఠాథిపతికి ఏం తేడా ఉంది చెప్పండి? షేమ్ టు షేమ్ కదా? కావాలంటే మన జగన్గురువు, జగద్రక్షకుడు, సృష్టి-స్థితి-లయకారుడు, అఖిలాండ కోటి బ్రహ్మాండ నాయకుడయిన విశాఖ పీఠాథిపతి శ్రీశ్రీశ్రీశ్రీశ్రీ స్వరూపానంద మహాస్వామి జన్మదిన ముచ్చటను మీరే చూడండి.   విశాఖ పీఠాథిపతి స్వరూపానందుల వారికి.. దేవుడు కొలువుదీరిన దేవాలయాలు, అందులోని ప్రధానార్చకుల జీవితాలను ధన్యం చేయాలన్న ముచ్చట ఎప్పటినుంచో ఉంది. కానీ అందుకు సమయం-సందర్భం కలసిరావడం లేదు. అంతలోనే పీఠం మేనేజరు గారికి దివ్యమైన ఆలోచన వచ్చింది. స్వామి వారి జన్మదినం ఎలాగూ ఈనెల 18న వస్తోంది కాబట్టి.. రాష్ట్రంలోని పెద్ద ఆలయాల ప్రధాన షర్చకులను ఆయన సముఖానికి పిలిపించుకుని, వారితో ఆశీర్వాదం ఇప్పించుకుంటే.. పుణ్యం-పురుషార్ధం రెండూ కలసి వస్తాయని తలచారు. ఆ రకంగా అర్చకుల జీవితాలు, వారు సేవ చేసే దేవదేవతల జీవితాలు కూడా జాయింటుగా ధన్యమవుతాయని భావించారు.   వెంటనే తమ సంకల్పాన్ని,  దేవదాయ శాఖ కమిషనర్‌కు లేఖ రూపంలో వెల్లడించారు. దాన్ని అందుకున్న సదరు కమిషనరు.. ఆ లేఖ స్వయంగా పరమాత్ముడే, కంప్యూటరు అక్షరాలతో రాసినట్లు ఫీలయ్యారు. తన మీద స్వామి వారి కరుణా కటాక్ష వీక్షణాలు ఈరూపంలో ప్రసరిస్తాయనుకోలేదని, ఆనందభాష్పాలతో ఆయన కళ్లు జలధార కార్చాయి. వెంటనే కర్తవ్యం గుర్తొచ్చి.. లోకరక్షకుడయిన విశాఖ స్వామి వారి జన్మదినం... ఈనెల 18న ఉంది కాబట్టి, మీరంతా మీ ప్రధానార్చకులను విశాఖ చినముషిడివాడలో, మనిషిరూపంలో కొలువైన స్వరూపానందుల వారి వద్దకు పంపి, వారికి ఆశీర్వాచనాలు ఇవ్వాలని 23 దేవాలయాలకు హుకుం జారీ చేశారు. మంచిదే.  జగన్గురు, జగద్గురువైన శ్రీమాన్ స్వరూపానందుల వారి జన్మదినమంటే అది లోకకల్యాణం కోసమే క దా? మరి ఆయన ఈ గడ్డపై పుట్టిందే, లోకకల్యాణార్ధం కోసమాయె!   అది ఓకే. కానీ జీవితం బుద్బుదప్రాయమని ప్రవచించే.. సర్వసంగ పరిత్యాగులు- సన్యాసులకు జన్మదిన వేడుకలేమిటి? సన్యాసి అంటే స్వయంగా నారాయణ స్వరూపుడు. సన్యాసులు ఆశీర్వదించాలే తప్ప, ఆశీస్సులు తీసుకోవడమేమిటి? నారాయణ స్వరూపులు ఎదురయితే.. అంతటి  యమధర్మరాజు కూడా పక్కకు తొలగి, దారి ఇస్తారు కదా? అయినా విశాఖ స్వామి వారిని ఆలయ ప్రధాన అర్చకులే తరలివచ్చి,  ఆశీర్వదించడమేమిటి విచిత్రం కాకపోతే?! అసలు ప్రధానార్చకులు, ఆలయంలోని మూలవిరాట్టును వదలి, బయటకు రాకూడదు. మరి  విశాఖ వేలుపు వద్దకు వెళ్లడమంటే.. స్వయంగా ఆ దేవదేవతలే విశాఖ స్వామి వద్దకు వెళ్లినట్టు కాదా? ప్రధాన అర్చకుండంటే ఆయన కూడా, మూలవిరాట్టుతో సమానం కదా? మరి ఈ ఆధ్మాత్మిక అపచారం- అరాచకాన్ని స్వయంగా, దేవదాయ శాఖనే ప్రోత్సహించి, ధర్మానికి పాతర వేస్తే ఎలా? అయినా.. సర్వసంగ పరిత్యాగులయిన సన్యాసికి ఈ సన్నాసి పనులేమిటి?   ఇలాంటి పిచ్చి ప్రశ్నలు వేసి, మతిలేని మాటలు మాట్లాడితే.. కళ్లు దీపావళి బాంబుల్లా పేలిపోతాయి. ఇద్దరు ముఖ్యమంత్రుల ముద్దుల స్వామికి.. చంద్రుడికో నూలుపోగులా జన్మదిన వేడుకలు జరిపితే తప్పేమిటి? మామూలుగా అయితే పీఠాథిపతుల జన్మదినం రోజున ఆయన నక్షత్రం ప్రకారం.. పీఠపాలిత దేవాలయాల్లో మాత్రమే అర్చనలు చేయడం ఒక ఆచారం. కానీ అదంతా పబ్లిసిటీ పిచ్చలేని సాధారణ స్వాముల విషయంలో! కానీ, మన విశాఖ స్వరూపులను..  అలా ఇతర పీఠాథిపతులతో పోల్చి అవమానిస్తే ఎలా? కంచి-శృంగేరి అంటే పురాతన పీఠాలు. విశాఖ పీఠమంటే స్వయంప్రకటితం. ముద్దులకు కేరాఫ్ అడ్రెసు. మరి స్వయంకృషితో ఒక స్వయంప్రకటిత పీఠాథిపతి, ఈ స్ధాయికి చేరినందుకు గర్వించాలే తప్ప..  ఈ చచ్చు పుచ్చు ఇచ్చకాలతో,  ఆయన ఇమేజీని డ్యామేజీ చేయడం తప్పు కదూ?   సరే.. దేవదాయ శాఖ ఉన్నతాధికారంటే, ఏదో ఓవరాక్షన్‌తో.. సర్కారుకూ తెలియకుండానే, ‘సన్యాసికి జన్మదినం’ పేరిట.. ఇలాంటి అడ్డగోలు ఉత్తర్వులిచ్చి, శాస్త్రాలను  అవమానించారనుకుందాం. ఇప్పటికే దీనిపై సోషల్‌మీడియాలో ‘స్వరూపానందరెడ్డి’ అంటూ ఎకసెక్కాలు మొదలయ్యాయి. అది వేరే విషయం.  మరి ధర్మశాస్త్రాలు పుక్కినపట్టిన,  పీఠపాలకుల బుద్ధి-బుర్ర ఏమయింది? అలా నిస్సిగ్గుగా.. నిర్లజ్జగా.. నిర్భయంగా.. సన్యాసయిన మా  స్వామివారికి జన్మదిన వేడుకలు జరపమని, ఏ మొహంతో అభ్యర్ధించారు?   అసలు సన్యాసికి జన్మదినం ఏమిటని నలుగురూ నాలుగురకాలుగా మాట్లాడితే, మొహం ఏ రిషీకేషులో పెట్టుకుంటారు? అయినా.. ఈ వయసులో ఆ పబ్లిసిటీ పిచ్చేమిటి.. కలికాలం కాకపోతే? అలా పుట్టినరోజు చేసుకునే సన్యాసులను, సన్నాసులని ఎవరైనా తిట్టిపోస్తే ఆ నామర్దా ఎవరికి? అందరినీ వచ్చి ఆశీర్వదించమనే  ఆ బలవంతపు బ్రాహ్మణార్ధమేమిటి? పీఠాథిపతులకు ఇంతకంటే పరువుతక్కువ ఇంకేమైనా ఉందా?... ఇవే కదా.. మెడపై తల ఉన్న వారు సంధించే ప్రశ్నలు?!   ఏం చేస్తాం.. ‘అతి’యే మన గతి అనుకోవాలి. లేకపోతే వృద్ధాప్యంలో వేసే పిల్లచేష్టలయినా అనుకోవాలి! ఏదేమైనా సృష్టి స్థితి లయకారుడైన విశాఖ స్వాములకు.. కోటానుకోట్ల భక్తులు, లక్షలాది జగనన్న అభిమానుల పక్షాన, ముందస్తు జన్మదిన శుభాకాంక్షలు. వీఐపీ, బకరా భక్తుల మాదిరిగా..  ఫ్లెక్సీలు, పేపర్ యాడ్లు ఇచ్చుకోలేని నిరుపేద భక్తులను.. విశాఖ పీఠం క్షమించాలి! -మార్తి సుబ్రహ్మణ్యం
బయట రాష్ట్రాల్లో చక్రాలు తిప్పుతున్న తెలుగు బీజేపీ నేతలు   ఎవరయినా ఇంట గెలిచి రచ్చ ఓడతారు. కానీ మన తెలుగు రాష్ట్రాల కమలనాధులు మాత్రం.. ఇంట ఓడి, రచ్చ గెలుస్తున్నారు. అవును. తెలుగు రాష్ర్టాల నుంచి ప్రాతినిధ్యం వహిస్తూ, జాతీయ స్థాయిలో పెద్ద పెద్ద బాధ్యతల్లో పనిచేసిన-చేస్తున్న బీజేపీ అగ్రనేతల చక్రం.. సొంత తెలుగు రాష్ర్టాల్లో మాత్రం తిరగకపోవడమే ఆ పార్టీ కార్యకర్తలను ఆశ్చర్యపరుస్తోంది. బయట రాష్ర్టాల్లో తమ నేతలు చక్రం తిప్పినందువల్లే, అక్కడ కమలం వికసించిందంటూ సదరు నేతల వీరాభిమానులు, సోషల్‌మీడియాలో పోస్టింగులు పెడుతుంటారు. మరికొందరు నేతల పేరుతో ఏకంగా అభిమానసంఘాలే ఉన్నాయి. కానీ, ఏపీ-తెలంగాణ రాష్ర్టాల్లో పార్టీని కనీసం ప్రతిపక్ష స్థానానికి కూడా ఇప్పటిదాకా ఎందుకు తీసుకురాలేకపోతున్నారో అర్ధం కాక జుట్టు పీక్కుంటున్నారు.   ఉమ్మడి-విభజిత రాష్ర్టాలు ఏర్పడి ఇన్నాళ్లయినా... బీజేపీ, రెండు రాష్ర్టాల్లో ఇప్పటిదాకా కనీసం ప్రతిపక్ష స్థానానికీ ఎదగలేకపోయింది. ఆలోగా, ఒకే ఒక్క స్థానాలున్న రాష్ర్టాల్లో సైతం అధికారంలోకి వచ్చింది. మరికొన్ని రాష్ర్టాల్లో ప్రతిపక్ష స్థాయికి చేరింది. లోక్‌సభలో రెండు సీట్లకు పరిమితమైన బీజేపీ, ఇప్పుడు దేశంలో రెండోసారి మళ్లీ అధికారంలో కొనసాగుతోంది. దేశంలో అత్యధిక సంఖ్యలో ఎమ్మెల్యే, ఎమ్మెల్సీలు, కార్యకర్తలు ఉన్న ఏకైక పార్టీగా అవతరించింది. చివరకు కల అనుకున్న కశ్మీర్‌లో కూడా, అధికారంలో భాగస్వామిగా మారింది. మరికొన్ని రాష్ర్టాల్లో సంకీర్ణ భాగస్వామిగా కొనసాగుతోంది.   దేశంలో ఇన్ని అద్భుతాలు సృష్టించిన బీజేపీ.. తెలుగు రాష్ట్రాల్లో మాత్రం, కనీసం ప్రతిపక్ష స్థాయికి సైతం చేరుకోలేకపోవడానికి, కారణమేమిటన్న చర్చకు పార్టీ వర్గాల్లో తెరలేచింది. వెంకయ్యనాయుడు ఎమ్మెల్యే నుంచి ఉప రాష్ట్రపతి స్థాయికి ఎదిగినా, పార్టీ మాత్రం ఆ స్థాయి-ఆయన స్థాయికి చేరకపోవడమే ఆశ్చర్యం. అయితే తెలుగు రాష్ర్టాలకు చెందిన రాంమాధవ్, పేరాల చంద్రశేఖర్, మురళీధర్‌రావు, సత్య వంటి నేతలు.. ఇతర రాష్ట్రాలకు ఇన్చార్జిలుగా ఉన్నప్పుడు, ఆయా రాష్ట్రాల్లో బీజేపీ విజయం సాధించింది. దానిపై రాంమాధవ్, మురళీధర్‌రావు, సత్య అభిమానులు సోషల్‌మీడియాలో చాలా హడావిడి చేశారు. ఆయా నేతలు ఆ రాష్ర్టాల్లో చక్రం తిప్పినందుకే, పార్టీ విజయం సాధించిందంటూ మీడియాలో కథనాలు కూడా వచ్చేలా చూశారు.   రాంమాధవ్ కశ్మీర్, ఈశాన్య రాష్ర్టాలు, మురళీధర్‌రావు కర్నాటక, పేరాల చంద్రశేఖర్ అస్సోం, తాజాగా సత్య బిహార్ ఎన్నికల్లో చక్రం తిప్పారంటూ, వారి అభిమానులు సోషల్‌మీడియాలో హంగామా చేసిన విషయాన్ని సీనియర్లు గుర్తు చేస్తున్నారు. రెండురోజుల క్రితమే.. బిహార్‌లో పార్టీ బహిరంగ సభల నిర్వహణ బాధ్యత చూసిన, జాతీయ కార్యదర్శి సత్యను అభినందిస్తూ, ఆయన అభిమానులు పోస్టు పెట్టారు. మరి పరాయి రాష్ట్రాల్లో ఇన్ని అద్భుతాలు సృష్టించి.. పార్టీని విజయతీరాలకు చేర్చిన ఈ నాయకులు, సొంత తెలుగు రాష్ట్రాల్లో పార్టీకి, ఎందుకు వెలుగు తెప్పించలేకపోతున్నారన్న ప్రశ్నలు వెల్లువెత్తుతున్నాయి.   ఏపీలో టీడీపీతో కలసి పోటీ చేస్తే అరజడజను ఎమ్మెల్యే సీట్లు కూడా సాధించలేకపోయింది. ఒక్క ఎంపీతోనే సర్దుకోవలసి వచ్చింది. ఆ తర్వాత జరిగిన ఎన్నికల్లో ఒక్క సీటు కూడా గెలుచుకోలేకపోయింది. పైగా నోటా కంటే తక్కువ ఓట్లు తెచ్చుకుంది. చివరాఖరకు ఆ పార్టీ సాధించిన ఓట్ల శాతం పాయింట్ ఎనిమిది!   కశ్మీర్‌తోపాటు, ఈశాన్య రాష్ట్రాల్లో చక్రం తిప్పిన రాంమాధవ్ సొంత రాష్ట్రంలో, పార్టీకి ఈ దుస్థితి పట్టడాన్ని సీనియర్లు గుర్తు చేస్తున్నారు. మరి ఆయన చక్రం ఏపీలో ఎందుకు తిరగలేదన్నది వారి ప్రశ్న. రాంమాధవ్ సొంత తూర్పు గోదావరిలో గానీ, జాతీయ కార్యదర్శిగా ఉన్న సత్య సొంత కడప జిల్లాలో గానీ పార్టీ ఒక్క స్థానం కూడా గెలవలేకపోయిన విషయాన్ని గుర్తు చేస్తున్నారు.   ఇక జాతీయ ప్రధాన కార్యదర్శి వరకూ ఎదిగి.. కర్నాటకలో అద్భుతాలు సృష్టించి, తమిళనాడులో పార్టీపరంగా కొన్ని వివాదాల్లో ఇరుకున్న మురళీధర్‌రావు.. తన సొంత తెలంగాణ రాష్ట్రంలో పార్టీకి, కనీసం రెండోసీటు కూడా ఎందుకు సాధించలేకపోయారన్న ప్రశ్నలు వినిపిస్తున్నాయి. మురళీధర్‌రావు తన సొంత కరీంనగర్ జిల్లాలో ఒక్క అసెంబ్లీ సీటు సాధించలేకపోయారని, చివరకు స్థానిక సంస్థల ఎన్నికల్లో కూడా పార్టీని గెలిపించలేకపోయారని నేతలు గుర్తు చేస్తున్నారు. గత ఎన్నికల్లో 5 సీట్లు సాధించిన పార్టీ, తర్వాత ఎన్నికల్లో ఒక్క అదనపు స్థానం సాధించలేకపోగా, ఒక్కటి మాత్రమే వచ్చిందంటే.. మరి ఆయన చక్రం తెలంగాణలో ఎందుకు తిరగలేదని సీనియర్లు ప్రశ్నిస్తున్నారు.   దుబ్బాకలో గెలిచిన రఘునందన్‌రావు స్వయంకృషితోనే, పార్టీకి ఒక సీటు అదనంగా వచ్చింది తప్ప, ఎవరి చక్రాలు అక్కడ తిరగలేదని పార్టీ వర్గాలు స్పష్టం చేస్తున్నాయి. దుబ్బాకలో బీజేపీ విజయం వెనుక అభ్యర్థితోపాటు, రాష్ట్ర అధ్యక్షుడు సంజయ్ శ్రమ, వివేక్ వెంకటస్వామి వంటి నేతల సహకారం మాత్రమే ఉందంటున్నారు. తొలి ఎమ్మెల్యే రాజాసింగ్, తాజాగా రఘునందన్ విజయం వారి వ్యక్తిగతమేనని స్పష్టం చేస్తున్నారు.   దుబ్బాకలో పోటీ తీవ్రంగా ఉండి, అధికార టీఆర్‌ఎస్ కోట్ల రూపాయలు వెదజల్లుతోందన్న ఆందోళన, ప్రచార సమయంలో బీజేపీ నేతల్లో వ్యక్తమయింది. కానీ అభ్యర్ధి రఘునందన్‌రావుకు, జాతీయ పార్టీ నుంచి సకాలంలో ఆర్ధిక సహకారం అందించేలా చూడటంలో.. పెద్ద పెద్ద పదవుల్లో ఉన్న వారంతా విఫలమయ్యారని నేతలు స్పష్టం చేస్తున్నారు. అక్కడి నుంచి ‘రెండు అంకెలకు’ మించి ఆర్ధిక సాయం రాలేదంటే, పదవుల్లో ఉన్న వారిపై జాతీయ నాయకత్వానికి.. ఎంత నమ్మకం- వారికి జాతీయ నాయకత్వ వద్ద పలుకుబడి, ఏ స్థాయిలో ఉందో స్పష్టమవుతోందన్న వ్యాఖ్యలు వినిపిస్తున్నాయి.   అస్సోంలో చక్రం తిప్పిన మరో నేత పేరాల చంద్రశేఖర్, స్వయంగా ఎల్‌బినగర్‌లో పోటీ చేసి ఓడిపోవడమే ఆశ్చర్యమంటున్నారు. ఒక రాష్ట్రంలోనే చక్రం తిప్పిన ఓ అగ్రనేత.. చివరాఖరకు అసెంబ్లీ స్థానంలో పోటీ చేసి తానే ఓడిపోయారంటే, దాని సంకేతం ఏమిటన్న ప్రశ్నలు వినిపిస్తున్నాయి. అంటే వీరికి స్థానబలం లేకపోవడం ఒక కారణమయి ఉండాలి. లేదా స్థానికంగా ప్రజల నాడి తెలుసుకోవడంలోనయినా, విఫలమయి ఉండాలని విశ్లేషిస్తున్నారు.   ఇక ఎన్నికల్లో వైఫల్యాలను.. కేవలం రాష్ట్ర అధ్యక్షులనే బాధ్యులను చేస్తున్న నాయకత్వం, పార్టీకి దిశానిర్దేశం చేసే.. సంఘటనా కార్యదర్శులను మాత్రం కొనసాగించడంపై ఆశ్చర్యం వ్యక్తం చేస్తున్నారు. తెలంగాణలో వైఫల్యానికి అధ్యక్షుడు డాక్టర్ కోవా లక్ష్మణ్, ఏపీలో వైఫల్యానికి కన్నా లక్ష్మీనారాయణను బాధ్యులను చేసి, వారిని తొలగించారు. అందులో లక్ష్మణ్‌ను, ఓబీసీ జాతీయ సెల్ అధ్యక్షుడిగా నియమించగా, కన్నాకు అది కూడా ఇవ్వలేదు. అది వేరే విషయం.   కానీ తెలంగాణ సంఘటనా కార్యదర్శిగా ఏళ్ల తరబడి కొనసాగుతున్న మంత్రి శ్రీనివాస్-రాష్ట్ర ఇన్చార్జి కృష్ణదాస్, రెండున్నరేళ్ల నుంచి ఏపీ సంఘటనా కార్యదర్శిగా కొనసాగుతున్న మధుకర్-రాష్ట్ర ఇన్చార్జి సునీల్ దియోథర్‌ను మాత్రం, అలాగే కొనసాగించడంపై విమర్శలు వ్యక్తమవుతున్నాయి. తెలంగాణ సంఘటనా కార్యదర్శి మంత్రి శ్రీనివాస్, ఆరేళ్ల నుంచి బాధ్యునిగా వ్యవహరిస్తున్నా, పార్టీ కించిత్తు పురోగతి సాధించలేదంటున్నారు.   అటు జాతీయ స్థాయిలో కూడా వైఫల్యాలకు, సంఘటనా కార్యదర్శులు నైతిక బాధ్యత వహించకపోవడం ఏమిటన్న వ్యాఖ్యలు వినిపిస్తున్నాయి. ఏపీ-తెలంగాణకు మూడు దశాబ్దాల నుంచి ఇన్చార్జిగా ఉన్న, జాతీయ సంఘటనా జాతీయ ప్రధాన కార్యదర్శి సతీష్‌జీ.. తెలుగు రాష్ట్రాల్లో పార్టీకి సంబంధించి, సాధించిన పురోగతి ఏమిటన్న ప్రశ్నలు వినిపిస్తున్నాయి. ఇక రెండేళ్ల నుంచి ఇన్చార్జిగా ఉన్న సంతోష్‌జీ కూడా, అదే హోదాలో కొనసాగుతున్న వైనాన్ని గుర్తు చేస్తున్నారు.   మరి ఇటీవలి ఎన్నికల పరాజయంలో వారి పాత్ర లేదా? వారి అనుమతితోనే టికెట్లు, నిర్ణయాలు జరిగినప్పుడు, మరి వారెందుకు బాధ్యత వహించరన్న ప్రశ్నలు వినిపిస్తున్నాయి. పార్టీని క్షేత్రస్థాయి నుంచి పునర్నిర్మించడంలో సీరియస్‌గా దృష్టి సారించి, ఎక్కువ సమయం కార్యకర్తల మధ్య గడిపి ఉంటే .. తెలుగు రాష్ర్టాల్లో పార్టీ పరిస్థితి, ఇంత విషాదంగా ఉండేది కాదన్న వ్యాఖ్యలు సీనియర్ల నుంచి వినిపిస్తున్నాయి. గత ఏడాదిన్నర క్రితం హైదరాబాద్‌లో.. అనుబంధసంస్ధలతో సమావేశం నిర్వహించారు. కానీ వారి నుంచి ఎలాంటి ప్రతిపాదనలు తీసుకోకుండా, నేతలు చెప్పింది వినకుండానే కేవలం అరగంటలో ఆ సమావేశాన్ని ముగించిన వైనాన్ని నేతలు గుర్తు చేస్తున్నారు. అంటే దీన్నిబట్టి... రాష్ట్రానికి బాధ్యులుగా వచ్చేవారికి, స్థానిక అంశాలపై ఎంత శ్రద్ధ ఉందో అర్ధం చేసుకోవచ్చంటున్నారు. -మార్తి సుబ్రహ్మణ్యం
ఆంధ్రప్రదేశ్ లో దేశంలో ఎక్కడా లేనంటువంటి పరిణామాలు చోటు చేసుకుంటున్నాయి. వైసీపీ పాలనలో వింత వింత ఘటనలు జరుగుతున్నాయి.  వీర జవాన్ల కుటుంబాలకు చేసే సాయంలోనూ వివక్ష చూపుతున్నారు పాలకులు. కులం ఆధారంగా అమర జవాన్ల కుటుంబాలకు పరిహారం ప్రకటిస్తున్నారనే ఆరోపణలు వస్తున్నాయి. అమరులైన జవాన్లలో కొందరి కుటుంబాలకు సాయం చేస్తూ.. మరికొందరిని పట్టించుకోకపోవడం తీవ్ర విమర్శలు తావిస్తోంది. జగన్ సర్కార్ తీరుపై అన్ని వర్గాల నుంచి తీవ్ర విమర్శలు వస్తున్నాయి. అమర జవాన్లను కూడా అవమానించడమేంటనీ ఫైరవుతున్నారు ప్రజలు. ఇలాంటి పరిస్థితులు ఏపీలో రావడం దారుణమని మరికొందరు ఆగ్రహం వ్యక్తం చేస్తున్నారు.                 మూడు రోజుల క్రితం కాశ్మీర్‌ లో  జరిగిన ఉగ్ర దాడులో చిత్తూరు జిల్లా ఐరాల మండలం రెడ్డివారిపల్లెకు చెందిన ప్రవీణ్‌ కుమార్‌ రెడ్డి అమరుడయ్యారు. బుధవారం అమర జవాన్ అంత్యక్రియలు అధికార లాంఛనాలతో  పూర్తయ్యాయి. దేశం కోసం వీర మరణం పొందిన ప్రవీణ్‌ కుమార్‌ రెడ్డి కుటుంబ సభ్యులకు 50 లక్షల రూపాయల పరిహారం ప్రకటించింది జగన్ సర్కార్. అయితే అక్టోబర్ 12న సరిహద్దులో ఉగ్రవాదులతో జరిగిన ఎన్ కౌంటర్ లో శ్రీకాకుళం జిల్లా వజ్రపుకొత్తూరు గ్రామానికి చెందిన జవాన్ బొంగు బాబూరావు వీరమరణం పొందాడు. అస్సాం రైఫిల్స్‌లో సైనికుడిగా ఉన్న  బాబూరావు అరుణాచల్ ప్రదేశ్ సరిహద్దుల్లో ఉగ్రవాదులతో జరిగిన ఎదురుకాల్పుల్లో చనిపోయారు. అంతకు నెల క్రితం శ్రీకాకుళం నగరానికి చెందిన ఉమామహేశ్వరరావు బాంబు నిర్వీర్యం చేస్తుండగా పేలిన  ఘటనలో మృతి చెందారు. సిక్కోలుకు చెందిన ఈ ఇద్దరూ జవాన్లు విధినిర్వహణలోనే ప్రాణాలు కోల్పోయినా.. జగన్ సర్కార్ మాత్రం వారి కుటుంబాలను పట్టించుకోలేదు. ప్రభుత్వం నుంచి ఎలాంటి పరిహారం ప్రకటించలేదు.   అమర జవాన్ల విషయంలో  జగన్ సర్కార్ వ్యవహరించిన తీరుపై ఇప్పుడు సర్వత్రా విమర్శలు వస్తున్నాయి. ప్రవీణ్ కుమార్ రెడ్డి కుటుంబ సభ్యులకు  50 లక్షల రూపాయల పరిహారం ప్రకటించిన జగన్ సర్కార్.. శ్రీకాకుళం జిల్లాకు చెందిన ఇద్దరు వీర జవాన్ల కుటుంబాలను పట్టించుకోకపోవడం చర్చనీయాంశంగా మారింది. అమర జవాన్ల విషయంలోనూ కులం చూసి పరిహారం ఇస్తున్నట్లుగా ఉందనే ఆరోపణలు వస్తున్నాయి. వీర జవాన్లకు సాయంలోనూ కులం చూస్తారా  అని ప్రభుత్వాన్ని ప్రశ్నిస్తూ ఏపీ టీడీపీ అధ్యక్షుడు కింజరాపు అచ్చెన్నాయుడు సీఎం జగన్ కు లేఖ రాశారు. "ఉగ్రవాదులతో పోరాడుతూ మరణించిన చిత్తూరు జిల్లాకు చెందిన ప్రవీణ్‌ కుమార్‌ రెడ్డి కుటుంబానికి రాష్ట్ర ప్రభుత్వం తరఫున రూ.50 లక్షల సాయం ఇచ్చారు. అభినందిస్తున్నాను. దీనికి కొద్ది రోజుల ముందు ఈ నెల 4న అస్సాం రైఫిల్స్‌ దళంలో హవల్దార్‌గా పనిచేస్తున్న శ్రీకాకుళం జిల్లా వజ్ర కొత్తూరుకు చెందిన బొంగు బాబూరావు వీర మరణం పొందారు. సైన్యంలో పనిచేస్తున్న వారి ప్రాణత్యాగం ఎవరిదైనా ఒకటే. ప్రవీణ్‌ కుమార్‌ రెడ్డి కుటుంబానికి ఎటువంటి సాయం ఇచ్చారో అదే సాయాన్ని కులం, మతం, ప్రాంతం చూడకుండా ఇతర అమర వీరుల కుటుంబాలకు కూడా ఇవ్వాలి. బాబూరావు కుటుంబానికి కూడా ఈ సాయం వర్తింపచేయాలి" అని లేఖలో ముఖ్యమంత్రిని కోరారు అచ్చెం నాయుడు.  దేశం కోసం ప్రాణాలు అర్పించిన సిక్కోలుకు చెందిన వీర జవాన్ల కుటుంబాలను రాష్ట్ర ప్రభుత్వం చిన్నచూపు చూస్తోందని ఎంపీ కింజరాపు రామ్మోహన్‌ నాయుడు విమర్శించారు. వీర జవాను ప్రవీణ్‌కుమార్‌ రెడ్డి కుటుంబానికి రూ.50 లక్షల పరిహారం ప్రకటించడం స్వాగతించదగ్గ విషయమన్నారు రామ్మోహన్‌ నాయుడు. రెండు నెలల వ్యవధిలో శ్రీకాకుళం జిల్లాకు చెందిన ఇద్దరు జవాన్లు మృతి చెందారని ఆయన గుర్తుచేశారు. శ్రీకాకుళం నగరానికి చెందిన ఉమామహేశ్వరరావు బాంబు నిర్వీర్యం చేస్తుండగా పేలిన ఘటనలో మృతి చెందగా, అస్సాం రైఫిల్‌ ఉగ్రవాదుల కాల్పుల్లో బొంగు బాబూరావు మృతి చెందారన్నారు. వీరిద్దరు మృతి చెందిన తర్వాత వారి కుటుంబాలకు ప్రభుత్వం నుంచి ఎటువంటి భరోసా ప్రకటించలేదని గుర్తు చేశారు. వీర జవాన్‌ ప్రవీణ్‌కుమార్‌ రెడ్డి కుటుంబానికి అండగా నిలిచిన ప్రభుత్వం శ్రీకాకుళం జిల్లాకు చెందిన వీర జవాన్లపై ఎందుకు వివక్ష చూపుతున్నారని ప్రశ్నించారు.  అమర జవాన్ల విషయంలో జగన్ సర్కార్ తీరు తీవ్ర విమర్శలు తావిస్తోంది. దేశంలో ప్రాణాలు కోల్పోయిన జవాన్లను ప్రభుత్వం అవమానించినట్లుగా ఉందనే అభిప్రాయం అన్ని వర్గాల నుంచి వస్తున్నాయి. అయినా కొందరికి పరిహారం ప్రకటించి.. మరికొందరికి ప్రకటించకపోవడం ఏంటని నిలదీస్తున్నారు జనాలు. ఇలాంటి ఘటనలతో రాష్ట్రం పరువు పోతుందనే ఆందోళన వ్యక్తమవుతోంది. జవాన్లకు సాయం చేసే విషయంలో ప్రభుత్వానికి ఒక పాలసీ ఉంటుందని.. అలా కాకుండా వ్యవహరించడం సరికాదని చెబుతున్నారు. ప్రభుత్వం వెంటనే తప్పును సరిదిద్దుకుని సిక్కోలు జిల్లాకు చెందిన ఇద్దరు వీర జవాన్ల కుటుంబాలకు 50 లక్షల రూపాయల పరిహారం ప్రకటించాలని ఏపీ ప్రజలు, నేతలు కోరుతున్నారు.
తెలంగాణలో మరో మూడు టర్మ్ లు టీఆర్ఎస్ దే అధికారం. తెలంగాణ ప్రజలు కారును తప్ప మరో పార్టీని గెలిపించరు.. ఇదీ టీఆర్ఎస్ అధినేత , సీఎం కేసీఆర్, మంత్రి కేటీఆర్ ఎప్పుడూ చెప్పే మాటలు. కేసీఆర్, కేటీఆర్ ప్రకటనలు వినేవారు నిజంగానే తెలంగాణలో టీఆర్ఎస్ చాలా బలంగా ఉందని నమ్ముతుంటారు. పాలనలో కేసీఆర్ నిర్ణయాలు కూడా అలానే ఉంటాయి, రాష్ట్ర్ర భవిష్యత్ కు సంబంధించిన కీలక అంశాలపైనా సొంతంగానే నిర్ణయాలు తీసుకుంటారు. ప్రతిపక్షాలను కనీసం లెక్కలోకి తీసుకోరు. తెలంగాణ మొత్తం తన సొంతమనే తీరుగా ఆయన పోకడలు ఉంటాయనే ఆరోపణలున్నాయి. అయితే తాజాగా జరిగిన దుబ్బాక ఉప ఎన్నికతో టీఆర్ఎస్ బలమెంతో తెలిసొచ్చింది. అధికార పార్టీగా ఉండి తన సిట్టింగ్ స్థానాన్ని నిలబెట్టుకోలేకపోయింది టీఆర్ఎస్, ఎమ్మెల్యే చనిపోవడంతో ఆయన భార్యే పోటీ చేసినా.. ఆ సెంటిమెంట్ ఉన్నా దుబ్బాకలో గట్టెక్కలేకపోయింది గులాబీ పార్టీ.    దుబ్బాక బైపోల్ ఫలితంతో తెలంగాణ రాజకీయాల్లో సమూల మార్పులు జరిగే అవకాశాలున్నాయి. తమకు తిరుగేలేదనే భ్రమలో ఉన్న టీఆర్ఎస్ కు కౌంట్ డౌన్ మొదలైందనే చర్చ జరుగుతోంది. నిజానికి తెలంగాణలో ఎప్పుడూ టీఆర్ఎస్ బలంగా లేదు. రెండు సార్లు అధికారంలోకి వచ్చినా.. ఆ పార్టీకి వచ్చిన ఓట్లు గొప్పగా ఏమి లేవు, గత ఎన్నికల ఫలితాలను చూస్తేనే ఇది అర్ధమవుతుంది. బోగస్ ఓట్లు, బోటాబోటీ మెజార్టీలు, ఈవీఎం మిషన్లు, కౌంటింగులో అవకతవకలు.. ఇలాంటి అంశాలు కలిసి రావడం వల్లే టీఆర్ఎస్ రెండు సార్లు అధికారంలోకి వచ్చిందని, ఎన్నికల లెక్కలు చూస్తే ఆ పార్టీ బలమేంటో  తెలుస్తుందనే అభిప్రాయం రాజకీయ వర్గాల నుంచి వినిపిస్తోంది. దుబ్బాక ఫలితంలో ఇది రుజువైందని చెబుతున్నారు.    2014లో తెలంగాణ రాష్ట్రం ఏర్పాటైంది. కేసీఆర్ వల్లే తెలంగాణ సాధ్యమైందని ప్రజలంతా భావించారు. ఆ సమయంలోనే 2014లో జరిగిన తెలంగాణ తొలి అసెంబ్లీ ఎన్నికల్లో టీఆర్ఎస్ 63 సీట్లు సాధించి అధికారంలోకి వచ్చింది. మేజిక్ ఫిగర్ కు మూడు సీట్లే ఎక్కువొచ్చాయి ఆ పార్టీకి. ఇక ఓట్ల పరంగా చూస్తే 2014 అసెంబ్లీ ఎన్నికల్లో టీఆర్ఎస్ కు వచ్చిన ఓట్లు 33. 2 శాతమే. అంటే దాదాపు 67 శాతం మంది తెలంగాణ ఓటర్లు కేసీఆర్ కు , టీఆర్ఎస్ కు వ్యతిరేకంగా ఓట్లు వేశారన్నమాట. ఇక గెలిచిన 63 సీట్లలోనూ 10 నియోజకవర్గాల్లో మెజార్టీ 2 వేల లోపే ఉంది. అక్కడ కొంచెం తారుమారైనా గులాబీకి పవర్ దక్కేది కాదు. ప్రత్యేక రాష్ట్రం తెచ్చిన ఉద్యమపార్టీ నేతగా వెలుగొందిన కేసీఆర్ కు.. తెలంగాణ తొలి అసెంబ్లీ ఎన్నికల్లో కేవలం 33 శాతం ఓట్లే రావడం నిజంగా అశ్చర్యమే. లెక్కలు ఇలా ఉంటే కేసీఆర్ మాత్రం తెలంగాణ ప్రజలంతా తనవెంటే ఉన్నారంటూ గొప్పలు చెప్పుకుంటూ వస్తున్నారు.    2018లో జరిగిన అసెంబ్లీ ఎన్నికల్లో గతంలో కంటే మెరుగైన ఫలితాలు సాధించింది టీఆర్ఎస్. అయితే అందుకు సవాలక్ష కారణాలు, ప్రభుత్వ కుట్రలు కనిపిస్తున్నాయి. 2018 అసెంబ్లీ ఎన్నికల్లో 88 సీట్లు గెలిచింది గులాబీ పార్టీ. 46.9 శాతం ఓట్లు సాధించింది. గెలిచిన 88లో దాదాపు 15 నియోజకవర్గాల్లో బోటాబోటీ మెజార్టీతో చివరి రౌండ్లలో బయటపడ్డారు టీఆర్ఎస్ అభ్యర్థులు. ఇబ్రహీంపట్నం, కొప్పుల ఈశ్వర్ ధర్మపురిలో మెజార్టీ వందల్లోనే ఉంది. తుంగతుర్తి, వికారాబాద్, కోదాడలో టీఆర్ఎస్ అభ్యర్థులు చివరి రౌండులో గెలిచారు. స్వల్ప మెజార్టీతో టీఆర్ఎస్ గెలిచిన నియోజకవర్గాల్లో ఓట్ల లెక్కింపుపై  చాలా ఆరోపణలున్నాయి. ఇబ్రహీంపట్నం, ధర్మపురిలో ఎంతగా మెత్తుకున్నా రీకౌంటింగ్ కూడా చేయలేదని కాంగ్రెస్ అభ్యర్థులు ఆరోపించారు. ప్రభుత్వ పెద్దల ఒత్తిడితోనే ఎన్నికల రిటర్నింగ్ అధికారులు అక్రమాలకు పాల్పడ్డారని చెప్పారు. ఎన్నికల కౌంటింగ్ లో అక్రమాలు జరిగాయని, ఈవీఎంలు మార్చారనే ఆరోపణలు వచ్చాయి. ఓడిపోయిన కొందరు అభ్యర్థులు కోర్టుకు కూడా వెళ్లారు. ఇంకా ఆ కేసులు నడుస్తూనే ఉన్నాయి.   2018 అసెంబ్లీ ఎన్నికలకు సంబంధించి మరో కీలక అంశం ఉంది. అసెంబ్లీ ఎన్నికలకు ముందు తెలంగాణలో దాదాపు 28 లక్షల ఓట్లు గల్లంతయ్యాయి.   కొన్ని లక్షల కొత్త ఓట్లు రాత్రికి రాత్రే వచ్చి చేరాయి. అధికార పార్టీ కనుసన్నలోనే ఇదంతా జరిగిందని, తమకు ఇబ్బంది కాకుండా ఓటర్ లిస్టులతో మార్పులు చేర్పులు చేసిందనే విపక్షాలు ఆరోపించాయి. కోర్టుకు కూడా వెళ్లాయి. అయితే ఓట్ల తొలగింపునకు సంబంధించిన అప్పటి ఎన్నికల ప్రధానాధికారి కూడా కోర్టులో ఈ విషయాన్నిఅంగీకరించారు. 28 లక్షల ఓట్లు గల్లంతైందని నిజమేనని, కాని ఇప్పుడు చేసేదేమి లేదని, లోక్ సభ ఎన్నికల నాటికి ఓటర్ లిస్టులను సరి చేస్తామని అప్పటి ఎన్నికల అధికారి రజత్ కుమారే స్వయంగా చెప్పారు. 2018లో మళ్లీ టీఆర్ఎస్ అధికారంలోకి రావడానికి ఇది కూడా ముఖ్య కారణమని విపక్షాలు ఇప్పటికి ఆరోపిస్తూనే ఉన్నాయి.   ఓటర్ లిస్టులు సరిచేశాక జరిగిన 2019 లోక్ సభ ఎన్నికల్లో టీఆర్ఎస్ అసలు బలమేంటో తెలిసొచ్చింది. రెండోసారి అధికారంలోకి వచ్చాక ఆరు నెలల్లోపే జరిగిన లోక్ సభ ఎన్నికల్లో కారు పార్టీ ఏకంగా ఏడు సీట్లు కోల్పోయింది. నిజానికి లోక్ సభ ఎన్నికల సమయానికి టీఆర్ఎస్ కార్యకర్తలు అసెంబ్లీ గెలుపు జోష్ లోనే ఉన్నారు. విపక్షాలు ఓటమి నిరాశలోనే ఉన్నాయి. అయినా లోక్ సభ ఎన్నికల్లో టీఆర్ఎస్ ఏడు సీట్లు కోల్పోవడం., సీఎం కేసీఆర్ కూతురే నిజామాబాద్ లో ఓడిపోవడం సంచలనమైంది. 2018 డిసెంబర్ లో 88 అసెంబ్లీ సీట్లు గెలిచి రెండోసారి పవర్ చేపట్టిన టీఆర్ఎస్.. ఆరు నెలల్లోనే దాదాపు 55 నియోజకవర్గాల్లో వెనకబడిపోవడం అందరిని అశ్చర్యపరిచింది. బోగస్ ఓట్లు లేకుండా, లక్షలాది ఓట్లను తొలగించకుండా 2018 అసెంబ్లీ ఎన్నికలు పారదర్శకంగా జరిగితే లోక్ సభకు వచ్చిన ఫలితాలే అప్పుడు కూడా వచ్చేవేమోననే అనే అభిప్రాయం కొన్ని వర్గాలు, రాజకీయ అనలిస్టుల నుంచి వినిపించాయి.    మొత్తంగా దుబ్బాక ఉప ఎన్నిక ఫలితంతో తెలంగాణలో టీఆర్ఎస్ అందరూ అనుకున్నట్లుగా బలంగా లేదని, విపక్షాలు బలహీనంగా ఉండటమే కేసీఆర్ బలమనే అభిప్రాయం వ్యక్తమవుతోంది. దుబ్బాకలో బీజేపీ గట్టి పోరాటం చేయడంతో ప్రజలు ఆ పార్టీని అదరించారని చెబుతున్నారు. టీఆర్ఎస్ కు ప్రత్యామ్నాయంగా ఉంటామని ఏ పార్టీ నిరూపించుకున్నా.. ఆ పార్టీకి తెలంగాణ ప్రజల మద్దతు దొరికే అవకాశం ఉందంటున్నారు. దుబ్బాక ఫలితం విపక్షాలకు టానిక్ లా మారే అవకాశం ఉందని, రానున్న రోజుల్లో కారు పార్టీకి కష్టాలు తప్పకపోవచ్చని రాజకీయ విశ్లేషకులు అంచనా వేస్తున్నారు.
కారుకు కౌంట్ డౌన్ మొదలైనట్టేనా? తెలంగాణలో రాజకీయ సమీకరణలు పూర్తిగా మారిపోనున్నాయా? కాంగ్రెస్ ఫ్యూచరేంటీ? దుబ్బాక ఉప ఎన్నిక ఫలిత తర్వాత తెలంగాణ ప్రజల్లో జరుగుతున్న చర్చ ఇది. అన్ని పార్టీలు ప్రతిష్టాత్మకంగా తీసుకుని పోరాడిన దుబ్బాక ఉప ఎన్నికలో కమలం పార్టీ కత్తిలాంటి  విజయం సాధించింది. తెలంగాణలో తమకు తిరుగులేదని భావిస్తున్న కేసీఆర్ పార్టీకి చుక్కలు చూపించింది బీజేపీ. ఉప ఎన్నికలో అధికార పార్టీని ఓడించి సత్తా చాటింది. దుబ్బాక విజయంతో టీఆర్ఎస్ కు బలమైన ప్రత్యామ్నాయ శక్తిగా మారింది బీజేపీ. వచ్చే అసెంబ్లీ ఎన్నికల నాటికి మరింత బలపడే అవకాశం ఉంది. అదే జరిగితే కేసీఆర్ పార్టీకి కష్టాలు వచ్చినట్లేనని భావిస్తున్నారు. దుబ్బాక ఫలితంతో తెలంగాణ రాజకీయ సమీకరణలు పూర్తిగా మారిపోనున్నాయని భావిస్తున్నారు.    తెలంగాణలో ప్రస్తుతం టీఆర్ఎస్ అధికారంలో ఉంది. దుబ్బాక ఎమ్మెల్యేగా ఉన్న సీనియర్ నేత సోలిపేట రాంచంద్రారెడ్డి చనిపోయారు. సోలిపేట చనిపోవడంతో జరిగిన ఉప ఎన్నిక కాబట్టి సెంటిమెంట్ కూడా ఉంది. అంటే అధికారంతో పాటు సెంటిమెంట్ ఉన్నా ఉప ఎన్నికలో ఓడిపోవడం టీఆర్ఎస్ పార్టీకి పెద్ద షాకే. అంతేకాదు సీఎం కేసీఆర్ సొంత జిల్లాలో ఉంది దుబ్బాక నియోజకవర్గం. ప్రస్తుతం కేసీఆర్ ప్రాతినిధ్యం వహిస్తున్న గజ్వేల్ కు పక్క నియోజకవర్గమే. మంత్రులు కేటీఆర్, హరీష్ రావు ప్రాతినిధ్యం వహిస్తున్న సిరిసిల్ల, సిద్ధిపేట నియోజకవర్గాలు దుబ్బాకకు పక్కనే ఉన్నాయి. ఈ లెక్కన దుబ్బాక టీఆర్ఎస్ ముఖ్యనేతల సొంత గడ్డ. అయినా దుబ్బాక ఉప ఎన్నికలో ఓడిపోవడంతో  టీఆర్ఎస్ కు గడ్డు కాలం వచ్చిందనే సంకేతమిస్తోంది.    గతంలో జరిగిన ఉప ఎన్నికల్లో ఎక్కువ సార్లు టీఆర్ఎసే విజయం సాధించింది. ఉద్యమ సమయంలోనూ, అధికారంలోకి వచ్చాకా కూడా జరిగిన ఎన్నికల్లో అది సత్తా చాటింది. కాంగ్రెస్ ఎమ్మెల్యేలు చనిపోవడంతో ఉప ఎన్నిక జరిగిన నారాయణ్ ఖేడ్, పాలేరులోనూ సెంటిమెంట్ ను అధిగమించి ఘన విజయాలు సాధించింది టీఆర్ఎస్. టీపీసీసీ చీఫ్ ఉత్తమ్ కంచుకోటగా చెప్పుకునే హుజూర్ నగర్ ఉప ఎన్నికలోనూ సూపర్ విక్టరి కొట్టింది. ఉప ఎన్నికల్లో టీఆర్ఎస్ పోల్ మేనేజ్ మెంట్ అద్భుతంగా ఉంటుందని చెబుతుంటారు. కేసీఆర్ రచించే ప్రణాళికలు విపక్షాలకు అందవని, అందుకే ఎక్కువగా గెలుస్తుంటారనే చర్చ కూడా ఉంది. అయితే అన్ని అనుకూలతలు ఉన్నా, అధికార పార్టీగా ఉండి కూడా దుబ్బాకలో ఓడిపోవడం టీఆర్ఎస్ కు కోలుకోలేని దెబ్బేనని రాజకీయ విశ్లేషకులు కూడా అంచనా వేస్తున్నారు.    2018 అసెంబ్లీ ఎన్నికల్లో సోలిపేట రామలింగారెడ్డి 62 వేల 5 వందల ఓట్ల మెజార్టీతో విజయం సాధించారు. సోలిపేటకు 54.36 శాతం ఓట్లు రాగా.. కాంగ్రెస్ కు 16 శాతం ఓట్లు వచ్చాయి. 2018 అసెంబ్లీ ఎన్నికల్లో బీజేపీ అభ్యర్థిగా పోటీ చేసిన రఘునందన రావుకు కేవలం  22,595 ఓట్లు సాధించి మూడో స్థానంలో నిలిచారు. కాని 20 నెలల్లోనే సీన్ పూర్తిగా మారిపోయింది. దుబ్బాక ఉప ఎన్నికలో దాదాపు 45 శాతం ఓట్లు సాధించారు రఘునందన్ రావు. అంటే గతంతో పోలిస్తే 32 శాతం ఓట్లు ఎక్కువ సాధించారు. అంటే అధికార పార్టీపై ప్రజా వ్యతిరేకత ఏ రేంజ్ లోఉందో  ఊహించవచ్చు. 20 నెలల్లోనే టీఆర్ఎస్ పార్టీ 15 శాతానికి పైగాఓట్లు కోల్పోవడం సామన్య విషయం కాదంటున్నారు అనలిస్టులు. అది కూడా అధికార పార్టీలో ఉపఎన్నికను ఎదుర్కొంటూ.. ఈ స్థాయిలో పతనం కావడం అంటే ఆ పార్టికి ప్రజల్లో తీవ్ర వ్యతిరేకత ఉందనే విషయం స్పష్టం అవుతుందంటున్నారు.    ఇక దుబ్బాక ఉప ఎన్నిక  ఫలితం కాంగ్రెస్ పార్టీ భవిష్యత్ కు గొడ్డలి పెట్టుగా మారే అవకాశం ఉంది. ఇంతకాలం టీఆర్ఎస్ కు తామే ప్రత్యామ్నాయమని చెప్పుకుంటున్న కాంగ్రెస్ పార్టీ దుబ్బాక ఫలితంతో షేకవుతోంది. దుబ్బాక జోష్ తో బీజేపీ దూకుడు పెంచి మరింత బలపడితే కాంగ్రెస్ మనుగడకే కష్టమని కొందరు కాంగ్రెస్ నేతలు ఆందోళన చెందుతున్నారు. నిజానికి దుబ్బాకను కాంగ్రెస్ పార్టీ చాలా సీరియస్ గా తీసుకుంది. పీసీసీ ముఖ్య నేతలంతా ప్రచారం చేశారు. నియోజకవర్గంలోని 145 గ్రామాలకు 145 మంది నేతలను ఇంచార్జులుగా నియమించింది. వారంతా పార్టీ గెలుపు కోసం కష్టపడ్డారు. అయినా  గతంలో కంటే ఓట్లు తగ్గడం ఆ పార్టీ నేతలను కలవరపెడుతోంది. గెలవకపోయినా రెండో స్థానంలో నిలిచినా సరిపోయేదని,, ఇలా మూడో స్థానానికి పడిపోవడం తమకు తీరని నష్టమంటున్నారు. దీని ప్రభావం పార్టీపై ముందు ముందు ఎలా ఉంటుందో చెప్పలేమని కొందరు కాంగ్రెస్ నేతలు ఆందోళన వ్యక్తం చేస్తున్నారు.   మొత్తంగా దుబ్బాక ఉప ఎన్నికలో బీజేపీ విజయంతో తెలంగాణ రాజకీయాల్లో పెను మార్పులు జరగబోతున్నాయనే చర్చే ఎక్కువగా జరుగుతోంది. అధికార టీఆర్ఎస్ కు కౌంట్ డౌన్ మొదలయినట్టేనని బీజేపీ నేతలు చెబుతున్నారు. వచ్చే అసెంబ్లీ ఎన్నికల్లో దుబ్బాకలో పాగా వేయడం ఖాయమంటున్నారు. చూడాలి మరీ తెలంగాణ రాజకీయాలు ఎలాంటి మలుపులు తిరుగుతాయో...
తెలంగాణ రాజకీయాలను హీటెక్కించిన దుబ్బాక ఉపఎన్నిక ముగిసింది. ఎగ్జిట్ పోల్స్ కూడా వచ్చాయి. మెజార్టీ సర్వే సంస్థలు అధికార టీఆర్ఎస్ పార్టీనే గెలుస్తుందని అంచనా వేశాయి. అయినా అధికార పార్టీ నేతల్లో మాత్రం టెన్షన్ కనిపిస్తోంది. దుబ్బాక ఎన్నికలో అంతా తానే వ్యవహరించిన ట్రబుల్ షూటర్ మంత్రి హరీష్ రావు, పార్టీ వర్కింగ్ ప్రెసిడెంట్ కేటీఆర్ టెన్షన్ పడుతున్నట్లుగా ఉందని చెబుతున్నారు. దుబ్బాక ఉప ఎన్నిక పోలింగ్ ముగిసిన తర్వాత నుంచి టీఆర్ఎస్ ముఖ్య నేతల ముఖాల్లో ఆందోళన కనిపిస్తోందని తెలంగాణ భవన్ లోనే చర్చ జరుగుతుందట. తాజాగా మంత్రి కేటీఆర్ చేసిన ఓ ప్రకటన కూడా గులాబీ పార్టీలో దుబ్బాక ఉప ఎన్నిక ఫలితం గుబులు రేపుతుందనే సంకేతమిస్తోంది.    గ్రేటర్ వరద సాయంపై విపక్షాల ఆరోపణలకు కౌంటర్ ఇచ్చిన కేటీఆర్.. దుబ్బాక ఉప ఎన్నికపైనా మాట్లాడారు. దుబ్బాకలో కాంగ్రెస్ కు డిపాజిట్ కూడా రాదన్నారు. అయితే కేంద్ర సర్కార్ పై తీవ్ర ఆరోపణలు చేస్తూ దుబ్బాకలో బీజేపీ పరిస్థితి ఏంటో మాత్రం కేటీఆర్ చెప్పలేదు. ఇదే ఇప్పుడు చర్చనీయాంశంగా మారింది. దుబ్బాకలో టీఆర్ఎస్, బీజేపీ మధ్యే హోరాహోరీ పోరు జరిగిందని పోలింగ్ సరళిని బట్టి తెలుస్తోంది. ఈ నేపథ్యంలో కాంగ్రెస్ కు డిపాజిట్ రాదని చెప్పిన కేటీఆర్.. బీజేపీ గురించి మాట్లాడకపోవడం టీఆర్ఎస్ నేతలను గందరగోళానికి గురి చేస్తోంది. దుబ్బాక ప్రచారంలో తమకు లక్ష ఓట్ల మెజార్టీ వస్తుందని టీఆర్ఎస్ నేతలు చెప్పారు. ఈ లెక్కన టీఆర్ఎస్ కు లక్ష ఓట్ల మెజార్టీ వస్తే ఇతర పార్టీలకు డిపాజిట్లు గల్లంతు కావాలి. అయితే కాంగ్రెస్ కు డిపాజిట్ రాదని చెప్పిన కేటీఆర్.. బీజేపీ గురించి మాట్లాడకపోవడం ద్వారా దుబ్బాకలో తమకు గట్టిపోటీ ఎదురైందని చెప్పకనే చెప్పినట్లైందని  రాజకీయ వర్గాల్లో చర్చ జరుగుతోంది.    దుబ్బాక ఉప ఎన్నికపై వచ్చిన ఎగ్జిట్ పోల్స్ కూడా గులాబీ నేతలను కలవరపెడుతున్నాయని అంటున్నారు. తాజాగా ఎగ్జిట్ పోల్ సర్వే వివరాలు ప్రకటించిన మిషన్ చాణక్య .. బీజేపీకి ఏకంగా  51.82 శాతం ఓట్లు వస్తాయని తెలిపింది. టీఆర్ఎస్ కు 35.67 శాతం ఓట్లు మాత్రమే వస్తాయని వెల్లడించింది. మిషన్ చాణక్య సర్వే ప్రకారం బీజేపీ 16 శాతానికి పైగా ఓట్లతో కారు కంటే ముందుంది. అంటే దాదాపు 30 వేల ఓట్లకు ఎక్కువే. ఇదే ఇప్పుడు కారు పార్టీ నేతలకు నిద్ర లేకుండా చేస్తుందంటున్నారు. దుబ్బాక పోలింగ్ ముగియగానే తమ సర్వే వివరాలు ప్రకటించిన పొలిటికల్ లేబొరేటరీ సంస్థ కూడా బీజేపీకి 47 శాతం ఓట్లు, కారుకు 38 శాతం ఓట్లు వస్తాయని తెలిపింది. అయితే పొలిటికల్ లేబొరేటరీ సంస్థ సర్వే ఫలితాలను కొట్టిపారేసిన కారు పార్టీ నేతలు.. మిషన్ చాణక్య  అంచనాలతో మాత్రం ఆందోళన పడుతున్నారని తెలుస్తోంది.    తాజాగా వచ్చిన ఆరా సంస్థ ఎగ్జిట్ ఫలితాలు టీఆర్ఎస్ ను మరింత షేక్ చేస్తున్నాయని చెబుతున్నారు. నిజానికి ఆరా సంస్థ అంచనాల్లో కారుకే లీడ్ ఉంది. అయితే అది స్వలంగా ఉంది. టీఆర్ఎస్ కు 47.72 శాతం, బీజేపీకి 44.6 శాతం ఓట్లు వస్తాయని ఆరా తెలిపింది. ఇందులో మూడు శాతం అటు ఇటుగా జరగవచ్చని కూడా సంస్థ వెల్లడించింది. అంటే ఆరా సంస్థ అంచనా ప్రకారం దుబ్బాక బైపోల్ లో ఎవరైనా గెలవొచ్చు. ఇదే ఇప్పుడు కారులో కంగారు పెంచుతోందంటున్నారు. గత జీహెచ్ఎంసీ ఎన్నికల్లో టీఆర్ఎస్ కు 100 సీట్లు వస్తాయని ఆరా సంస్థ ఎగ్జిట్ పోల్స్ ఇవ్వగా ముందు అంతా అశ్చర్యపోయారు. అసంభవమని భావించారు. అయితే గ్రేటర్ ఫలితాల్లో ఆరా సంస్థ అంచనాలే నిజమయ్యాయి. అప్పటి నుంచి ఆరా సంస్థ కేటీఆర్ కు సర్వేల్లో అత్యంత నమ్మకంగా మారిందంటున్నారు. టీఆర్ఎస్ తరపున కేటీఆర్ నిర్వహించే సర్వేలన్ని ఆరాకే ఇస్తారని తెలుస్తోంది.    తమకు నమ్మకమైన ఆరా సంస్థ కూడా హోరాహోరీ పోరు జరిగిందనే అంచనాలు ఇవ్వడంతో కేటీఆర్ దుబ్బాక ఫలితంపై టెన్షన్ పడుతున్నారని తెలుస్తోంది. దుబ్బాక పోలింగ్ తర్వాత మంత్రి హరీష్ రావు కామెంట్లు కూడా.. టీఆర్ఎస్ కు అనుకున్నట్లు పోలింగ్ జరగలేదనే సంకేతమిచ్చింది. బీజేపీ సోషల్ మీడియా ద్వారా ఫేక్ ప్రచారం చేసిందని, కాంగ్రెస్ అభ్యర్థి టీఆర్ఎస్ లో చేరుతున్నారంటూ దుర్మార్గ ప్రచారం చేసిందని హరీష్ రావు ఆరోపించారు. హరీష్ మాటలను బట్టి దుబ్బాకలో టీఆర్ఎస్ కు తీవ్ర పోటీ ఎదురైందని చెప్పక తప్పదు. అంతేకాదు పోలింగ్ రోజు తర్వాత నుంచి హరీష్ రావు ఎక్కడా కనిపించడం లేదు. దుబ్బాక ఫలితం గురించి కూడా ఆయన మాట్లాడటం లేదు. ఇవి కూడా టీఆర్ఎస్ నేతల్లో పలు అనుమానాలను కల్గిస్తున్నాయి. దుబ్బాకలో ఏదైనా జరగవచ్చని వారంతా భయపడుతున్నట్లు తెలుస్తోంది.    దుబ్బాక ఉప ఎన్నికపై ఇప్పటివరకు వచ్చిన ఎగ్టిజ్ పోల్స్ లో ఒక్క నాగన్న సర్వేలో మాత్రమే టీఆర్ఎస్ కు 50 శాతానికి పైగా ఓట్లు వస్తాయని తేలింది.  మొత్తంగా కేటీఆర్ తాజా కామెంట్లు, హరీష్ రావు సైలెంట్ ను బట్టి దుబ్బాక ఉప ఎన్నిక టీఆర్ఎస్ కు ఇబ్బందిగా మారిందని రాజకీయ విశ్లేషకులు చెబుతున్నారు. దుబ్బాక ఫలితం గులాబీకి వ్యతిరేకంగా వచ్చినా అశ్చర్యం లేదంటున్నారు.
ఆంధ్రప్రదేశ్ రాష్ట్రం ఆర్థిక సంక్షోభంలో కొట్టు మిట్టాడుతోంది. రాష్ట్ర ఖజానాలో పైసా కూడా లేని పరిస్థితి వచ్చింది. కనీసం ఉద్యోగులకు ఇవ్వాల్సిన డీఏను కూడా చెల్లించలేని హీన దుస్థితికి చేరుకుంది ఆంధ్రప్రదేశ్. రెండు రోజుల క్రితమే ఉద్యోగులకు డీఏ ప్రకటించింది జగన్ సర్కార్. 2018 జులైలో పెంచిన 3.144 శాతం కరువు భత్యం మంజూరు చేస్తున్నట్లు ఉత్తర్వులు ఇచ్చింది. అయితే కొన్ని గంటల్లోనే యూటర్న్ తీసుకుంది. జనవరి 1, 2020 నుంచి ఉద్యోగులకు ఇవ్వాల్సిన  డీఏ అదనపు వాయిదా చెల్లింపులూ ఆపేసింది. జనవరి 1, 2020 నుంచి జూన్‌ 30, 2021 వరకు చెల్లించాల్సిన బకాయిలు కూడా చెల్లించే పరిస్థితి లేదని తేల్చేసింది ఏపీ ప్రభుత్వం.                                     ఉద్యోగుల డీఏ చెల్లింపులు వాయిదా వేసిన ఏపీ ప్రభుత్వం.. తమపై విమర్శలు రాకుండా తెలివిగా వ్యవహరించింది. ఆ నెపాన్ని కేంద్రంపై వేసి తప్పించుకునే ప్రయత్నం చేసింది. కోవిడ్ , లాక్‌డౌన్‌ కారణంగా దేశ వ్యాప్తంగా ఆదాయం పడిపోవడంతో కేంద్ర ప్రభుత్వ ఉద్యోగులకు, పెన్షనర్లకు కేంద్రం జూలై 2021 వరకు డీఏ చెల్లింపు నిలిపేసింది. ఇదే కారణం చూపుతూ జగన్ సర్కార్ కూడా ఉద్యోగుల చెల్లింపుల నిలిపివేస్తున్నట్లు ప్రకటించింది. చెల్లింపులు వాయిదా వేస్తూ తాజాగా ఇచ్చిన జీవోలో కేంద్రం నిర్ణయాన్ని కూడా పొందుపరిచింది. రాష్ట్రం కూడా అదే  పరిస్థితుల్లో ఉండటంతో కేంద్ర ఆదేశాలకు అనుగుణంగా ఈనిర్ణయం తీసుకున్నట్లు ఆ ఉత్తర్వుల్లో పేర్కొంది ఏపీ ప్రభుత్వం.   ఏపీ ఉద్యోగులకు 3.144 శాతం కరువు భత్యం మంజూరు చేస్తూ ప్రభుత్వం ఈనెల 4న ఉత్తర్వులు జారీ చేసింది. ప్రభుత్వం తీసుకున్న నిర్ణయంతో మొత్తం డీఏ  27. 248 నుంచి 30.392కు పెరిగింది. 2021 జనవరి జీతాలతో కలిపి క్యాష్ రూపంలో చెల్లింపులు చేయనున్నట్లు ప్రభుత్వం తెలిపింది. 2018 జులై 1 నుంచి 2020 డిసెంబర్ 31 వరకు మొత్తం 30 నెలల బకాయిల్ని  3 సమభాగాల్లో పీఎఫ్‌ ఖాతాల్లో జమ చేస్తామని జీవోలోనే పేర్కొంది. సీపీఎస్ వారికైతే 30 నెలల ఎరియర్స్ 90 శాతం నగదుతో పాటు 10 శాతం పాన్ అక్కౌంట్ కు జనవరి జీతాల చెల్లింపు అనంతరం అంటే 3 సమాన భాగాల్లో జమ చేస్తామని వివరించింది. ప్రభుత్వ ప్రకటనతో సంతోషించిన ఉద్యోగులకు కొన్నిగంటల్లోనే నిరాశ మిగిల్చింది జగన్ సర్కార్.     డీఏ చెల్లింపులు వాయిదా వేస్తూ సర్కార్ ఇచ్చిన తాజా జీవోపై ఏపీ ఉద్యోగులు భగ్గుమంటున్నారు. రెండేళ్లుగా పెండింగ్ ఉన్న బకాయిలను మళ్లీ వాయిదా వేయడమేంటని ప్రశ్నిస్తున్నారు. ఉద్యోగులకు డీఏ ఇవ్వలేని పరిస్థితికి ఏపీ దిగజారిపోయిందా అని ఉద్యోగులు ప్రశ్నిస్తున్నారు. రెండు రోజుల క్రితం జీవో ఇచ్చినప్పుడు  కేంద్రం నిర్ణయం తెలియదా అని ప్రశ్నిస్తున్నారు ఉద్యోగులు, ఉద్యోగులకు ప్రకటించిన జీవో 3.114 శాతం. డీఏగా ప్రభుత్వం అదనంగా ఇచ్చే డబ్బులు వందల కోట్లలోనే ఉంటాయని చెబుతున్నారు. అలాంటి వందల కోట్ల రూపాయలు కూడా చెల్లంచలేక సర్కార్ చేతులెత్తేస్తే.. రాష్ట్ర భవిష్యత్ ఎలా ఉంటుందో అర్ధం కావడం లేదనే ఆందోళన ఉద్యోగులు, జనాల్లో వ్యక్తమవుతోంది.    మరోవైపు నవంబర్ నెలలో వారం రోజులు గడిచినా.. ఏపీలోని ఇంకా  40 శాతం ప్రభుత్వ ఉద్యోగులకు, రిటైర్డ్‌ ఉద్యోగులకు వేతనాలు, పెన్షన్లు అందలేదని తెలుస్తోంది.  రాష్ట్ర ఖజానాలో నికధులు లేకపోవడంతో  ఆర్థికశాఖ ఏం చేయలేని పరిసత్థిలో ఉంది. కొవిడ్‌ విధుల కోసం నాలుగు నెలల క్రితం కొత్తగా భర్తీ చేసుకున్న వైద్యులు ఇప్పటి వరకు  నెల జీతమూ కూడా తీసుకోలేదట. రాష్ట్రానికి అప్పుల సమీకరణకు ఉన్న అవకాశాలన్నీ మూసుకుపోవడంతో ఈ గండం తలెత్తిందని ఉన్నతాధికారులు చెబుతున్నారు.    ఆర్థిక గండం నుంచి గట్టెక్కేందుకు ఏపీ ప్రభుత్వం అన్ని ప్రయత్నాలు చేస్తున్నట్లు కనిపిస్తోంది. అప్పుల కోసం బ్యాంకులతో ప్రభుత్వం వరుస సమావేశాలు నిర్వహిస్తోంది. గురువారం సచివాలయంలో ఐదు బ్యాంకులతో ఆర్థికశాఖ అధికారులు అప్పుల కోసం చర్చలు జరిపారు. తక్షణమే రూ. 6,000 వేల కోట్లు అప్పు కావాలని బ్యాంకర్లను కోరగా..  ప్రస్తుతం ప్రభుత్వానికి గ్యారంటీ స్పేస్‌ రూ. 6000 కోట్లు మాత్రమే ఉండడంతో .. ఆ ఐదు  బ్యాంకులు కలిసి ఆ మొత్తం ఇచ్చేందుకు అంగీకరించినట్టు తెలిసింది.  ఖజానాలో ఆ నిధులు జమ కాగానే పెన్షనర్లకు, మిగిలిన ప్రభుత్వ ఉద్యోగులకు వేతనాలు, పెన్షన్లు ఇవ్వలాని ప్రభుత్వం భావిస్తోంది. దీంతో సోమవారం వరకూ ఇది జరిగే అవకాశం ఉందని ఆర్థిక శాఖ ఉన్నతాధికారులు చెబుతున్నారు.    జగన్ సర్కార్ అస్తవ్యస్థ విధానాల వల్లే ఏపీ ఖజానా ఖాశీ అయిందని జనాలు ఆరోపిస్తున్నారు. ఆర్థిక నియంత్రణ లేకుండా ప్రభుత్వం నిర్ణయాలు తీసుకోవడం వల్లే గడ్డు పరిస్థితులు వచ్చాయంటున్నారు ఆర్థిక శాఖ నిపుణులు. జగన్ ప్రభుత్వం జవాబుదారి తనం లేకుండా ముందుకు వెళుతుందని, అడ్డగోలుగా నిధులు ఖర్చు చేస్తుందనే ఆరోపణలు మొదటి నుంచి వస్తున్నాయి. తమ సొంత ఇమేజ్ పెంచుకోవడానికి, ప్రజల్లో క్రేజీ పొందాలనే ఉద్దేశ్యంతో అవసరం లేని వాటికి భారీగా నిధులు ఖర్చు  చేస్తూ.. అత్యంత కీలకమైన వాటిని విస్మరిస్తున్నారని చెబుతున్నారు. ఖజానా ఖాళీ అయిందంటే రాష్ట్రం దివాళా తీసినట్టేనని వారు  చెందుతున్నారు. ఏ ప్రభుత్వానికికైనా ఆర్థిక నిర్వహణే అతి ముఖ్యమైన,, అది గాడి తప్పిదే తలెత్త పరిణామాలు తీవ్రంగా ఉంటాయనే ఆందోళన వ్యక్తమవుతోంది. ఉద్యోగులకు జీతాలు సమయానికి ఇవ్వలేని పరిస్థితి రావడం కలవరం కల్గించే విషయమని చెబుతున్నారు.
సునీల్-మధుకర్ ఏం చేస్తున్నట్లు?   సస్పెన్షన్లు, సమావేశాలపై చర్చించరేం?   సొంత నిర్ణయాలపై నేతల సీరియస్   క్రమశిక్షణ ఆరోప్రాణంగా చెప్పబడే భారతీయ జనతా పార్టీలో.. ఇప్పుడు అదే లోపించిందన్న వ్యాఖ్యలు వినిపిస్తున్నాయి. సమిష్ఠి నిర్ణయాల స్ధానంలో,  ఒకరిద్దరు తీసుకుంటున్న నిర్ణయాలపై సీనియర్లతోపాటు, కొత్తగా పార్టీలో చేరిన నేతలు భగ్గుమంటున్నారు. పార్టీపరంగా ప్రజల్లోకి వెళ్లలేకపోతున్న నాయకత్వం, వివాదాల్లో మాత్రం శరవేగంగా దూసుకుపోతోందన్న విమర్శలు వెల్లువెత్తుతున్నాయి. ప్రధానంగా.. కోర్ కమిటీ రూపకల్పన, ఆ పేరుతో పిలుస్తున్న ఆహ్వానితుల జాబితాపై పార్టీ ఎంపీలు సైతం రుసరుస లాడుతున్నారు.   ఏపీ బీజేపీలో లుకలుకలు పెరుగుతున్నాయి. సస్పెన్షన్లు, మీడియా చర్చలకు వెళ్లే ప్రతినిధుల జాబితా కూర్పుపై.. రాష్ట్ర అధ్యక్షుడు తీసుకుంటున్న ఏకపక్ష నిర్ణయాలపై, వ్యతిరేకత వ్యక్తమవుతోంది. సోము వీర్రాజు అధ్యక్షడయి చాలాకాలమయింది. అయినా ఇప్పటివరకూ, కోర్ కమిటీ కూర్పుపై.. సీనియర్లతో సమావేశం నిర్వహించకపోవడంపై, అగ్రనేతల్లో అసంతృప్తి వ్యక్తమవుతోంది. కోర్ కమిటీ ఏర్పాటుచేస్తే, అందులో కీలక నిర్ణయాలపై చర్చించే అవకాశం ఉంటుంది. అప్పుడు ఏకపక్ష నిర్ణయాలకు అవకాశం తక్కువగా ఉంటుంది. అందువల్లనే, కోర్ కమిటీ ఏర్పాటుచేయకుండా, కేవలం ఒకరిద్దరే స్వంత నిర్ణయాలు తీసుకుంటున్నారని చెబుతున్నారు.   కోర్ కమిటీ ఏర్పాటుచేస్తే, అందులో తమ నిర్ణయాలను ప్రతిఘటన ఉండే ప్రమాదం ఉన్నందున, సాధ్యమయినంత వరకూ ఆలస్యం చేసి, ఈలోగా కావలసిన నిర్ణయాలు తీసుకుంటున్నారన్న విమర్శలు వినిపిస్తున్నాయి. ప్రధానంగా ముగ్గురు ఎంపీలు రాష్ట్ర నాయకత్వ నిర్ణయాలను ప్రశ్నిస్తున్నందున, వారిని కోర్ కమిటీలో లేకుండా చూసేందుకే ఆలస్యం చేస్తున్నారంటున్నారు.   ఇటీవల విశాఖలో ఏర్పాటుచేసిన కోర్ కమిటీ సమావేశానికి.. యుపి ఎంపి జీవీఎల్ నరసింహారావును మాత్రమే పిలిచి, రాష్ట్ర ఎంపీలు సుజనాచౌదరి, సీఎం రమేష్, టీజీ వెంకటేష్, మాజీ అధ్యక్షుడు కన్నా లక్ష్మీనారాయణను ఆహ్వానించకపోవడం వివాదానికి దారితీసింది. అసలు సాంకేతికంగా ఏపీతో ఏమాత్రం సంబంధం లేని జీవీఎల్, కోర్‌మిటీలో ఎలా సభ్యుడవుతారన్న ప్రశ్నలు వినిపించాయి. ఇన్చార్జి సునీల్ దియోధర్, సంఘటనా కార్యదర్శి నూకల మధుకర్‌రెడ్డి, రాష్ట్ర అధ్యక్షుడు సోము వీర్రాజు.. కేవలం జీవీఎల్ సూచనల ప్రకారం పనిచేస్తున్నారని, ప్రస్తుతం పార్టీని జీవీఎల్లే నడిపిస్తున్నారన్న  వ్యాఖ్యలు, పార్టీ నేతల అంతర్గత సమావేశాల్లో వినిపిస్తూనే ఉన్నాయి. కొత్త కమిటీ వేయనందున, గతంలో వేసిన కోర్ కమిటీ ఇప్పుడు పనిచేస్తుందా? లేదా? అని మరికొందరు ప్రశ్నిస్తున్నారు. కోర్‌కమిటీలో సబ్ కమిటీ వేసి, మళ్లీ దానిపై ఇంకో మినీ కోర్ కమిటీ వేసినట్లున్నారన్న వ్యంగ్య వ్యాఖ్యలు వినిపిస్తున్నాయి.   ఇటీవలి విశాఖ భేటీలో.. కాంగ్రెస్ నేత సుంకర పద్మశ్రీ వ్యాఖ్యలు చర్చకు వచ్చాయట. ఆమెను ఓ ప్రధాన కార్యదర్శి విమర్శించడం మంచిదికాదని, మహిళలకు గౌరవం ఇవ్వాలని, భేటీలో పాల్గొన్న పురందీశ్వరి మందలించారట. అయితే అక్కడే ఉన్న రాష్ర్ట ఇన్చార్జి సునీల్ దియోధర్ మాత్రం, అందుకు భిన్నంగా.. ప్రధానిని వాడు, వీడు అని సంబోధించినా ఎవరూ స్పందించలేదని, ఒక్క రాష్ట్ర ప్రధాన కార్యదర్శి మాత్రమే స్పందించారని మెచ్చుకున్నారట. అయితే అసలు సుంకరపద్మశ్రీ ప్రధానిని దూషిస్తూ, ఏ పత్రికలు, చానెళ్లలో వచ్చిందో తాము చూడలేదని, ఆ పేరుతో ప్రధాన కార్యదర్శి మహిళను దూషిస్తే, ఆయనను సునీల్ సమర్థించడంపై నేతలు విస్మయం వ్యక్తం చేశారట.   ఇక పార్టీ వాణి బలంగా వినిపించే ఓవి రమణ, వెలగపూడి గోపాలకృష్ణ, తాజాగా లంకాదినకర్‌ను సస్పెండ్ చేసిన సందర్భంలో.. నాయకత్వం తమను సంప్రదించకపోవడంపై సీనియర్లు, ఎంపీలు ఆగ్రహంతో ఉన్నారు. ఆ ముగ్గురు చేసిన తప్పేమిటో చెప్పకుండా, నిబంధనల ప్రకారం షోకాజ్ నోటీసు ఇవ్వకుండా.. ఏకంగా సస్పెండ్ చేయడంపై నిరసన వ్యక్తమవుతోంది. వీరిలో రమణ,అమరావతిపై పార్టీ నేతలు చేసిన వ్యాఖ్యలనే పత్రికలో వ్యాసం రాయగా, ఆయనపై వేటు వేశారు. ఇక పార్టీ ఆఫీసుకు వెయ్యి గజాల స్థలం ఇచ్చి, ఆఫీసు కూడా నిర్మించేందుకు సిద్ధమయిన వెలగపూడి గోపాలకృష్ణ,  తనను తాను చెప్పుతో కొట్టుకుంటే..  ఆయనపైనా వేటు వేశారు.అయితే.. ఆయనను వెంటనే జాతీయ హిందూమహాసభకు, రాష్ట్ర అధ్యక్షుడిగా నియమించడంతో బీజేపీ నేతలు ఖంగుతినాల్సి వచ్చింది.   జాతీయ మీడియాలో పార్టీ వాణిని,  సమర్థవంతంగా వినిపిస్తున్న లంకా దినకర్‌పై వేటు వ్యవహారమయితే.. ఢిల్లీ వరకూ వెళ్లింది. జాతీయ నాయకులు సైతం ఆయనపై వేటు వార్త విని ఆశ్చర్యం వ్యక్తం చేశారట. ఇద్దరు ఎంపీలు కూడా.. దీనిపై అధ్యక్షుడు నద్దా, పార్టీ  సంఘటనా జాతీయ ప్రధాన కార్యదర్శి, సంయుక్త ప్రధాన కార్యదర్శికీ  ఫిర్యాదు చేశారట. స్వయంగా నద్దా సమక్షంలోనే పార్టీలో చేరిన లంకాదినకర్ వంటి వారికే దిక్కు లేకపోతే, ఇక తమ పరిస్థితి ఏమిటని,  ఇతర పార్టీల నుంచి చేరిన నేతలు బిక్కుబిక్కుమంటున్నారట. నిజానికి జాతీయ మీడియాలో కనిపించే జీవీఎల్ కంటే, దినకర్ వాదనలోనే ఎక్కువ రుజువులు, ఆధారాలుంటాయన్న ప్రశంసలు వినిపిస్తుంటాయి. బహుశా దినకర్‌కు అదే శాపంగా మారిందన్న వ్యాఖ్యలు కూడా వినిపించకపోలేదు.  ప్రధానంగా.. టీడీపీ నుంచి చేరిన కమ్మ వర్గానికి చెందిన నేతలను,  ఒక వ్యూహం ప్రకారం వెళ్లగొడుతున్నారన్న ప్రచారం పార్టీవర్గాల్లో వినిపిస్తోంది.   ఇక వివిధ చానెళ్ల చర్చలకు వెళ్లే ప్రతినిధుల జాబితాపైనా,  పార్టీ వర్గాల్లో వెటకారపు వ్యాఖ్యలు వినిపిస్తున్నాయి. సోమనాధ్ ఆలయం ఎక్కడుందో కూడా చెప్పలేని వారిని, టీవీ చర్చలకు ప్రతినిధులుగా ఎంపిక చేసిన, పార్టీ మేధావులను మెచ్చుకోవాల్సిందేనంటున్నారు. అసలు ఆ జాబితాలో ముప్పావుశాతం మందికి, ఇప్పటిదాకా చానెళ్లలో చర్చలకు వెళ్లిన అనుభవమే లేదని గుర్తు చేస్తున్నారు. మంత్రిగా పనిచేసిన రావెల కిశోర్‌బాబు, ఆదినారాయణరెడ్డి వారితో నిత్యం మీడియా ప్రతినిధులు మట్లాడుతుంటారు. కానీ వారికి ఇప్పుడు గొంతు విప్పే అవకాశం లేకుండా పోవడంపై ఆశ్చర్యం వ్యక్తమవుతోంది. రాయలసీమలో ఒకస్థాయిలో ఇమేజ్ ఉన్న ఆదినారాయణరెడ్డి, బైరెడ్డి రాజశేఖర్‌రెడ్డికి స్థానం లేకుండా పోవడం ఏమిటంటున్నారు. టీడీపీ-బీజేపీ సంకీర్ణ సర్కారు కాలం నుంచీ, పార్టీ వాణిని సమర్ధవంతంగా వినిపిస్తున్న పురిఘళ్ల రఘురాం వంటి.. సీనియర్ నాయకుడినే జాబితా నుంచి తప్పించడంపై,  పార్టీ నేతలు విస్మయం వ్యక్తం చేస్తున్నారు.   సునీల్ దియోధర్ ఆయనకు, ప్రాధాన్యం తగ్గించారన్న విమర్శలు వినిపిస్తున్నాయి.  జాతీయ నాయకత్వంతో సన్నిహితంగా ఉండటంతోపాటు, ఏపీ-తెలంగాణకు చెందిన పార్టీ నేతలకు ఢిల్లీలో ఏళ్లతరబడి.. సమన్వయకర్తగా వ్యవహరిస్తున్న రఘురాం లాంటి వంటి కార్యదక్షులనే పక్కకుపెడితే, ఇక మామూలు నేతల సంగతేమిటన్న ప్రశ్నలు వినిపిస్తున్నాయి.   పార్టీని చక్కదిద్దాల్సిన రాష్ట్ర పార్టీ సంఘటనా కార్యదర్శి మధుకర్‌రెడ్డిజీ, ఆ విషయంలో విఫలమయ్యారన్న విమర్శలు వినిపిస్తున్నాయి. ఆయన తన విచక్షణ వినియోగించడం మానే సి, కేవలం ఇద్దరు ముగ్గురు నేతల ఆలోచన ప్రకారమే, నిర్ణయాలు తీసుకుంటున్నారన్న వ్యాఖ్యలు వినిపిస్తున్నాయి. ఆర్‌డి విల్సన్, పురిఘళ్ల రఘురాం, లంకా దినకర్‌పై సస్పెన్షన్- నోటీసులివ్వాలని సునీల్ దియోధర్ చే సిన ఒత్తిళకు, మధుకర్‌రెడ్డి గట్టిగా సమాధానం ఇవ్వలేకపోయారన్న వ్యాఖ్యలు వినిపిస్తున్నాయి. -మార్తి సుబ్రహ్మణ్యం
జగన్ సర్కార్ మెండి వైఖరి ఏపీని మళ్లీ ప్రమాదంలోకి నెడుతుందా? రాష్ట్రంలో కరోనా మళ్లీ పంజా విసరనుందా? అంటే అవుననే అనిపిస్తోంది. రాష్ట్ర ప్రభుత్వం అత్యుత్సాహంగా స్కూళ్లను తెరవడంతో కరోనా వైరస్ వేగంగా విస్తరిస్తోంది. బడులు తెరిచిన మూడు రోజుల్లోనే దాదాపు 3 వందల వైరస్ కేసులు నమోదయ్యాయి. ఇంకా కొన్ని ఫలితాలు రావాల్సి ఉంది. అన్ని జిల్లాల్లోనూ స్కూళ్లకు వస్తున్న ఉపాధ్యాయులు, విద్యార్థులు వైరస్ భారీన పడుతున్నారని తెలుస్తోంది. అన్ లైన్ క్లాసుల నిర్వహణ సమయంలోనూ చాలా మంది టీచర్లు, సందేహాల నివృత్తి కోసం స్కూళ్లకు వచ్చిన విద్యార్థులకు కరోనా సోకింది. వారి ద్వారా కుటుంబ సభ్యులకు వైరస్ అంటుకుంటోంది. ఇప్పుడు స్కూళ్లు తెరవడంతో వైరస్ వేగంగా విస్తరిస్తున్నట్లు కనిపిస్తోంది. దీంతో ఏపీ ప్రజల్లోఆందోళన వ్యక్తమవుతోంది. విద్యార్థులు, టీచర్ల ప్రాణాలతో జగన్ ప్రభుత్వం ఆటలాడుతుందనే ఆరోపణలు వస్తున్నాయి.    ఏపీలో బడి తలుపులు తెరిచి మూడు రోజులైంది. ప్రభుత్వ ఆదేశాల మేరకు స్కూళ్లలో కరోనా నిర్ధారణ పరీక్షలు నిర్వహిస్తుండగా.. బుధవారం నాటికి రాష్ట్రవ్యాప్తంగా 239 మంది ఉపాధ్యాయులు, 44 మంది విద్యార్థులకు వైరస్‌ సోకినట్టు గుర్తించారు. మరిన్ని పరీక్షల ఫలితాలు అందాల్సి ఉంది. గుంటూరు జిల్లాలో ఏకంగా 25 మంది ఉపాధ్యాయులకు కరోనా సోకినట్టు గుర్తించారు. వారిలో వైరస్‌ లక్షణాలు పెద్దగా లేకపోయినప్పటికీ స్ర్కీనింగ్‌ పరీక్షల్లో పాజిటివ్‌గా తేలింది.పశ్చిమ గోదావరి జిల్లాలో గడిచిన 10 రోజుల్లో 172 మంది ఉపాధ్యాయులకు, 262మంది విద్యార్థులకు కరోనా సోకింది. వీరంతా తొమ్మిది,  పదో తరగతి విద్యార్థులే. ఆన్‌లైన్ పాఠాల్లో సందేహాల నివృత్తి కోసం స్కూళ్ళకు వెళ్ళిన సమయంలో విద్యార్థులు కరోనా బారిన పడ్డారు.    ప్రకాశం జిల్లాలోని స్కూళ్లల్లో కరోనా కలకలం కొనసాగుతోంది. తాజాగా ఏడుగురు విద్యార్థులు, ముగ్గురు ఉపాధ్యాయులతో పాటు, ఓ హెచ్ఎంకు కరోనా పాజిటివ్‌గా నిర్ధారణ అయ్యింది.  విశాఖ జిల్లా విద్యా శాఖలో కరోనా కలకలం రేపుతోంది. జిల్లా వ్యాప్తంగా ఇప్పటి వరకు 52 మందికి కరోనా పాజిటివ్‌గా నిర్ధారణ అయ్యింది. వారిలో 46 మంది ఉపాధ్యాయులు, నలుగురు సిబ్బంది, ఇద్దరు విద్యార్థులు కరోనా బారిన పడ్డారు. జిల్లా వైద్య ఆరోగ్య శాఖ సిబ్బంది 500 మంది ఉపాధ్యాయులకు ఇటీవల కరోనా స్ర్కీనింగ్‌ పరీక్షలు నిర్వహించగా 5 శాతం మంది కొవిడ్‌ బారిన పడినట్లు వెల్లడైంది.   కర్నూలు జిల్లాలో పాఠశాలలు తెరుచుకున్న మూడు రోజులకే ముగ్గురు విద్యార్థులు, ఒక ఉపాధ్యాయురాలికి వైరస్‌ సోకినట్టు అధికారులు గుర్తించారు. అక్టోబరు నుంచి ఇప్పటివరకు జిల్లాలో 38 మంది టీచర్లు, 125 మంది విద్యార్థులకు కరోనా సోకింది. చిత్తూరు జిల్లాలో  ఇప్పటికే ఏకంగా 187 మంది ఉపాధ్యాయులకు, 13 మంది విద్యార్థులకు వైరస్‌ సోకినట్లు తేలింది.                      ప్రపంచ వ్యాప్తంగా కరోనా మహమ్మారి తగ్గినట్లే తగ్గి మళ్లీ విజృంభిస్తోంది. చాలా దేశాల్లో  వైరస్ కేసులు పెరిగిపోతున్నాయి. అమెరికాలో రోజూ లక్ష కొత్త కేసులు వస్తున్నాయి. యూరప్ లోనూ సేకండ్ వేవ్ భయంకరంగా విస్తరిస్తోంది. లండన్, పారిస్ సహా పలు ప్రాంతాల్లో మళ్లీ లాక్ డౌన్ విధించారు. వచ్చే మూడు నెలలు అత్యంత కీలకమని వరల్డ్ హెల్త్ ఆర్గనైజేషన్ ప్రకటించింది. మనదేశంలోనూ కరోనా కేసులు మళ్లీ క్రమంగా పెరుగుతున్నాయి. ఢిల్లీలో సేకండ్ వేవ్ ప్రభావం తీవ్రంగా ఉంది. ధర్డ్ వేవ్ కు సిద్ధంగా ఉండాలని ప్రజలను అలర్ట్ చేశారు సీఎం కేజ్రీవాల్. వింటర్ సీజన్ లో వైరస్ వ్యాప్తి పెరిగే అవకాశముందని, మూడు నెలల వరకు జాగ్రత్తగా ఉండాలని ఐసీఎంఆర్ సహా దేశంలోని ఆరోగ్య సంస్థలు హెచ్చరిస్తున్నాయి.    కరోనా సేకండ్ వేవ్ పై ప్రపంచ వ్యాప్తంగా ఆందోళన కొనసాగుతుండగా.. మన దేశంలోని ఢిల్లీ, కేరళలో ఇప్పటికే కనిపిస్తుండగా ఏపీ సర్కార్ మాత్రం మెండిగా వ్యవహరిస్తోంది. తాము అనుకున్నది జరగాలన్నట్లుగా స్కూళ్లను నడిపిస్తోంది. దీంతో ఏపీలో తగ్గిందనుకున్న కరోనా మహమ్మారి మళ్లీ విజృంభిస్తోంది. ఏపీలో గతంలో రోజుకు 10 వేలకు పైగా కేసులు రాగా.. ప్రస్తుతం మూడు వేలకు లోపుగానే వస్తున్నాయి. ఈ సమయంలో జాగ్రత్తగా నిర్ణయాలు తీసుకోవాల్సిన జగన్ సర్కార్.. పట్టుదలకు పోతూ ప్రజల ప్రాణాలకు గండం తెస్తుందనే ఆరోపణలు అన్ని వర్గాల నుంచి వినిపిస్తున్నాయి. స్కూళ్లను కొనసాగిస్తే ఏపీలో కరోనా కేసులు భారీగా పెరిగే అవకాశాలున్నాయనే ఆందోళనలు వ్యక్తమవుతున్నాయి.    స్కూళ్లు తెరిచినా మూడు రోజుల్లోనే టీచర్లు, విద్యార్థుల్లో దాదాపు 3 వందల మందికి కరోనా పాజిటివ్ రావడం భవిష్యత్ అనర్ధాలకు సంకేతమిస్తోంది. దీంతో తమ పిల్లలను స్కూళ్లకు పంపడానికి పేరెంట్స్ ఇష్టపడటం లేదు. దీంతో మొదటి రోజు దాదాపు 20 శాతం మంది విద్యార్థులు స్కూళ్లకు రాగా.. మూడో రోజుకి అది ఐదు శాతానికి పడిపోయిందంటున్నారు. ఇక విద్యాశాఖలోనూ కరోనా కలవరం రేపుతోంది. కేసులు పెరిగితే స్కూళ్ళకు సెలవులు ప్రకటించాలని జిల్లాల డీఈవోలు భావిస్తున్నారని తెలుస్తోంది. రాబోయే రోజుల్లో స్కూళ్లు నడిపించినా పిల్లలు రారని, ప్రభుత్వమే ఆలోచించి స్కూళ్లను నిలిపివేయాలనే డిమాండ్లు జనాల నుంచి వస్తున్నాయి.
మూడు మర్డర్లు.. ఆరు అత్యాచారాలు.. పన్నెండు కిడ్నాపులు.. 24 దోపిడీలు. ఇదీ ఆంధ్రప్రదేశ్ లో ప్రస్తుత పరిస్థితి. కొన్ని నెలలుగా ఏపీలో క్రైమ్ రేట్ భారీగా పెరిగిపోయింది. మహిళల పరిస్థితి మరీ దారుణంగా తయారైంది. కామంతో  కొందరు, ప్రేమ పేరుతో మరికొందరు మహిళలపై దాడులు చేస్తున్నారు. కిరాతకంగా చంపేస్తున్నారు. పసి పిల్లలను కూడా వదలడం లేదు కిరాతకులు. కిడ్నాపులకైతే అంతే లేకుండా పోతోంది. చోరీలు, దొమ్మీల గురించి ఇక చెప్పనవరమే లేదు. మొత్తంగా  దేశ వ్యాప్తంగా నమోదవుతున్న ఐపీసీ కేసుల్లో టాప్ లో నిలుస్తోంది ఆంధ్రప్రదేశ్. ఇదే ఇప్పుడు ఏపీ ప్రజలను భయాందోళనకు గురి చేస్తోంది. నవ్యాంధ్ర కాస్త క్రైమాంధ్రగా మారిపోయిందని వారంతా ఆందోళన వ్యక్తం చేస్తున్నారు.                 విశాఖ గాజువాకలో వరలక్ష్మి అనే విద్యార్థినిని ఇటీవలే దారుణ హత్యకు గురైంది. నగరం నడిరోడ్డుపై యువతి గొంతు ను కత్తితో కోసి దారుణానికి ఒడిగట్టాడు కిరాతకుడు. దానికి కొన్ని రోజుల ముందే విజయవాడలో ఓ ఇంజినీరింగ్ విద్యార్థినిని ఓ ఉన్మాది కత్తితో దాడి చేసి చంపేశాడు.  గత నెల9న కర్నూలు జిల్లా నంద్యాలలో వైఎస్సార్‌సీపీ  నేత సుబ్బారాయుడు దారుణ హత్యకు గురయ్యారు. ఉదయం వాకింగ్‌కు వెళ్లిన సుబ్బరాయుడిని.. కర్రలతో దాడి చేసి కొట్టి చంపారు దుండగులు.  జూన్ 29న మచిలిపట్నంలో వైయస్ఆర్ కాంగ్రెస్ పార్టీ స్థానిక నాయకుడు మోకా భాస్కరారావు హత్య జరిగింది.మునిసిపల్ చేపల మార్కెట్లో  ఇద్దరు గుర్తు తెలియని దుండగులు అతన్ని పొడిచి చంపారు.ఇవీ ఇటీవల జరిగిన దారుణాలు. ఇలాంటి ఘటనలు గత ఏడాదిగా ఆంధ్రప్రదేశ్ లో జరుగుతూనే ఉన్నాయి. రోజు ఏదో ఒక చోట దారుణం జరుగుతూనే ఉంది. గతంలో కంటే మహిళలపై క్రైమే రేట్ పెరగడం మరింత ఆందోళన కల్గిస్తోంది.    2020  మొదటి ఆరు నెలల్లో ఏపీలో 18 వేల 438 ఐపీసీ కేసులు నమోదయ్యాయి. ఏపీలో నమోదవుతున్న క్రైమ్ కేసుల్లో మహిళలపై వేధింపులు మొదటి స్థానంలో ఉన్నాయి. ప్రభుత్వం ఎన్ని చర్యలు తీసుకుంటున్నామని చెబుతున్నా.. జూన్ వరకే 584 రేప్ కేసులు వచ్చాయంటే ఏపీలో పరిస్థితి ఎంత దారుణంగా ఉందో ఊహించుకోవచ్చు.  359 హత్య కేసులు రాగా, 289 అల్లర్ల కేసులు రికార్డయయ్యాయి. 325 కిడ్నాప్ మరియు అపహరణ కేసులు, 584 అత్యాచార కేసులు నమోదయ్యాయి.  డబ్బుల కోసం 14 హత్యలు జరిగినట్లు పోలీసుల రికార్డుల్లో ఉంది. ఈ సంవత్సరం తొలి ఆరు నెలల్లోనే 14 దోపిడీలు, 103 దొంగతనాలు జరిగాయి. 1,483 చోరీలు, 3,935 సాధారణ దొంగతనాలు, గృహ విచ్ఛిన్నం కేసులు నమోదయ్యాయి. 8,057 హర్ట్ కేసులు, చిన్న కేసులు, 2,873 మోసం కేసులు, 394 క్రిమినల్ ఉల్లంఘన కేసులు మరియు ఎనిమిది నకిలీ కరెన్సీ నోట్లు పోలీసుల క్రైమ్ రికార్డుల్లో ఉన్నాయి.    మహిళల ఆత్మగౌరవానికి భంగం కలిగించిన ఘటనలు దేశంలోనే అత్యధికంగా ఆంధ్రప్రదేశ్‌లోనే జరుగుతున్నాయని నేషనల్ క్రైమ్ బ్యూరో ఇచ్చిన నివేదికలో ఉంది. మహిళల ఆత్మగౌరవానికి భంగం కలిగించిన ఘటనలు దేశంలోనే అత్యధికంగా ఆంధ్రప్రదేశ్‌లో జరిగాయని నివేదిక పేర్కొంది. దేశవ్యాప్తంగా ఈ తరహా ఘటనలు 6,454 చోటుచేసుకోగా అందులో 1,892 ఏపీలోనే జరిగాయని పేర్కొంది. పనిప్రదేశాల్లో, ప్రజారవాణాలో ఈ ఘటనలు ఎక్కువ జరుగుతున్నాయని నివేదికలో చెప్పింది. మానవ అక్రమ రవాణా కేసుల్లోనూ మహారాష్ట్ర తర్వాత ఏపీ రెండో స్థానంలో ఉంది. అయితే లాక్డౌన్ సమయంలో మహిళలపై నేరాలు మరియు హత్యలు ఎక్కువగా పెరిగాయి. కోవిడ్ -19 లాక్ డౌన్ అమలు చేయడానికి భారీ పోలీసు బలగాలను మోహరించడం. లాక్డౌన్ సమయంలో పోలీసు స్టేషన్లు సాధారణ ఫిర్యాదులను అంగీకరించలేదని అందుకే మహిళలపై దాడులు పెరిగిపోయాయని పోలీసులు చెబుతున్నారు.                   అంధ్రప్రదేశ్ లో దళితులపై నేరాలు గణనీయంగా పెరిగాయని నివేదికలు చెబుతున్నాయి. ఈ తరహా నేరాల రేటు జాతీయ స్థాయిలో కంటే ఏపీలోనే అత్యధికంగా ఉందని ఎన్‌సీఆర్‌బీ నివేదిక ఇచ్చింది.  ఎస్సీలపై నేరాలకు సంబంధించి 2018లో 1,836 కేసులు నమోదుకాగా 2019లో ఆ సంఖ్య 2,071కు చేరింది. 12.79శాతం మేర పెరిగినట్టు స్పష్టం చేసింది.. ఆంధ్రప్రదేశ్‌లో 84.5 లక్షల మంది ఎస్సీ జనాభా ఉండగా..లక్ష మంది జనాభాకు 24.5 నేరాలు జరిగుతున్నాయి. దేశవ్యాప్తంగా ఎస్సీలపై జరిగిన నేరాల్లో 4.5శాతం ఏపీలోనే జరుగుతున్నాయి అంటే పరిస్థితి ఎంత తీవ్రంగా ఉందో అర్థం చేసుకోవచ్చు. రాజకీయ కక్షలు నేపథ్యంలోనో.. ఇతర పార్టీల సానుభూతిపరులనే కారణంతోనో.. ప్రభుత్వ తప్పులను ప్రశ్నిస్తున్నారనే అక్కసుతోనో.. ఇలా వివిధ కారణాలతో రాష్ట్ర వ్యాప్తంగా దళితులపై దాడులు పెరుగుతున్నాయి.    దళితులపై దాడులు పెరగడమే కాదు తర్వాత వారికి న్యాయం చేయడంలోనూ నిర్లక్ష్యం కనిపిస్తోంది. న్యాయం కోసం వెళ్లిన బాధిత దళితులకు పోలీస్ స్టేషన్లలో వేధింపులు వస్తున్నాయనే ఆరోపణలు ఉన్నాయి. దళితులపై పోలీసులు దాడులు పెరిగిపోయినట్లు కనిపిస్తోంది. జూలై 22న ముసుగు ధరించలేదని, మద్యం తాగి వాహనం నడుపుతున్నాడని ప్రకాశం జిల్లా చీరాలలో  ఒక దళిత యువకుడిని పోలీసులు కొట్టారు. కొన్ని రోజులకు ఆ యువకుడు చనిపోయారు. పోలీసుల కొట్టిన దెబ్బల వల్లే యువకుడు చనిపోయాడని అతని కుటుంబ సభ్యులు ఆరోపించారు. దళిత యువకుడికి పోలీసులు శిరోముండనం  చేసిన ఘటన దేశ వ్యాప్తంగా సంచలనంగా మారింది. దళితుడైన జడ్జీ రామకృష్ణ కుటుంబ సభ్యులపై అనంతపురం జిల్లాలో ఇటీవల  దాడి జరిగింది. ఒక జడ్జీ కుటుంబ సభ్యుల పరిస్థితి ఇలా ఉంటే.. మిగితా దళితుల భద్రత ఎలా ఉంటుందో ఊహించుకోవచ్చు.దళితులపై దాడుల అంశమే కాదు.. ఆర్థిక, సైబర్‌ నేరాలు, వృద్ధులు, మహిళలపై నేరాల్లోనూ గతంతో పోలిస్తే గణనీయ వృద్ధి పెరిగింది.     తెలంగాణలో జరిగిన దిశ ఘటన తరువాత ఆంధ్రప్రదేశ్ ప్రభుత్వం కొత్త చట్టం తెచ్చింది. దిశ యాక్ట్  ప్రకారం 21 రోజుల్లోనే నిందితులను పట్టుకొని విచారించి తగిన శిక్ష వేయాలి. ఈ దిశగా ప్రభుత్వం యాక్ట్ ను తీసుకొచ్చింది. దిశ బిల్లుతో పాటు దిశ మొబైల్‌ అప్లికేషన్, దిశ పోలీస్‌ స్టేషన్లు, దిశ ఫోరెన్సిక్‌ ల్యాబ్‌లు, ప్రత్యేక పోలీస్‌ యంత్రాంగాన్ని ఏర్పాటు చేసినట్లు ప్రకటించుకుంది.  స్పందన, మహిళా మిత్ర, సైబర్‌ మిత్ర, మహిళా పోలీస్‌ వంటి కార్యక్రమాలను మహిళలు, బాలికలపై నేరాలకు చెక్‌ పెట్టేందుకు తీసుకొచ్చామని గొప్పగా చెప్పుకుంది. దీంతో క్రైమ్ రేట్ తగ్గిపోతుందని అనుకున్నారు. కానీ తగ్గకపోగా ఈ విషయంలో పెరిగిపోయింది.  ఈ సంఖ్య రోజురోజుకు పెరిగిపోతూనే ఉన్నది.  ఐదు నెలల్లో ఏడువేలకు పైగా మహిళలపై వేధింపులు, అత్యాచారాల కేసులు నమోదవుతున్నాయి అంటే రాష్ట్రంలో క్రైమ్ హిస్టరీ ఎలా ఉన్నదో అర్ధం చేసుకోవచ్చు.   ఆంధ్రప్రదేశ్‌లో క్రైమ్‌ రేట్‌ ఊహించని స్థాయిలో పెరదడం జనాల్లో ఆందోళన పెంచుతోంది. జగన్ సర్కార్ గొప్పగా చెప్పుకుంటున్న దిశా చట్టం చట్టబండలైందా అని బాధితులు ప్రశ్నిస్తున్నారు. దిశా పోలీస్ స్టేషన్లు దిక్కు లేకుండా పోయాయని మండిపడుతున్నారు. ఈ నేరాలు, ఘోరాలను భరించాల్సిందేనా అని ప్రభుత్వాన్ని , పోలీసులను నిలదీస్తున్నారు ప్రజలు.దిశ చట్టం చేశాం, దిశ పోలీస్ స్టేషన్లు ఏర్పాటు చేశాం అని ప్రకటనలు చేసి ప్రచారం చేసుకున్న పాలకులు రాష్ట్రంలో మహిళలపై పెరుగుతున్న దాడులకు ఏం సమాధానం చెబుతారని విపక్షాలు ప్రశ్నిస్తున్నాయి.  చట్టాలు చేశామని చేతులు దులుపుకుంటే ఏమిటి ప్రయోజనం అని పేర్కొన్నారు. దిశ చట్టం ఇప్పటికీ అమల్లోకి రాకపోవడానికి కారణం ఏంటో ప్రజలకు వివరించాలని స్పష్టం చేశారు. దిశ చట్టం అమలులోకి  తెచ్చామని చెబుతున్న వైసీపీ ప్రభుత్వ పెద్దలు.. వరుసగా జరుగుతున్న ఘటనలకు బాధ్యతగా  సిగ్గుతో తలదించుకోవాలని డిమాండ్ చేస్తున్నారు. మరీ ఇప్పటికైనా జగన్ సర్కార్ మెల్కోని నేరాలు, ఘోరాలను నివారించడానికి చర్యలు తీసుకోవాలని కోరుకుందాం..
సంచయత తండ్రి పేరు మరోమారు తెరపైకి   కథ పాతదే. కాకపోతే ఇప్పటి తరానికి తెలియదు. ఇప్పటి తరమంటే.. వాట్సాప్, ఫేస్‌బుక్, ట్విట్టర్ బ్యాచ్చన్న మాట. అందుకే నర్సాపురం యుశ్రారైకాపా ఎంపీ రఘురామకృష్ణంరాజు కాస్తంత కొత్తగా పాతకథ చెప్పారు. మీడియాలో రచ్చగా మారిన, ‘గజపతుల కోట రహస్యం’ తెలియని వారికి,  ఎంపీ రాజుగారు చెప్పిన ‘పాతదయిన కొత్త కథ’ ఏమిటో  తెలియనివారికి, ఆసక్తి కలిగించేదే. అదొక్కటే కాదు. హిందూ వారసత్వం, సంస్కృతి సంప్రదాయాలపై ఏ మాత్రం గౌరవాభిమానాలున్న ఎవరికయినా, సంచయత అనే ఆధునిక మహిళ, గజపతులకు వారసులు కాదనిపించక మానదు. ఇప్పుడు నర్సాపురం రాజు గారు చెప్పిన కథ కూడా అదే!     మాన్సాస్ ట్రస్ట్ పేరు విన్నారు కదా? అదేనండీ.. మొన్నటివరకూ, కేంద్ర మాజీ మంత్రి అశోక్‌గజపతిరాజు కుటుంబం ఏలుబడిలో ఉన్నదే.. ఆ ట్రస్టే ఈ ట్రస్టు! జగనన్న సర్కారు వచ్చిన తర్వాత ఆయనను తొలగించేసి.. గజపతుల వారసురాలని తెరపైకి తెచ్చి, సంచయత అనే మహిళకు ఆ మాన్సాస్ ట్రస్టు  అప్పగించింది. సరే..అది ఆమెపై అభిమానంతో ఆ పదవి ఇచ్చారా? లేక ఆ ట్రస్టు అధీనంలో ఉన్న వేలాది ఎకరాలపై ఉన్న, ప్రేమతో ఇచ్చారా అన్నది వేరే కథ.   పైగా సంచయత బీజేపీ సభ్యురాలట. మరి బీజేపీ వ్యక్తికి అంత పెద్ద ట్రస్టు ఎలా ఇచ్చారు? అంత విశాల హృదయం, ఒక్క మాన్సాస్‌కే ఎందుకు? మిగిలిన వాటికీ వర్తింపచేయవచ్చు కదా అని ప్రశ్నిస్తే, వైసీపీ-బీజేపీ మధ్య ఉన్న బాదరాయణ సంబంధాల గురించి చెప్పాల్సివస్తుంది. పైగా ఇప్పుడు ఏపీ బీజేపీలో ‘అతి పెద్ద’ పోస్టులో ఉన్న ఒకాయనే ఈ పుణ్యం కట్టుకుని, యుశ్రారైకాపా కీలకనేత దగ్గర పైరవీ చేశారన్నది తెరవెనుక కథ. సదరు బీజేపీ-యుశ్రారైకాపా నాయకులను, విశాఖ సాములోరు.. టీడీపీ-బీజేపీ కలసి కాపురం చేస్తున్న రోజుల్లోనే జతకలిపారట. అది మరో బహిరంగ రహస్యం.   ఇక ఇప్పుడు మళ్లీ గజపతుల కోటలోకి వెళదాం. నర్సాపురం రాజు గారు, ఇప్పుడు సదరు సంచయత పుట్టుపూర్వోత్తరాల విప్పిన గుట్టు, యమా ఇంట్రస్టింగుగా ఉంది. ఆనందగజపతి రాజు భార్య పేరు ఉమాగజపతిరాజు. ఆ తర్వాత ఆనంద గజపతి రాజు నుంచి విడాకులు తీసుకున్న సదరు ఉమా.. ఢిల్లీలో రమేష్ శర్మ అనే జర్నలిస్టును పెళ్లిచేసుకున్నారు. ఆ వెంటనే ఆనందగజపతి రాజుల వారు కూడా, సుధా రాజును పెళ్లిచేసుకున్నారు. అంటే చట్ట ప్రకారం ఆనందగజపతి నుంచి వేరు పడి, మారు మనువు చేసుకున్న ఉమాకు.. భర్త-కులం రెండూ మారాయన్నమాట. ఆ తర్వాతనే ఇప్పటి మాన్సాస్ ట్రస్టు చైర్మన్ సంచయత జన్మించిదట.   ఆ ప్రకారం తన స్కూలు రికార్డులలో కూడా, సంచయత తండ్రి రమేష్ శర్మ అనే రాశారట. ఇవన్నీ ఒక ఎక ఎత్తయితే, సంచయత  2013లో రాసిన ఓ ఆర్టికల్‌లో కూడా, తన నేపథ్యం ఏమిటో వివరించారట. అంటే ఇది కూడా చట్టప్రకారం.. సంచయత అనే మహిళ రమేష్ శర్మ కూతురనే నిర్ధారిస్తుందని, మెడ మీద తల ఉన్న ఎవరికయినా అర్ధమవుతుందన్నమాట. మరి పాలకులకు అర్ధం కాలేదా అని మాత్రం అడక్కండి. ఎందుకంటే.. ఇది మెడమీద తల ఉన్న వారికి సంబంధించిన ప్రశ్నలు కాబట్టి!   మరి గజపతుల కుటుంబం నుంచి వేరు పడి, రమేష్ శర్మ అనే వ్యక్తిని పెళ్లి చేసుకున్న తర్వాత పుట్టిన సంచయత.. గజపతుల కుటుంబానికి, ఎలా వారసురాలవుతారన్నది ప్రశ్న. చట్ట ప్రకారం రెండోపెళ్లి చేసుకున్న, సుధారాజు కుమార్తెలే కదా నిజమైన వారసులయ్యేది? మరి రమేష్ శర్మ కూతురుగా  రికార్డుల్లో ఉన్న సంచయత, గజపతుల కుటుంబానికి ఎలా వారసురాలవుతుంది? ఆ కుటుంబం నుంచి ట్రస్టుకు ఎలా ప్రాతినిధ్యం వహిస్తుందని, ఎంపీ రాజుగారు తీసిన లాపాయింటు రైటే కదా మరి? అయినా.. ఎంపీ రాజు గారి పిచ్చికాకపోతే... ఎవరి ట్రాప్‌లో పడవద్దని చెబితే, సంచయత వింటారనుకోవడం ఏమిటి? ఆల్రెడీ అది ముగిసిన కథే కదా? రాజు గారూ.. ఆశ మంచిదే. అత్యాశే పనికిరాదండీ.. ఆయ్! -మార్తి సుబ్రహ్మణ్యం
ఎన్నికల నిధులు ఇంకా సర్దుబాటు చేయలేదట   అటకెక్కిన మీడియా బకాయిలు   అప్పుల్లో కూరుకున్న అభ్యర్ధులు   అభ్యర్ధుల చుట్టూ తిరుగుతున్న అప్పులోళ్లు   తెలుగుదేశం.. 17 నెలల క్రితం వరకూ, జాతీయ రాజకీయాల్లో చక్రం తిప్పిన పార్టీ. కార్పొరేట్‌కు చొక్కా ఫ్యాంటూ వేస్తే దాని పేరే తెలుగుదేశం. కార్పొరేట్లు, రియల్టర్లు, పారిశ్రామికవేత్తలు, ఎన్‌ఆర్‌ఐ దాతల జాబితాకు, వదాన్యుల ప్రవాహానికీ లెక్కలేదు. పార్టీని సొంతం చేసుకునే ఆసాముల సంఖ్య లక్షల్లోనే ఉంటుంది. పార్టీకి కష్టం వస్తే దన్నుగా నిలిచే పారిశ్రామికవేత్తలు బోలెడు. ఇన్ని అర్హతలతో అలరారుతున్న తెలుగుదేశం పార్టీ,  ఇప్పుడు నయాపైసా నిధులు లేని నిరుపేద. ఇది నిజంగా నిఝం! కావాలంటే మీరే చూడండి..   భారత రాజకీయాల్లో, ట్రెండ్ సెట్టర్‌గా నిలిచిన తెలుగుదేశం పార్టీకి దేశ విదేశాల్లో లక్షల సంఖ్యలోనే అభిమానులున్నారు. వారిలో పారిశ్రామికవేత్తలతోపాటు, నిధులిచ్చి ఆదుకునే ఇన్‌ఫ్రా కంపెనీలు, వ్యక్తులు-శక్తులు బోలెడుమంది. వీరిలో కులాభిమానంతో నిధులు ఇచ్చే వ్యక్తులు, నిధులు సేకరించే శక్తుల జాబితా వేరు. అందుకే టీడీపీ ఇన్నేళ్లు రాజకీయాల్లో ధైర్యంగా నిలబడింది. దేశంలోనే కార్యకర్తలను ఆదుకునే ఏకైక పార్టీగా,  టీడీపీ మొన్నటి వరకూ అగ్రస్థానంలో నిలిచింది. అధికారం లేకపోయినా, రోజుకు కనీసం 50 మంది బాధితులకు వివిధ రూపాల్లో సాయం చేసిన ఘనత దానిది. వందలమంది రోగులకు  ఆసుపత్రులలో ఉచితంగా వైద్యఖర్చులను భరించారు. ఎన్టీఆర్ ట్రస్టు నుంచి వేలమంది లబ్థి పొందిన రోజులున్నాయి.   అధినేత చంద్రబాబు నాయుడు గురించి బయట ఎన్ని ప్రచారాలున్నప్పటికీ.. తన వద్దకు వచ్చిన వారికి లేదనకుండా సాయం చేయడంలో,  వైఎస్ కంటే ముందే ఉంటారన్నది నిజం. కానీ,  దురదృష్టవశాత్తూ ఆ విషయంలో ఏ కారణం వల్లనో, వైఎస్ పేరు ఒక్కటే ఇప్పటికీ ప్రచారంలో ఉంది. పార్టీ కార్యక్రమాలు కూడా నాణ్యత తగ్గకుండా.. అవసరాన్ని మించి ఖర్చు చేయడానికి, బాబు వెనుకంజ వేసిన సందర్భాలు లేవు.   ఎన్నికల్లో అభ్యర్ధులకు టీడీపీ ఇచ్చే ఆర్ధిక దన్ను, మరే పార్టీ ఇవ్వదు. వైఎస్ సీఎంగా ఉన్నప్పుడు జరిగిన ఎన్నికల్లో.. కాంగ్రెస్ కంటే, టీడీపీనే ఆర్ధికంగా దూసుకుపోయింది. దాన్ని చూసి కలవరపడిన వైఎస్, రెండో దశ ఎన్నికల్లో భారీగా ఖర్చు పెట్టాల్సి వచ్చింది. ఇవన్నీ.. చంద్రబాబు నాయుడు స్వయంగా ఆర్ధిక వ్యవహారాలు పర్యవేక్షించి, సొంతంగా తీసుకున్న నిర్ణయాలు. కానీ ఇప్పుడు ఆ అజమాయిషీ ఆయన చేయడం లేదని, ఈ పరిస్థితికి అదే కారణమన్నది తమ్ముళ్ల మాట. ఆర్ధిక అంశాల్లో.. జాతీయ పార్టీ అయిన కాంగ్రెస్ పార్టీనే దశాబ్దాలపాటు ఖఃగుతినిపించిన టీడీపీ,   ఇప్పుడు ఇలా కడు నిరుపేదగా మారిందట.   గత ఎన్నికల్లో పార్టీ అభ్యర్ధులకు.. వివిధ కారణాల వల్ల ఆలస్యంగా నిధులు వెళ్లినా, అవి తగినంత ఇవ్వలేదట. అటు వైసీపీ నాయకత్వం, నెల ముందుగానే అభ్యర్ధులకు నిధులు సర్దుబాటు చేసింది. ఎంపీ అభ్యర్ధులు కూడా 15 కోట్లు అసెంబ్లీ అభ్యర్ధులకు ఇచ్చారు, దానితో ఒక్కో వైసీపీ అసెంబ్లీ అభ్యర్ధి,  25 కోట్లకు తగ్గకుండా ఖర్చు చేశారన్నది ఒక అంచనా. మరోవైపు టీడీపీకి ఆర్ధికంగా దన్నుగా నిలిచే వర్గాలపై ఐటి, ఈడీలు మెరుపుదాడులు చేసి, పార్టీ ఆర్ధికమూలాలు దెబ్బతీసింది. ఆ సమయంలో నిధులు సర్దుబాటు కాక, టీడీపీ నాయకత్వం చేతులెత్తేసింది.   అయినా..  స్ధానికంగా మీరు సర్దుబాటు చేసుకుంటే, ఎన్నికల తర్వాత ఇస్తామన్న హామీతో టీడీపీ అభ్యర్ధులు,  అప్పులు చేసి ఎన్నికలు పూర్తి చేశారు. కానీ పార్టీ ఓడిపోయింది. అప్పటినుంచి ఇప్పటివరకూ, ఎన్నికల అప్పుపై హామీ ఇచ్చిన వారెవరూ స్పందించడం లేదట. అసెంబ్లీకి పోటీ చేసి అప్పులపాలయిన ఎమ్మెల్సీ డొక్కా మాణిక్యవరప్రసాద్.. ఈ బాధ పడలేక, వారిని నేరుగా నాయకత్వం వద్దకే తీసుకువెళ్లారట. అప్పులవాళ్లకు ఏదో ఒక హామీ ఇచ్చి,  తనను గండం నుంచి గట్టెక్కించమని వేడుకున్నా ఎవరూ స్పందించలేదట.   ఇటు చూస్తే.. ఎన్నికల సమయంలో వాడిన  మైకులు, షామియానాలు, కుర్చీలు, క్యాటరింగు, ట్రావెల్స్, స్థానికంగా పత్రికలకు ఇచ్చిన ప్రకటన  తాలూకు బకాయిలివ్వమని రోజూ ఇంటి చుట్టూ తిరుగుతుండటం, అభ్యర్ధులకు పరువు తక్కువ వ్యవహారంగా మారింది. పశ్చిమ గోదావరి జిల్లాలో ఎమ్మెల్యేగా ఉంటూ, హటాత్తుగా ఎంపీ అభ్యర్ధి అవతారమెత్తిన  ఓ రాజు గారు.. తన జమానాలో ఊరంతా అప్పులు చేసి, హైదరాబాద్ చెక్కేశారట. అప్పులవాళ్లు ఆయన ఇంటి చుట్టూ తిరుగుతున్నా ఫలితం శూన్యం. ఇలాంటి అభ్యర్ధులు చాలామంద ఉన్నారట. అదొక విషాదం!   ఇక గత ఎన్నికల ముందు టీడీపీ.. పత్రికలు- చానెళ్లకు ఇచ్చిన ప్రకటనల బకాయిలు కూడా ఇప్పటికీ చెల్లించలేదు. అవి కూడా కోట్ల రూపాయల పైమాటేనంటున్నారు. ఫలితాల నుంచి ఇప్పటివరకూ బకాయిల కోసం,  పార్టీ చుట్టూ తిరుగుతున్న పత్రికా ప్రతినిధులకు.. చెప్పులు అరిగిపోవడం తప్ప, ఇప్పటివరకూ స్పందించిన వారు లేరు. దీనితో ప్రధానంగా చిన్న పత్రికలు విలవిల్లాడుతున్నాయి. బకాయిలపై ఎవరూ నోరెత్తకపోవడంతో ఆ బకాయిలు ఎప్పుడిస్తారో? ఎవరిస్తారో తెలియక తలపట్టుకుంటున్న పరిస్థితి. చివరకు అసెంబ్లీ అభ్యర్ధులు కూడా బకాయిలు ఎగొట్టి, తప్పించుకు తిరుగుతుంటే యాజమాన్యాలకు జవాబు చెప్పలేక స్థానిక విలేకరులు సతమతమవుతున్నారట. ఇదీ.. నిధులు లేక నిరుపేదగా మారిన  తెలుగుదేశం పార్టీ ఆర్ధిక దుస్థితి. -మార్తి సుబ్రహ్మణ్యం
రైతన్న చేతికి బేడీలా? సిగ్గుచేటు   యాక్షన్ చేయమంటే ఓవరాక్షన్ చేస్తున్నారా?   వైసీపీ నేతల సీరియస్   జగన్‌కు విపక్షం నుంచి ఇప్పట్లో ప్రమాదం లేదు. ప్రధాన ప్రతిపక్షమైన టీడీపీ, ఇప్పుడు జూమ్‌లో జీవిస్తోంది. మిగిలిన పక్షాలు ప్రకటనలతో జీవించేస్తున్నాయి. అయినా.. జగన్ పాలనపై జనంలో వ్యతిరేకత పెరగడం ఆశ్చర్యమే కదా? మరి విపక్షాలన్నీ బలహీనంగా ఉంటే, జగన్‌కు ఇక సమస్య ఏమిటి? అన్నదే కదా సందేహం. యస్. జగన్ సర్కారు పాలిట అధికారులే విపక్షాలు. వారే ఇప్పుడు ఆయనకు ఓ పెద్ద సమస్య.   జగన్ సీఎం అయిన తర్వాత, పోలీసు ‘పవరు’ పెరిగింది. ఒకప్పుడు సోషల్ మీడియాలో పోస్టింగు పెట్టిన వారిపై, టీడీపీ సర్కారు కేసులు పెడితే, విపక్ష నేతగా ఉన్న జగన్, విజయసాయిరెడ్డి దానిని ఖండించారు. ప్రజాస్వామ్యంలో ప్రశ్నించే స్వేచ్ఛ కూడా లేదా అని వాపోయారు. వైసీపీ అధికారంలోకి వచ్చాక, సోషల్ మీడియాలో పోస్టింగులు పెడుతున్న వారిని, భయభ్రాంతులకు గురిచేస్తున్నారు. సీఐడీని పూర్తిగా దుర్వినియోగం చేస్తున్నారన్న భావన కల్పించడంలో, పోలీసులు విజయం సాధించారు.   గ్రామాల్లో విపక్షాలకు చెందిన కార్యకర్తలు, గ్రామం విడిచిపోయేలా చేస్తున్నారన్న ఆరోపణలు వెల్లువెత్తుతున్నాయి. స్థానిక అధికార పార్టీ నేతల మెహర్బానీ కోసం పోలీసుస్టేషన్లే వేదికగా, శిరోముండనాలు చేస్తున్న దుశ్చర్యలు కొనసాగుతూనే ఉన్నాయి. ఉమ్మడి రాష్ట్రంలో కాంగ్రెస్-టీడీపీ పాలించినా.. పోలీసులు, ఈ స్థాయి ఓవరాక్షన్ చేసిన దాఖలాలు లేవు. అధికార పార్టీకి 60 శాతం సానుకూలంగా పనిచేస్తే, ప్రతిపక్షాలకు 40 శాతం సానుకూలంగా ఉండేవారు. గ్రామస్థాయిలో కక్షలు, ముఠా తగాదాల నేపథ్యంలో హత్యాకాండలు మాత్రమే చూశాం.   కానీ, గత 17 నెలల నుంచి ఇవన్నీ మారిపోయాయి.. జర్నలిస్టులను కూడా కేసులు, సీఐడీ విచారణ పేరిట వేధించడం చూస్తున్నాం. టీవీ5 జర్నలిస్టు మూర్తి, తెలుగువన్ అధినేత రవిశంకర్‌ను వేధించిన సందర్భాల్లో, వారికి కోర్టులే దిక్కయ్యాయి. ఇక అమరావతి ఉద్యమాన్ని కవర్ చేస్తున్న విలేకరులపై కులం పేరుతో దూషించిన కేసులు పెట్టి, కోర్టులో అభాసుపాలయ్యారు. ఇలా చెప్పుకుంటూ పోలీసుల స్థాయి చిన్నదయిపోతుంది. అది వారి గౌరవానికే భంగకరం.   ఇప్పుడు పోలీసుల ఓవరాక్షన్.. రైతుల చేతికి బేడీలు వేసేవరకూ వెళ్లడం ద్వారా, నిరంకుశత్వం పరాకాష్టకు చేరినట్లే లెక్క. దేశానికి పట్టెడన్నం పెట్టే రైతు చేతికి, బేడీలు వేసిన చిత్రాలు చూసిన రైతన్న గుండె కాలిపోయింది. ఆత్మగౌరవరం దెబ్బతింది. రైతులలో రాజకీయ పార్టీలకు అభిమానులు ఉండవచ్చు. కానీ రైతు ఎక్కడైనా రైతే. రైతు ఆత్మగౌరవానికి మాత్రం పార్టీలుండవు.   సాటి రైతు చేతికి బేడీలు వేసిన పోలీసు చర్యతో, నిజమైన రైతు ఆత్మాభిమానం ఎందుకు దెబ్బతినకుండా ఉంటుంది? దేశద్రోహులకు జైళ్లలో బిర్యానీలు పెట్టి, తెగమేపుతున్న ఈ కాలంలో.. బ్యాంకులకు వందలు, వేల కోట్ల రూపాయలు ఎగ్గొట్టి, కాలరెగరేసిన వారికి రెడ్‌కార్పెట్ వేస్తున్న ఈ రోజుల్లో..చట్టంలో లొసుగులను ఆసరా చేసుకుని, వైట్‌కాలర్ నేరగాళ్లు, హంతకులు దర్జాగా తిరుగుతున్న ఈ రోజుల్లో.. సేద్యం చేసుకునే తోటి రైతు చేతులకు బేడీలు వేస్తే, రైతాంగం మనసు మండకుండా, నవరంధ్రాలు మూసుకుంటాయని భావించడమే వెర్రితనం.   అసలు నిందితుల చేతికి బేడీలు ఏ దశలో వేయాలి? ఏ రకమైన నేరస్తుల చేతికి మాత్రమే అవి ఉండాలి? అసలు మానవహక్కుల గురించి జ్ఞానం లేని పోలీసులు చేసిన ఓవరాక్షన్‌కు, జగన్ సర్కారు పరువుపోయిందన్నది వైసీపీ నేతల ఆందోళన. సాధారణ రైతు చేతికి బేడీలు వేసిన ఫొటోలు, సోషల్ మీడియాలో వస్తే.. సర్కారు పరువు గంగలో కలసిపోతుందని తెలియని వారి చేతిలో, పోలీసు వ్యవస్థ ఉండటం దారుణమని వైసీపీ నేతలు మొత్తుకుంటున్నారు.   పోలీసులను యాక్షన్ చేయమంటే, ఓవర్ యాక్షన్ చేస్తున్నారని.. వారివల్లనే తమ ప్రభుత్వం పరువుపోతోందని, వైసీపీ నేతలు స్పష్టం చేస్తున్నారు. పోలీసు ఓవరాక్షన్ వల్ల డీజీపీ, స్వయంగా రెండుసార్లు హైకోర్టు గడప తొక్కాల్సిన దుస్థితి కూడా, కిందిస్థాయి పోలీసులలో మార్పు తీసుకురాకపోవడమే విచిత్రం. ఇప్పుడు రైతులకు బేడీలు వేసిన పోలీసు ఓవరాక్షన్‌తో జగన్ ప్రభుత్వం, రైతుల ముందు ముద్దాయిగా నిలబడాల్సిన దుస్థితి వచ్చిందంటున్నారు. ఈ పరిణామం టీడీపీకి రాజకీయంగా కొత్త అస్త్రం ఇచ్చినట్టయిందని వాపోతున్నారు.   ‘రైతుల చేతికి సంకెళ్లు వేయమని జగన్ ఎందుకు చెబుతారు? మొన్న సర్వే రాళ్లకు, జగన్ ఫొటో వేసిన విషయం ఎవరికీ తెలియదు. అధికారులే ఓవరాక్షన్ చేశారు. అది తెలిసి మందలించడంతో ఆ ప్రయత్నం విరమించుకున్నారు. అంటే అది జగన్‌కు తెలియకుండానే జరిగిందని తేలింది కదా? తన ప్రభుత్వానికి చెడ్డపేరు రావాలని ఏ సీఎం అయినా కోరుకుంటారా? ప్రభుత్వం దగ్గర మార్కులు కొట్టేయాలన్న ఓవరాక్షన్‌తోనే ఇవన్నీ చేస్తున్నారు. ఇలాంటి వాటి వల్లనే, హైకోర్టు దృష్టిలో మేం చులకన అవుతున్నాం. ఇప్పుడు ఆ పోలీసులను సస్పెండ్ చేయవచ్చు. కానీ జరగాల్సిన నష్టం జరిగిపోయింది కదా? ఆ నష్టాన్ని పోలీసులు మళ్లీ భర్తీ చేయగలరా?’ అని ఓ వైసీపీ ఎమ్మెల్యే ప్రశ్నించారు. నిజమే కదా?.. తన ప్రభుత్వం అప్రతిష్ఠ పాలవాలని, ఏ పాలకుడు మాత్రం కోరుకుంటారు? -మార్తి సుబ్రహ్మణ్యం
తెలంగాణ రాజకీయలను షేక్ చేస్తున్న దుబ్బాక ఉప ఎన్నిక ఇప్పుడు జాతీయ స్థాయిలో ప్రాధాన్యత సంతరించుకుంది. ఉప ఎన్నిక సందర్భంగా దుబ్బాక, సిద్దిపేటలో జరిగిన, జరుగుతున్న పరిణామాలపై కేంద్రం  సీరియస్ గా ఉన్నట్లు కనిపిస్తోంది. లోకల్ పోలీసులు, రాష్ట్ర ప్రభుత్వం తీరుపై ఫిర్యాదుల మీద ఫిర్యాదులు రావడం, బీజేపీ హైకమాండ్ కూడా ఫోకస్ చేయడంతో  దుబ్బాక ఉప ఎన్నిక విషయంలో కేంద్ర ఎన్నికల సంఘం కూడా కీలక నిర్ణయాలు తీసుకుంటోంది. దుబ్బాక నియోజకవర్గానికి కేంద్ర బలగాలను పంపించింది. ఉప ఎన్నిక కోసం వచ్చిన కేంద్ర బలగాలు దుబ్బాక నియోజకవర్గ వీధుల్లో  ఇప్పుడు కవాతు చేస్తున్నాయి. ఉప ఎన్నికను పర్యవేక్షించేందుకు  ప్రత్యేక పరిశీలకుడిని కూడా నియమించింది సీఈసీ.  ఒక రాష్ట్రంలో జరుగుతున్న ఒక అసెంబ్లీ ఉప ఎన్నిక కోసం కేంద్ర బలగాలను మోహరించాల్సి వచ్చిందంటే దుబ్బాకలో పరిస్థితి ఏ రెేంజ్ లో ఉందో ఊహించవచ్చు. గతంలో తెలుగు రాష్ట్రాల్లో , తెలంగాణలో కూడా చాలా ఉప ఎన్నికలు జరిగాయి. కాని ఎప్పుడూ ఇలాంటి పరిస్థితి తలెత్తలేదు. దుబ్బాక ఉప ఎన్నిక మాత్రం పొలిటికల్ హీట్ పెంచుతోంది. అన్ని పార్టీలు ఎన్నికలను సవాల్ గా తీసుకోవడం, ఎలాగైనా గెలిచేందుకు వ్యూహాలు రచిస్తుండటంతో రోజు రోజుకు నియోజకవర్గంలో సమీకరణలు మారిపోతున్నాయి. రాష్ట్ర ప్రభుత్వంపై ప్రజల్లో వ్యతిరేకత ఉందన్న ప్రచారం అధికార పార్టీని కలవరపెడుతున్నట్లు కనిపిస్తోంది. ఉప ఎన్నికలో ఓడితే పరువు పోతుందన్న భయంతో టీఆర్ఎస్ పార్టీ దుబ్బాకలో అక్రమాలకు పాల్పడుతుందని విపక్షాలు చేస్తున్న ఆందోళనలు నియోజకవర్గంలో కాక రేపుతున్నాయి.  దుబ్బాక ఉప ఎన్నికలో ఎలాగైనా గెలిచేందుకు టీఆర్ఎస్ పార్టీ అక్రమాలకు పాల్పడుతుందని బీజేపీ మొదటి నుంచి ఆరోపిస్తోంది. తమ పార్టీ నేతలపై పోలీసులతో నిఘా పెట్టించిందని, భయబ్రాంతులకు గురి చేస్తోందని చెబుతోంది. ఈ నేపథ్యంలోనే రఘునందన్ రావు బంధువుల ఇండ్లలో పోలీసులు సోదాలు చేయడం తీవ్ర దుమారం రేపింది. మంత్రి హరీష్ రావు డైరెక్షన్ లో పోలీసులే  రఘునందన్ రావు ఇంట్లో డబ్బులు పెట్టారని బీజేపీ ఆరోపించగా.. ఆ ఇంట్లోనే డబ్బులు దొరికాయంటూ సిద్ధిపేట సీపీ వీడియో ఫూటేజీని విడుదల చేశారు. ఇక సిద్ధిపేట సోదాల ఘటనపై బీజేపీ పెద్ద ఎత్తున ఉద్యమించింది. సిద్ధిపేటకు వస్తున్న పార్టీ అధ్యక్షుడు బండి సంజయ్ ను పోలీసులు అరెస్ట్ చేయడం ఉద్రిక్తతను మరింత పెంచింది. తనపై సిద్ధిపేట పోలీసులు దాడి చేశారని ఆరోపించిన సంజయ్.. ఆయన్ను సస్పెండ్ చేయాలంటూ ఏకంగా దీక్షకే దిగారు.  బీజేపీ అభ్యర్ది రఘునందన్ రావు మామ, బంధువుల ఇంటిపై పోలీసుల సోదాలు, బంజి సంజయ్ పై పోలీసుల దురుసు ప్రవర్తనను బీజేపీ హైకమాండ్ సీరియస్ గా తీసుకుందని తెలుస్తోంది. దుబ్బాక లో జరుగుతున్న పరిణామాలపై బీజేపీ పెద్దలు ఎప్పటికప్పుడు ఆరా తీస్తున్నారని సమాచారం.  కేంద్ర మంత్రి కిషన్ రెడ్డి, బీజేపీ రాష్ట్ర అధ్యక్షుడు బండి సంజయ్, దుబ్బాక పార్టీ అభ్యర్థి రఘునందన్ రావు కు ఫోన్ చేసి కేంద్ర హోంమంత్రి అమిత్ షా వివరాలు తీసుకుంటున్నారని తెలుస్తోంది సిద్ధిపేట, దుబ్బాక ఘటనలపై ఎన్నికల సంఘానికి ఫిర్యాదు చేసిన బీజేపీ నేతలు.. రాష్ట్ర ప్రభుత్వంపై తీవ్ర ఆరోపణలు చేశారు. పోలీసులను అడ్డం పెట్టుకొని టీఆర్ఎస్ అధికార దుర్వినియోగానికి పాల్పడుతుందని చెప్పారు. స్థానిక పోలీస్ అధికారులపై తమకు నమ్మకం లేదన్నారు.  సిద్ధిపేట్ ఘటనపై సీబీఐ విచారణ జరపాలని, కేంద్ర బలగాలతో మాత్రమే దుబ్బాక ఉప ఎన్నికలు జరపాలని కోరారు. బీజేపీ నాయకులను పోలీసులు ఇబ్బందులకు గురిచేస్తోన్న విషయాన్ని ఎన్నికల ప్రధానాధికారి దృష్టికి తీసుకెళ్ళారు కమలం నేతలు.  దుబ్బాకకు  ప్రత్యేక పరిశీలకుడిని నియమించాలని బీజేపీ ఈసీకి విన్నవించింది. రాష్ట్ర ప్రభుత్వంపై వస్తున్న ఫిర్యాదుల మీద  ఫిర్యాదులు, బీజేపీ పెద్దల జోక్యంతోనే  సరోజ్‌ కుమార్‌ ఠాకూర్‌ను ప్రత్యేక పరిశీలకుడిగా కేంద్ర ఎన్నికల సంఘం నియమించినట్లు తెలుస్తోంది.  తమిళనాడు కేడర్‌కు చెందిన సరోజ్‌ కుమార్‌.. ప్రస్తుతం చెన్నై సైబర్‌క్రైం విభాగ ఎస్పీగా విధులు నిర్వహిస్తున్నారు. గత ఏడాది పశ్చిమబెంగాల్‌ ఉప ఎన్నికల పరిశీలకుడిగా పనిచేసిన సరోజ్‌కుమార్‌.. సమర్థంగా ఎన్నికలను నిర్వహించినందుకుగాను అవార్డు కూడా తీసుకున్నారు. ఉప ఎన్నికకు శాంతి భద్రతల పరిశీలకుడిగా సరోజ్‌ కుమార్‌ ఠాగూర్‌ను నియమించడాన్ని  బీజేపీ అధ్యక్షుడు, ఎంపీ  బండి సంజయ్‌ కుమార్‌ స్వాగతించారు. ఉప ఎన్నికలో గెలుపు కోసం లోకల్ పోలీసులను అడ్డు పెట్టుకుని అడ్డదారులు తొక్కుతున్న కారు పార్టీ ఆగడాలు ఇకపై సాగవన్నారు సంజయ్. ఎన్నికల నిర్వహణలో సమర్థుడిగా పేరున్న సరోజ్ కుమార్ నియామకంలో దుబ్బాకలో అధికార పార్టీ అక్రమాలకు చెక్ పడుతుందని కమలం నేతలు చెబుతున్నారు.  దుబ్బాక ఉప ఎన్నిక ప్రధాన పార్టీలకు ప్రతిష్టాత్మకంగా మారడంతో  గొడవలు జరిగే అవకాశం ఉందని పోలీసులు అంచనా వేస్తున్నారు. పోలింగ్ రోజున ఉద్రిక్తతలు తలెత్తవచ్చని భావిస్తున్నారు. అందుకే నియోజకవర్గంలో సమస్యాత్మక గ్రామాల్లో మరిన్ని బలగాలను మోహరించేందుకు ఏర్పాట్లు చేస్తున్నారట. మొత్తంగా  ఉపఎన్నిక పర్యవేక్షణకు ప్రత్యేక పరిశీలకుడిని నియమించడం,  కేంద్ర బలగాలను దించడంతో  దుబ్బాక నియోజకవర్గంలో టెన్షన్ వాతావరణం కనిపిస్తోంది. ఎప్పుడు ఏం జరుగుతుందోనన్న ఆందోళన ప్రజల్లో కనిపిస్తోంది. గతంలో ఎప్పుడు లేనంతగా హీటెక్కిస్తున్న దుబ్బాకలో ఏం జరగబోతుందన్న దానిపై రాష్ట్ర ప్రజలు ఆసక్తిగా చూస్తున్నారు.

కేసీఆర్‌-కేటీఆర్ పాచిక పారింది.. టాలీవుడ్ నుంచి భారీ ప్ర‌చారం ల‌భించింది!

  ఎట్ట‌కేల‌కు తెలంగాణ ప్రభుత్వం 50 శాతం ఆక్యుపెన్సీతో థియేటర్లను తిరిగి ఓపెన్ చేసుకోడానికి అనుమతి ఇచ్చింది. సినిమా థియేటర్లు మినహా అన్ని రంగాల్లో దేశవ్యాప్తంగా ఉన్న ఆంక్షలను కేంద్రం ఎత్తివేసింది. ఇతర పబ్లిక్ ఎంటర్టైన్మెంట్ పార్కులతో పాటు రెస్టారెంట్లు, బార్లకు ఎటువంటి పరిమితులు లేకుండా పూర్తి ఆక్యుపెన్సీతో న‌డుస్తున్నాయి. సినిమాల విషయానికి వస్తే విషయాలు భిన్నంగా ఉంటున్నాయి. 50 శాతం ఆక్యుపెన్సీతో పెట్టుబడులను తిరిగి పొందే అవ‌కాశం లేనందున‌ నిర్మాతలు ఆ రూల్‌కు పూర్తి వ్యతిరేకత‌తో ఉన్నారు. కొంతమంది నిర్మాతలు పెట్టుబడులను తిరిగి పొందడానికి అదనపు షోలు, టికెట్ల ధ‌ర‌ల పెంపుతో పాటు క‌నీసం 75 శాతం ఆక్యుపెన్సీ ప్లాన్‌ను సూచిస్తున్నారు. 2021 జనవరి 1 నుండి కేంద్రం 100 శాతం ఆక్యుపెన్సీని మంజూరు చేస్తుందనే అభిప్రాయం వ్య‌క్త‌మ‌వుతోంది. ప్రస్తుతానికైతే, ప్ర‌భుత్వ‌ పరిమితులతో తమ సినిమాలను విడుదల చేయడానికి టాలీవుడ్ నిర్మాతలు సిద్ధంగా లేరు, థియేట‌ర్లు తెరుచుకుంటాయ‌న్న‌ సంతోషంతోనూ లేరు. అదనపు షోలు వేస్తే అందుకు అనుగుణంగా ఖర్చులు కూడా పెరుగుతాయి. అందువ‌ల్ల ప్రొడ్యూస‌ర్లు, డిస్ట్రిబ్యూట‌ర్లకు ఒన‌గూడే ప్ర‌యోజ‌నం త‌క్కువే. దేశం మొత్తం ఆర్థిక సంక్షోభంతో కొట్టుమిట్టాడుతున్న ఈ త‌రుణంలో రూ. 50 టికెట్‌ను రూ. 100 చేస్తే కొన‌డానికి ఎవ‌రు సిద్ధంగా ఉంటార‌నేది పెద్ద ప్ర‌శ్న‌. టికెట్ ధరలు పెరిగితే చాలా మధ్యతరగతి కుటుంబాలు థియేటర్ల ముఖం చూడ‌వు. 50 శాతం ఆక్యుపెన్సీ ప‌రిమితి ఉన్నంత కాలం భారీ బ‌డ్జెట్ సినిమాలు థియేట‌ర్ల‌లో విడుద‌ల‌వుతాయ‌నే న‌మ్మ‌కం లేదు. వ‌చ్చే సంక్రాంతిపై టాలీవుడ్ ఆశలు పెట్టుకుంది. థియేటర్లలో 100 శాతం ఆక్యుపెన్సీకి అవ‌కాశం ఉంటేనే వరుస చిత్రాలు విడుదలవ‌డానికి ఆస్కారం క‌లుగుతుంది. హైద‌రాబాద్ గ్రేట‌ర్ మునిసిప‌ల్ కార్పొరేష‌న్ ఎన్నిక‌ల‌ను దృష్టిలో ఉంచుకొని తెలంగాణ ముఖ్య‌మంత్రి కె. చంద్ర‌శేఖ‌ర్‌రావు చిత్ర‌ప‌రిశ్ర‌మ‌పై వ‌రాల జ‌ల్లు కురిపించారు. ఈ వ‌రాల‌కు టాలీవుడ్ ప్ర‌ముఖ సెల‌బ్రిటీలు ప్ర‌భుత్వానికి ధ‌న్య‌వాదాలు చెబుతార‌నీ, ప్ర‌భుత్వాన్ని ప్ర‌శంసిస్తూ ఆకాశానికెత్తేస్తార‌నీ ఆయ‌న‌కూ, ఆయ‌న త‌న‌యుడు కేటీఆర్‌కూ బాగా తెలుసు. అస‌లు సినిమా ఇండ‌స్ట్రీపై ఈ వ‌రాల‌ను ప్ర‌క‌టించ‌డానికి వెనుక కేటీఆర్ ఉన్నార‌ని వినిపిస్తోంది. వారి ఊహ‌ల‌కు త‌గ్గ‌ట్లే చిరంజీవి, మ‌హేశ్‌బాబు మొద‌లుకొని అనేక‌మంది సెల‌బ్రిటీలు, సినిమా సంఘాలు తెలంగాణ ప్ర‌భుత్వానికీ, కేసీఆర్‌, కేటీఆర్‌ల‌కు ధ‌న్య‌వాదాలు తెలుపుతూ సోష‌ల్ మీడియాలో పోస్టులు పెట్టారు. జీహెచ్ఎంసీ ఎన్నిక‌ల ముంగిట వారికి ఇంత‌కంటే కావాల్సింది ఏముంటుంది!

మారుతి డైరెక్ష‌న్‌లో మాస్ మ‌హారాజా

  గతేడాది 'ప్రతిరోజు పండ‌గే' చిత్రంతో భారీ విజయాన్ని అందించినప్పటికీ, దర్శకుడు మారుతి తన తదుపరి చిత్రానికి ఏ స్టార్‌ను ఒప్పించలేకపోయాడు. దాదాపు ఒక సంవత్సరం పాటు, అనేక మంది స్టార్స్ చుట్టూ చ‌క్క‌ర్లు కొట్టిన‌ తరువాత, వరుసగా నాలుగు ఫ్లాప్‌లను చ‌విచూసి, మ‌ళ్లీ త‌నేమిటో చూపించాల‌ని ఎదురుచూస్తున్న‌ రవితేజతో కలిసి పనిచేయాలని అత‌ను నిర్ణయించుకున్నాడు. ఈ మూవీని యు.వి. క్రియేష‌న్స్ బ్యాన‌ర్ నిర్మించ‌నుంది. ర‌వితేజ ఇటీవ‌లే 'క్రాక్' మూవీని పూర్తిచేసి, ప్ర‌స్తుతం ర‌మేశ్‌వ‌ర్మ డైరెక్ట్ చేస్తున్న మూవీని చేస్తున్నాడు. న‌క్కిన త్రినాథ‌రావు ద‌ర్శ‌క‌త్వంలో ఓ సినిమా చేయ‌డానికి అంగీక‌రించాడు. ఆ సినిమాతో పాటు మారుతి ద‌ర్శ‌క‌త్వంలో ఏక కాలంలో న‌టించ‌డానికి ఆయ‌న ప్లాన్ చేస్తున్నాడు. అనిల్ రావిపూడి ద‌ర్శ‌క‌త్వంలో చేసిన 'రాజా ది గ్రేట్' మూవీ ర‌వితేజ చివ‌రి హిట్ ఫిల్మ్‌. దాని త‌ర్వాత వ‌రుస‌గా ట‌చ్ చేసి చూడు, నేల టిక్కెట్టు, అమ‌ర్ అక్బ‌ర్ ఆంటోని, డిస్కో రాజా చిత్రాల‌తో ఫ్లాపులు చ‌విచూశాడు. గోపీచంద్ మ‌లినేని డైరెక్ష‌న్‌లో చేసిన 'క్రాక్' సినిమాతో మ‌ళ్లీ స‌క్సెస్ ట్రాక్‌లోకి వ‌స్తాన‌ని ఆయ‌న న‌మ్ముతున్నాడు.

'దిశ ఎన్‌కౌంట‌ర్' విష‌యంలోనూ చిక్కుల్లో ఆర్జీవీ!

  నిన్న‌గాక మొన్న 'మ‌ర్డ‌ర్' మూవీ విష‌యంలో న్యాయ‌ప‌ర‌మైన‌ ఆటంకాలు ఎదుర్కొని బ‌య‌ట‌ప‌డిన వివాదాస్పద దర్శకుడు రామ్ గోపాల్ వర్మ తన రాబోయే మ‌రో చిత్రం 'దిశ‌ ఎన్‌కౌంట‌ర్' విష‌యంలోనూ చట్టపరమైన ఇబ్బందుల్లో పడ్డారు. ఇది గత సంవత్సరం జరిగిన విషాద దిశ త‌ర‌హా ఘ‌ట‌న‌ల‌ ఆధారంగా రూపొందింది. దిశ కేసులో నలుగురు నిందితుల కుటుంబీకులు దాఖ‌లు చేసిన కేసులో తెలంగాణ హైకోర్టు రామ్ గోపాల్ వర్మకు షో కాజ్ నోటీసు జారీ చేసింది. దిశపై దాడి చేసి, ఆమెను కిరాతకంగా హ‌త్య చేశార‌ని ఆరోపణలు ఎదుర్కొంటున్న న‌లుగురు నిందితుల కుటుంబ సభ్యులు రామ్ గోపాల్ వర్మ త‌మ‌ను 'దిశ ఎన్‌కౌంట‌ర్' మూవీలో చెడుగా చూపిస్తున్నార‌ని ఆ కేసులో పేర్కొన్నారు. రామ్ గోపాల్ వర్మ చిత్రం త‌న క్ల‌యింట్ల‌ను తీవ్ర మాన‌సిక ఆందోళ‌న‌ల‌కు గురిచేస్తోంద‌ని నిందితుల కుటుంబ సభ్యులకు ప్రాతినిధ్యం వహిస్తున్న న్యాయవాది అన్నారు. 'దిశ ఎన్‌కౌంటర్' మూవీని థియేటర్లలో విడుదల చేయడానికి అనుమతించరాదని న్యాయవాది వాదించారు. ఆర్జీవీ ఇప్పుడు షో-కాజ్ నోటీసుకు ప్రతిస్పందించాల్సి ఉంది.

'ఫైట‌ర్' తండ్రిగా 'పోలిస్ క‌మిష‌న‌ర్‌'?

  విజయ్ దేవరకొండ ప్రస్తుతం డైరెక్ట‌ర్‌ పూరి జగన్నాథ్‌తో కలిసి ఒక ఉత్తేజకరమైన చిత్రం పనిలో బిజీగా ఉన్నాడు. 'ఫైటర్' పేరుతో రూపొందుతోన్న‌ ఈ చిత్రానికి సంబంధించి చాలా ఆసక్తికరమైన అంశాలు ఉన్నాయి. ఈ చిత్రంలో విజయ్ బాక్సర్ పాత్రను పోషిస్తున్నాడు. అత‌ని జోడీగా బాలీవుడ్ బ్యూటీ అన‌న్యా పాండే న‌టిస్తోంది. విజయ్ తండ్రి పాత్రలో నటించడానికి సీనియర్ మలయాళ నటుడు సురేష్ గోపిని పూరి సంప్ర‌దించిన‌ట్లు తాజా రిపోర్టులు వెల్లడిస్తున్నాయి. ఈ చిత్రంలో తండ్రీకొడుకుల అనుబంధం ప్ర‌త్యేకాక‌ర్ష‌ణ‌గా నిలుస్తుంద‌ని తెలుస్తోంది. సురేష్ గోపి అయితే ఆ క్యారెక్ట‌ర్‌కు న్యాయం జ‌రుగుతుంద‌ని పూరి భావిస్తున్నాడు. 'పోలీస్ క‌మిష‌న‌ర్' లాంటి డ‌బ్బింగ్ సినిమా ద్వారా ఆయ‌న తెలుగు ప్రేక్షకులకు సుప‌రిచితుడే. మ‌ల‌యాళంలో స్టార్ యాక్ట‌ర్ అయిన ఆయ‌న శంక‌ర్ డైరెక్ష‌న్‌లో వ‌చ్చిన 'ఐ' మూవీలో విల‌న్‌గానూ న‌టించి త‌న‌లోని విల‌క్ష‌ణ‌త‌ను ప్ర‌ద‌ర్శించారు. కొంత‌కాలం విరామంతో ఆయ‌న మిగ‌తా భాష‌ల చిత్రాల్లో న‌టిస్తూ వ‌స్తున్నారు. ఒకేసారి వేర్వేరు సినిమాల్లో భాగం కావాలని ఆయ‌న ఎదురు చూస్తున్నారు. ఏదేమైనప్పటికీ, సురేష్ గోపి వ‌స్తే క‌చ్చితంగా ఈ ప్రాజెక్టుకు చాలా విలువ వ‌స్తుంద‌ని చెప్ప‌వ‌చ్చు. త్వ‌ర‌లో దీనికి సంబంధించి అధికారిక స‌మాచారం రానుంది.

గౌత‌మ్ అలా చేయ‌క‌పోతే కాజ‌ల్ పెళ్లాడేది కాద‌ట‌!

  టాలీవుడ్ చంద‌మామ కాజ‌ల్ అగ‌ర్వాల్ త‌న సుదీర్ఘ కాల బాయ్‌ఫ్రెండ్ గౌత‌మ్ కిచ్లును అక్టోబ‌ర్ 30న పెళ్లాడింది. వివాహం తరువాత, ఆమె తన భర్తతో కలిసి హనీమూన్ వెళ్ళింది . ఆ ఇద్ద‌రూ మాల్దీవుల్లో హనీమూన్‌ను ఆస్వాదించారు. గౌతమ్‌తో వివాహానికి అంగీకరించడానికి ఒక కారణం ఉందని కాజల్ తెలిపింది. అంద‌రు అమ్మాయిల మాదిరిగానే, తన కాబోయే భర్త మోకాళ్లపై నిల్చొని ఎర్ర గులాబీని ఇవ్వడం ద్వారా తన ప్రేమను వ్యక్తం చేయాలని ఆమె కోరుకుంది. ఆమె కోరుకున్న విధంగానే గౌతమ్ కిచ్లు ఆమెకు ప్ర‌పోజ్ చేశాడు. ఈ కారణంగా, గౌతమ్‌తో మ్యారేజ్‌కి కాజల్ గ్రీన్ సిగ్నల్ ఇచ్చింది. అలా చేయకపోతే అతన్ని వివాహం చేసుకోవడం కష్టమేన‌ని ఆమె సరదాగా వ్యాఖ్యానించింది. ప్రతి అమ్మాయి తాను వివాహం చేసుకోబోయే వ్యక్తి నుండి గులాబీని పొందాలని కోరుకుంటుందని కాజల్ చెప్పింది. పెళ్లిని ఖాయం చేసుకునే ముందు గౌతమ్ తన తల్లిదండ్రులతో మాట్లాడాడని కాజల్ తెలిపింది. అయితే అతను మోకాళ్లపై ఉండి గులాబీతో ప్రపోజ్ చేయాల‌ని ఆమె రూల్ పెట్టింది. వ‌ర్క్ విష‌యానికి వ‌స్తే, కొరటాల శివ దర్శకత్వంలో చిరంజీవి టైటిల్ రోల్ చేస్తున్న‌ 'ఆచార్య' చిత్రంలో కాజల్ అగర్వాల్ కనిపించనుంది. డిసెంబర్ 5 నుండి ఆమె సెట్స్‌లో ఉంటున్న‌ట్లు సమాచారం. సగానికి పైగా షూటింగ్ పూర్తయిన ఈ చిత్రం కరోనావైరస్ కార‌ణంగా విధించిన లాక్‌డౌన్‌తో వాయిదా పడింది. లాక్‌డౌన్ ముగిసి, ప్ర‌భుత్వం అనుమ‌తులు ఇచ్చాక షూటింగ్‌ను పున‌రుద్ధ‌రించారు. విష్ణు మంచు నటిస్తోన్న 'మోస‌గాళ్లు' చిత్రంలో ఆమె అత‌ని సోద‌రిగా క‌నిపించ‌నుండ‌టం విశేషం. అలాగే కమల్ హాసన్ సినిమా 'ఇండియన్ 2'లో ఆమె ఆయ‌న జోడీగా న‌టిస్తోంది. ఈ చిత్రానికి ప్రఖ్యాత దర్శకుడు శంకర్ దర్శకత్వం వహిస్తున్నారు.

ప్రపంచంలో అత్యంత భయానక రహస్య సరస్సులు

ప్రపంచం అనేక అద్భుతాల సమాహారం. అందమైన జలపాతాలు, అలరించే అడవులు, చిత్రకారుణి కుంచెను మించిన అపూర్వమైన దృశ్యాలు ఎన్నో ఎన్నెన్నో.. అయితే కొన్ని అద్భుతాల వెనుక భయంకరమైన వాస్తవాలు దాగి ఉన్నాయి. వాటి గురించి తెలుసుకున్నప్పుడు ఆశ్చర్యానికి గురిచేస్తాయి. ప్రపంచంలోని అందమైన సరస్సులే కాదు అత్యంత భయానక సరస్సులు కూడా ఉన్నాయి. వాటిలో కొన్ని ప్రాణాలను హరిస్తాయి. ముందుగా వీటి గురించి తెలుసుకోవడం వల్ల ఆయా ప్రాంతాలకు వెళ్ళినప్పుడు జాగ్రత్తలు తీసుకోవడం సాధ్యమవుతుంది. మరి ఆ భయానక రహాస్య సరస్సుల విశేషాలు ఏంటో చూద్దామా... 1. బ్లూ లేక్, రష్యా రష్యాలోని వింతైన సరస్సు ఇది. ఈ సరస్సులోకి నీరు వర్షం ద్వారా ఈ సరస్సులోని నీరు  ప్రవాహాల నుంచి,  నదుల నుంచి ఇందులోకి చేరదు. భూగర్భ నీటి బుగ్గల ద్వారా సరస్సులోకి నీళ్లు చేరుతాయి. అయితే నీటిలో హైడ్రోజన్ సల్ఫైడ్ కంటెంట్ ఎక్కువగా ఉంటుంది. ఈ కారణంగా నీటి రంగు నీలం రంగులో కనిపిస్తుంది.  సరస్సు 258 మీటర్ల లోతులో ఉంది. ఇది 75 మీటర్ల ఎత్తున ఉన్న సీటెల్ స్పెస్ కూడా ఈజీగా ఇందులో మునిగిపోతుంది. ఈ సరస్సు నీరు రాళ్ళను సైతం కోస్తూ వెళ్లడంతో సరస్సు రోజురోజుకు లోతుగా మారుతోంది. ఈ నీలం సరస్సు ప్రపంచంలోని అతిపెద్ద గుహలను తనలో నిక్షిప్తం చేసుకుందని కొంతమంది శాస్త్రవేత్తలు భావిస్తున్నారు. 2. లేక్ నాట్రాన్, టాంజానియా తూర్పు ఆఫ్రికాలో లోతైన సరస్సు ఇది.  టాంజానియా కథలలో ఈ సరస్సు ప్రస్తావన ఉంటుంది.  ప్రజల జీవితాలను ఇది ప్రభావితం చేస్తుంది. అయితే ఈ సరస్సు ఒడ్డున ఫ్లెమింగోలు, చిన్న పక్షులు, గబ్బిలాలు ప్రాణములేని స్థితిలో కనిపిస్తాయి. అత్యంత భయంకరమైన విషయం ఏమిటంటే, ప్రాణాలు కోల్పోయిన అన్ని జీవుల శరీరాలు భద్రపరచబడి కనిపిస్తాయి. నీటిలోని సోడియం కంటెంట్ కారణంగా సరస్సు పసుపు రంగును కనిపిస్తుంది. అయితే ఇందులో ఉండే అనంతమైన సూక్ష్మజీవుల కారణంగా ఈ జలాలు నారింజ రంగులో ఉంటాయి. కానీ నెమ్మదిగా నారింజ రంగు మరింత ముదురుగా మారి, నీటి రంగు ప్రకాశవంతమైన ఎరుపు రంగులోకి మారుతోంది. ఈ సరస్సులో నాట్రాన్ పుష్కలంగా ఉంది, సహజంగా సంభవించే సోడియం సమ్మేళనం సోడియం కార్బోనేట్, బైకార్బోనేట్, క్లోరైడ్ మరియు సల్ఫేట్ల మిశ్రమాన్ని కలిగి ఉంటుంది. ఈ సరస్సు చుట్టూ వాతావరణం రంగురంగుల ల్యాండ్ స్కేప్ మాదిరిగా కనిపిస్తోంది. 3. మిచిగాన్ లేక్, యుఎస్ఎ అమెరికాలో ఉన్న ఐదు గొప్ప సరస్సుల్లో మిచిగాన్ లేక్ ఒకటి. ఈ సరస్సు వందలాది మంది ప్రాణాలను తీసిన విషయం చాలా తక్కువ మందికి తెలుసు. సరస్సులో ఎలాంటి రాక్షసులు లేరు. అంతేకాదు మరణించినవారు నీటికి దూరంగా ఉన్నప్పుడే మరణించారు. అయితే ఇక్కడి అలలను ప్రమాదకరంగా పరిగణిస్తారు. ఒడ్డుకు వచ్చే అలలు, నీటి ప్రవాహాలు ఊహించని విధంగా ప్రాణాలను హరిస్తాయి. అంతేకాదు గజ ఈతగాళ్లు కూడా  మిచిగాన్ ఒడ్డున ప్రవాహాలను ఎదుర్కోలేరని, ఇవి చాలా ప్రమాదకరమైనవి అంటారు. సమ్మర్ సీజన్ లో ఇక్కడికి ఈతకు వచ్చి అనేక మంది ప్రాణాలు కోల్పోతారు.  ఆ నిర్దిష్ట సమయంలో నీటి ప్రవాహం, అలల తాకిడి ఎక్కువ కావడంతో ఎక్కువ మరణాలు సంభవిస్తాయి. శరదృతువు ఈ సరస్సు వాతావరణం పడవలు, మత్స్యకారులకు ప్రమాదకరం.  నీటి ఉపరితలంపై హఠాత్తుగా పెరుగుతున్న ప్రవాహాలు ప్రాణాంతక తరంగాలకు కారణమవుతాయి. 4. న్యోస్ కామెరూన్ సరస్సు ఈ సరస్సు అనేక పొరుగు గ్రామాలకు అనేక శతాబ్దాలుగా నిశ్శబ్దంగా నీటిని అందించింది. కానీ దాని ఉపరితలం కింద, ఒక రహస్యం ఉంది. ప్రకృతి ప్రాణాంతక శక్తిని అకస్మాత్తుగా విడుదల చేసిన తరువాత సరస్సు ప్రపంచవ్యాప్తంగా ఖ్యాతిని పొందింది. ఈ సంఘటన ఆగస్టు 21, 1986 న జరిగింది. సరస్సు నుండి అధిక శక్తితో కూడిన వాయువు మేఘం పెరిగింది. సమీపంలో నివసించే ప్రతిదీ ప్రజలు, పశువులు, పక్షులు మొదలైనవి ఏమీ ఈ విపత్తు నుంచి బయటపడలేదు! సరస్సు చుట్టూ నివసించే చిన్న కీటకాలు కూడా కుళ్ళిపోయాయి. ఈ సంఘటన సుమారు 1746 మంది మానవుల ప్రాణాలను తీసింది.  ప్రపంచం నలుమూలల శాస్త్రవేత్తలు ఈ ప్రదేశాన్ని సందర్శించారు, సరస్సులో అగ్నిపర్వత బిలం ఉన్నట్లు వారు కనుగొన్నారు. 5.కరాచాయ్ సరస్సు, రష్యా రష్యా లోని యురల్స్ లో ఉన్న ఈ సరస్సు ప్రపంచంలో అత్యంత కలుషితమైన వాటిలో ఒకటిగా పరిగణించబడుతుంది. ఈ సరస్సు ఒడ్డున కేవలం రెండు గంటలు గడపడం వల్ల మీరు రెండు గంటలు ఎక్స్‌రే మెషీన్‌లో కూర్చున్నట్లుగా అనిపిస్తుంది. అంతేకాదు అది కూడా సీసంతో కప్పబడిన కవరింగ్ లేకుండా ఉంటుంది. రేడియేషన్ పాయిజనింగ్ ద్వారా చాలా నెమ్మదిగా ప్రాణాలు కోల్పోయే ప్రమాదం ఉంటుందని ప్రత్యేకంగా చెప్పనవసరం లేదు. ఈ సరస్సు 1950 లలో జరిగిన యుద్ధం కారణంగా నాశనమైంది. ఆ తర్వాత ఈ సరస్సును ద్రవ రేడియోధార్మిక వ్యర్థాల నిల్వ కోసం ఉపయోగించారు.  

తెల్ల కాగితం- నల్ల చుక్క

‘‘ఇవాళ మీకో పరీక్ష పెట్టబోతున్నాను’’ క్లాసులోకి అడుగుపెడుతూనే చెప్పారు ప్రొఫెసర్‌. అకస్మాత్తుగా ఈ పరీక్ష ఏమిటా అని విద్యార్థులంతా తలపట్టుకుని కూర్చున్నారు. కానీ ప్రొఫెసర్‌ మాటని ఎవరు కాదనగలరు. ఎలాగొలా పరీక్షని పూర్తిచేసేందుకు అంతా సిద్ధపడ్డారు. అందరికీ తలా ఒక ప్రశ్నాపత్రాన్నీ ఇచ్చారు ప్రొఫెసర్‌. ‘‘ఈ ప్రశ్నాపత్రం వెనుకనే మీ జవాబులు రాసి ఇవ్వండి. మీకు ఒక్క అరగంటే సమయం ఉంది,’’ అంటూ పరీక్షని మొదలుపెట్టేశారు.   విద్యార్థులంతా ప్రశ్నాపత్రాలని తెరిచి చూస్తే ఏముంది. కాగితం మధ్యలో ఒక చిన్న చుక్క కనిపించింది అంతే! ప్రొఫెసర్‌గారు తమ తెలివితేటల్ని పరీక్షించేందుకే హఠాత్తుగా ఈ పరీక్షని పెట్టారన్న విషయం విద్యార్థులకి అర్థమైపోయింది. కాబట్టి అంతా ఆ చుక్కని చూసి తమకి తోచిన జవాబుని ఏదో ప్రశ్నాపత్రం వెనకాల రాయడం మొదలుపెట్టారు.   అరగంట గడిచిపోయింది, ఒకో విద్యార్థీ వచ్చి తను పూర్తిచేసి ప్రశ్నాపత్రాన్ని ప్రొఫెసర్‌గారి బల్లమీద ఉంచి వెళ్లారు. ప్రొఫెసరుగారు ఆ ప్రశ్నాపత్రాలన్నింటినీ తీసుకుని వాటిలోంచి ఒక్కో విద్యార్థీ రాసిన జవాబుని చదవడం మొదలుపెట్టారు. ప్రశ్నాపత్రంలో ఉన్న చుక్కని చూసి విద్యార్థులు రకరకాల జవాబులు రాశారు. కొంతమంది ఆ చుక్క ఆకారాన్నీ, రంగునీ వర్ణించారు. మరికొందరు కాగితంలో దాని స్థానం గురించి కొలతలు వేశారు. ఇంకొందరు మరో అడుగు ముందుకు వేసి ‘జీవితం ఓ చుక్కలాంటిది...’ అంటూ కవితలల్లారు. కొందరైతే అసలు ఏ జవాబూ లేకుండా కాగితాన్ని అలాగే వదిలివేశారు.   ప్రశ్నాపత్రాలన్నింటినీ చదివిన తరువాత ప్రొఫెసరుగారు తన అభిప్రాయాన్ని చెప్పడం మొదలుపెట్టారు- ‘‘మీకు ఓ నల్ల చుక్క ఉన్న పత్రాన్ని ఇచ్చి మీకు తోచింది రాయమని అడగ్గానే, అంతా కాగితం మధ్యలో ఉన్న నల్లని చుక్క గురించే రాశారు. ఎవ్వరూ కూడా మనం చెప్పుకునే సబ్జెక్టు గురించి కానీ, మీ లక్ష్యాల గురించి కానీ, జీవితం మీద మీకు ఉన్న అభిప్రాయాల గురించి కానీ... ఆఖరికి మీ గురించి కానీ ఒక్క ముక్క కూడా రాయలేదు. మన జీవితం కూడా మీకిచ్చిన తెల్లకాగితం లాంటిదే! దాని మీద అనారోగ్యం, పేదరికం, అసంతృప్తి, కుటుంబ కలహాలు లాంటి చిన్న చిన్న మరకలు కనిపిస్తూ ఉంటాయి. మనమంతా విలువైన జీవితాన్ని మర్చిపోయి ఎంతసేపూ ఆ మరకల మీదే మన దృష్టిని కేంద్రీకరిస్తూ ఉంటాము. వాటి గురించే మన మనసునీ కాలాన్నీ వెచ్చిస్తూ ఉంటాము. అంతేకానీ, చేతిలో ఉన్న తెల్లటి కాగితం మీద ఎంత అందమైన జవాబుని రాయవచ్చో, ఎంత అద్భుతమైన చిత్రాలని గీయవచ్చో మర్చిపోతూ ఉంటాము. నేను మీకు ఈ పరీక్ష పెట్టింది మీకు మార్కులు ఇవ్వడానికి కాదు, మీకు జీవితం విలువ నేర్పడానికి,’’ అంటూ ముగించారు ప్రొఫెసరుగారు. ఆయన మాటలు విన్న తరువాత విద్యార్థులకి తమ జీవితాల్లో అత్యంత ఉపయోగపడే పాఠం అదే అనిపించింది. (ప్రచారంలో ఉన్న కథ ఆధారంగా)   ..Nirjara

మనకోసం మరో మూడు గ్రహాలు

భూమి ఓ అసాధారణమైన గ్రహం. అదృష్టమో, ప్రకృతి వరమో కానీ ఇక్కడ జీవం మనుగడ సాగించేందుకు అవసరమైన ఏర్పాట్లన్నీ ఉన్నాయి. అనువైన ఉష్ణోగ్రతలు, సూర్యుడి నుంచి తగినంత దూరం, అతినీలలోహిత కిరణాల నుంచి కాపాడే ఓజోన్ పొర, నీటి సౌలభ్యం, రాతి నేల, గురుత్వాకర్షణ శక్తి, భూమి మీదకు ఉల్కలు దూసుకురాకుండా కాపాడే గురుగ్రహం.... ఇలా చెప్పుకొంటూపోతే అద్భుతం అనదగ్గ సానుకూలతలు ఎన్నో భూమికి సొంతం. అందుకనే భూమిలాగా జీవానికి సహకరించే ప్రాంతం ఈ విశ్వంలో ఉండే అవకాశం లేదని నమ్ముతుంటారు శాస్త్రవేత్తలు. ఎక్కడో శనిగ్రహం చుట్టూ తిరిగే టైటాన్ వంటి అతికొద్ది ఉపగ్రహాల మీద మాత్రమే జీవం మనుగడ సాగించే సావకాశం ఉందని భావిస్తుంటారు. మరి ఇప్పుడో... భూమికి కేవలం 39 కాంతిసంవత్సరాల దూరంలో సౌరకుటుంబాన్ని పోలిన ఓ వ్యవస్థ ఉన్నట్లు నాసా ప్రకటించింది. ఏడాదిలో కాంతి ఎంత దూరం ప్రయాణిస్తుందో అది ఓ కాంతి సంవత్సరం అన్న విషయం తెలిసిందే! వినడానికి ఈ దూరం కాస్త ఎక్కువే అనిపించినా, ఈ అనంత విశ్వంలో ఇది ఇంచుమించు పక్కింటితో సమానం. కుంభరాశిలో భాగంగా ఉన్న ఈ వ్యవస్థలోని నక్షత్రానికి ట్రాపిస్ట్‌ 1 అని పేరు పెట్టారు. ఈ ట్రాపిస్ట్‌ 1 నక్షత్రం చుట్టూ ఏడు గ్రహాలు తిరుగుతున్నట్లు గమనించారు. ఈ గ్రహాలన్నీ కూడా సదరు నక్షత్రానికి చాలా చేరువలో ఉన్నాయట. ఒక గ్రహం మీద నిలబడి చూస్తే మిగతా ఆరు గ్రహాలన్నీ కూడా కనిపించేంత దగ్గరదగ్గరగా ఇవి ఉన్నాయి. సూర్యుడితో పోలిస్తే ఈ ట్రాపిస్ట్‌ నక్షత్రం దాదాపు పదోవంతు మాత్రమే ఉంటుంది. పైగా దీని నుంచి వచ్చే కాంతి మన సూర్యకాంతికంటే 200 రెట్లు తక్కువట. అయితే నక్షత్రానికి బాగా దగ్గరగా ఉండటం వల్ల దీని చుట్టూ తిరిగే గ్రహాల మీద ఉష్ణోగ్రతలు 0- 100 మధ్యలోనే ఉంటాయని భావిస్తున్నారు. మరీ ముఖ్యంగా 4,5,6 గ్రహాలు జీవానికి మరింత అనువుగా ఉంటాయని అంచనా వేస్తున్నారు. ట్రాపిస్ట్‌ 1 గురించి అందిన సమాచారమంతా వాటి మీద మనిషి మనుగడకి సంబంధించి కొత్త ఆశలను కల్పించేట్లుగానే ఉంది. అయితే అక్కడ వాతావరణం ఎలా ఉంది, ఆ గ్రహాల మీద నీటి లభ్యత ఎంత, వాటి మీద లభించే ఖనిజాల ఏమిటి... లాంటి పరిశోధనల ఇంకా జరగాల్సి ఉంది. అప్పుడు మాత్రమే వాటి మీద మనుషులు జీవించే అవకాశం ఉందో లేదో నిర్ధారించగలం. అసలు ఇప్పటికే వాటి మీద కొన్ని జీవులు బతికేస్తున్నాయేమో అన్న అనుమానాలు కూడా మొదలైపోయాయి. ఏది ఏమైనా ఇన్నాళ్లకి భూమిని పోలిన గ్రహాలు కొన్ని శాస్త్రవేత్తలకు కొత్త ఆశలను కల్పిస్తున్నాయి.   - నిర్జర.

గ్రేటర్ కు బీజేపీ బడా నేతలు! కారు ఖేల్ ఖతమేనా? 

కారు పార్టీకి కౌంట్ డౌన్  మొదలైనట్టేనా? గ్రేటర్ ఎన్నికతో గులాబీ బాస్ కు చెక్ పెట్టబోతున్నారా? అంటే అవుననే సమాధానమే వస్తోంది. జీహెచ్ఎంసీ ఎన్నికను అత్యంత ప్రతిష్టాత్మకంగా తీసుకుంది బీజేపీ. ఎట్టి పరిస్థితుల్లోనూ గెలవాలనే లక్ష్యంతో బడా నేతలను రంగంలోకి దింపుతోంది. తెలంగాణలో అధికారమే లక్ష్యంగా పావులు కదుపుతున్న కమలదళం..  మరో మూడేళ్లలో జరగనున్న అసెంబ్లీ సమరానికి..జీహెచ్ఎంసీ ఎన్నికను సెమీఫైనల్ గా భావిస్తోంది. గ్రేటర్ లో పాగాతో తమ లక్ష్యానికి చేరుకునేలా కార్యాచరణ రెడీ చేసుకుంటోంది. ఇందులో భాగంగానే గ్రేటర్ ప్రచారానికి పార్టీ అగ్రనేతలను  రంగంలోకి దింపుతోంది.    జీహెచ్ఎంసీ ఎన్నికను బీజేపీ హైకమాండ్ మినిట్ టు మినిట్ మానిటరింగ్ చేస్తుందంటే వాళ్లు ఎంత సీరియస్ గా ఉన్నారో అర్ధం చేసుకోవచ్చు. బిహార్‌ అసెంబ్లీ ఎన్నికల్లో ఎ‍న్డీయేను విజయతీరాలకు చేర్చిన భూపేంద్ర యాదవ్‌ ను గ్రేటర్ ఎన్నికల ఇంచార్జ్ గా నియమించింది. కొన్ని రోజులుగా హైదరాబాద్ లోనే మకాం వేసి రాష్ట్ర నేతలకు దిశానిర్ధేశం చేస్తున్నారు భూపేంద్ర యాదవ్‌. లోకల్ బాడీ ఎన్నికకు జాతీయ స్థాయిలో ట్రబుల్ షూటర్ గా పేరున్న భూపేంద్రను ఇంచార్జ్ గా పంపించిన హైకమాండ్.. అంతటితో ఆగడం లేదు. కేంద్రమంత్రులను హైదరాబాద్ ప్రచారానికి పంపిస్తోంది. రెండు రోజుల క్రితమే గ్రేటర్ లో ప్రచారం చేసి వెళ్లారు ప్రకాశ్ జవదేకర్. కేసీఆర్ సర్కార్ వైఫల్యాలపై ఆయన చార్జీషీట్ విడుదల చేశారు. కేసీఆర్ పాలనపై, టీఆర్ఎస్ పై ఓ రేంజ్ లో ఫైరయ్యారు ప్రకాశ్ జవదేకర్.    బీజేవైఎం జాతీయ అధ్యక్షుడు, బెంగళూరు ఎంపీ తేజస్వి సూర్య కూడా రెండు రోజులుగా నగరంలో పర్యటిస్తున్నారు. ఛేంజ్‌ హైదరాబాద్‌’ కార్యక్రమాలు నిర్వహిస్తూ పార్టీ కేడర్ లో జోష్ నింపుతున్నారు. ఉస్మానియా యూనివర్శిటీలో మీటింగ్ పెట్టి కేసీఆర్ ను తీవ్ర స్థాయిలో టార్గెట్ చేశారు తేజస్వి సూర్య. గ్రేటర్‌ ఎన్నికల్లో ప్రజలు తమకు ఒక్క అవకాశం ఇస్తే భాగ్యనగరం రూపురేఖలు మారుస్తామని, పాతబస్తీలో అరాచక శక్తులను తరిమికొడతామని  తేజస్వి సూర్య అన్నారు. తాను భాగ్యలక్ష్మి దేవాలయానికి వెళ్తే మత విద్వేషాలు రెచ్చగొడుతున్నారని అన్నారని, తనను రెచ్చగొడితే భాగ్యలక్ష్మి దేవాలయాన్ని అడ్డాగా చేసుకుంటానని సవాల్‌ విసిరారు. దమ్ముంటే తనను అరెస్టు చేయాలన్నారు సూర్య. కేంద్రమంత్రి స్మృతి ఇరానీ బుధవారం గ్రేటర్ లో ప్రచారం చేయబోతున్నారు. స్మృతికి తెలంగాణ ఉద్యమంతో అనుబంధం ఉండటంతో ఆమెకు ఇక్కడ చాలా మంది అభిమానులు ఉన్నారు.    కేంద్ర హోంశాఖమంత్రి అమిత్‌ షా, బీజేపీ చీఫ్ జేపీ నడ్డా, ఉత్తరప్రదేశ్‌ ముఖ్యమంత్రి యోగి ఆదిత్యానాథ్‌ పాటు మరికొంతమంది నేతలు జీహెచ్‌ఎంసీ ఎన్నికల ప్రచారంలో పాల్గొంటారని చెబుతున్నారు. గ్రేటర్ లో పాగా వేస్తే దక్షిణాదిలో పార్టీకి ఫుల్ జోష్ వస్తుందని బీజేపీ ప్లాన్ చేసిందని చెబుతున్నారు. గౌతమ్ గంభీర్, సైనా నెహ్వాల్, కుష్భు లు కూడా జీహెచ్ఎంసీ ఎన్నికల ప్రచారం లో పాల్గొననున్నారు తెలుస్తోంది. అవసరమైతే మరికొందరు కేంద్ర మంత్రులు, ముఖ్య నేతలను హైదరాబాద్ పంపించాలని బీజేపీ హైకమాండ్ భావిస్తుందట.  బీజేపీ వ్యూహాలతో అధికార టీఆర్ఎస్ ఉక్కిరిబిక్కిరి అవుతున్నట్లు కనిపిస్తోంది. అందుకే స్థానిక ఎన్నికలను పెద్దగా పట్టించుకోని సీఎం కేసీఆరే స్వయంగా జీహెచ్ఎంసీ ఎన్నికల మేనిఫెస్టోను రిలీజ్ చేశారని, గ్రేటర్ ప్రజలకు వరాలు కురిపించారని చెబుతున్నారు. వరాలు ఇవ్వడమే కాదు బీజేపీ గెలిస్తే శాంతి భద్రతల సమస్యలు వస్తాయంటూ ఓటర్లను భయాందోళన కల్గించే ప్రయత్నం చేశారు కేసీఆర్. బీజేపీ దూకుడుతో గులాబీ నేతల్లో గుబులు పెరిగిపోతుందని రాజకీయ వర్గాల్లోనూ చర్చ జరుగుతోంది.    దుబ్బాక ఉప ఎన్నిక తర్వాత బీజేపీకి జోష్ వచ్చింది. ప్రధాన ప్రతిపక్షం కాంగ్రెస్‌ను వెనక్కి నెట్టి గ్రేటర్‌ పోటీలో బీజేపీ రేసులోకి వచ్చింది. ఇప్పుడు గ్రేటర్‌ లోనూ అధికార పార్టీకి చుక్కలు చూపిస్తోంది బీజేపీ రాష్ట్ర నేతలందరినీ మోహరించి భాగ్యనగర్‌ బస్తీల్లో జోరు పెంచుతోంది.  బండి సంజయ్‌, కేంద్రమంత్రి కిషన్‌ రెడ్డి, డీకే అరుణ, రఘునందన్‌రావుతో సహా రాష్ట్ర స్థాయి నేతలంతా హైదరాబాద్‌లోనే ప్రచారం చేస్తున్నారు. పోలింగ్ సమయం దగ్గర పడుతుండటంతో ప్రచారాన్ని హోరెత్తిస్తున్నారు.

మాస్క్ తీసేసి.. శానిటైజర్ లో కాలేసిన మంత్రి కేటీఆర్

మాట తప్పే వ్యక్తిని ఏమంటారు? అంటే రాజకీయ నాయకుడు అని చెప్పుకొనే రోజుల్లో బతుకుతున్నాం. ఏదో నూటికో కోటికో ఒకరిద్దరు తప్ప దాదాపు రాజకీయ నాయకులంతా అదే కోవకి చెందిన వాళ్లనేది బహిరంగ రహస్యం. చిన్నదో పెద్దదో ఏదొక విషయంలో, ఏదొక సందర్భంలో మాట మార్చడమో, మాట తప్పడమో చేస్తూనే ఉంటారు. దీనికి తెలంగాణ మంత్రి కేటీఆర్ కూడా అతీతులు కాదు. తాజాగా ఆయన మాస్క్ గురించి ఉపన్యాసం ఇచ్చిన 24 గంటల్లోనే శానిటైజర్ లో కాలేశారు.   యాంకర్ సుమ తాజాగా మంత్రి కేటీఆర్ ని ఇంటర్వ్యూ చేసిన సంగతి తెలిసిందే. ఈ ఇంటర్వ్యూలో హైదరాబాద్ అభివృద్ధి అంశంతో పాటు పలు విషయాలను పంచుకున్నారు. అదంతా బాగానే ఉంది కానీ, ఇంటర్వ్యూ స్టార్టింగ్ లో కేటీఆర్ చెప్పిన దానికి, ఇంటర్వ్యూ ముగిసిన కొద్ది గంటలకు ఆయన చేసిన దానికి అసలు పొంతనే లేదు. కేటీఆర్ మాస్క్ లేకుండా ఇంటర్వ్యూలో పాల్గొనడంతో.. మిమ్మల్ని మాస్క్ లేకుండా చూసి ఎన్ని రోజులైంది అని సుమ ప్రశ్నించింది. దీంతో పొంగిపోయిన కేటీఆర్ మాస్క్ గురించి చిన్నపాటి ఉపన్యాసమే ఇచ్చారు. మనిషికి ముక్కు ఎంత ముఖ్యమో ప్రస్తుతం పరిస్థితుల్లో మాస్క్ కూడా అంతే ముఖ్యం అన్నట్టుగా చెప్పారు. ఆరేడు నెలల నుంచి తాను ఎక్కడికెళ్లినా మాస్క్ ధరించే వెళ్తున్నానని.. లాక్ డౌన్ సమయంలో కంటైన్మెంట్ జోన్లలో తిరిగాను, కరోనా పేషెంట్స్ ని కలిసాను.. అయినా తనకి కరోనా సోకలేదని, ఎప్పుడూ మాస్క్ ధరిస్తూ ఉండటమే దానికి కారణమని చెప్పుకొచ్చారు. అంతేకాదు, కొందరుంటారు పేరుకి మాస్క్ పెట్టుకుంటారు, మాట్లాడేటప్పుడు మాస్క్ తీసేసి మాట్లాడతారు అంటూ సెటైర్స్ కూడా వేశారు.   అబ్బబ్బా మాస్క్ గురించి మంత్రి కేటీఆర్ ఎంత గొప్పగా సెలవిచ్చారో కదా. ఆగండి ఆగండి కంగారుపడి పొగిడేసి మనం కూడా ఆయనలాగా శానిటైజర్ లో కాలేస్తే ఎలా?. మాస్క్ గురించి ఉపన్యాసం ఇచ్చిన 24  గంటల్లోనే కేటీఆర్ మాస్క్ గొప్పతనాన్ని మరిచారు. జీహెచ్ఎంసీ ఎన్నికల ప్రచారంలో బిజీగా ఉన్న ఆయన.. నిన్న ప్రచారంలో మాస్క్ ని ముక్కుకి పెట్టుకోవడమే మరిచారు. మాస్క్ లేకుండా పబ్లిక్ లోకి రానని చెప్పిన ఆయన, కొందరు మాట్లాడేటప్పుడు మాస్క్ తీసేస్తున్నారని సెటైర్స్ వేసిన ఆయన.. చెప్పిన 24 గంటల్లోనే తప్పులో కాలేశారు. ఏదో ఫార్మాలిటీకి మెడలో మాస్క్ తగిలించుకొని ప్రచారంలో పాల్గొన్నారు. ఇలా అయితే ఎలా మంత్రి గారు. అసలే మిమ్మల్ని ప్రజలు మాస్క్ కి బ్రాండ్ అంబాసిడర్ అనుకుంటున్నారు. మీరు మాస్క్ మరిచి మా మనోభావాలు హర్ట్ చేయకండి. దయచేసి వాక్సిన్ వచ్చేవరకు మాస్క్ తోనే కనిపించండి.

చైనాకు భారత్ మరో పెద్ద షాక్.. మరో 43 యాప్‌ల నిషేధం

భారత్ చైనా సరిహద్దు ఘర్షణల నేపథ్యంలో గత జూన్ లో పలు చైనా యాప్‌లను నిషేధిస్తూ చర్యలు తీసుకున్నకేంద్ర ప్రభుత్వం.. తాజాగా చైనాకు మరో ఝలక్ ఇచ్చింది. ఆ దేశానికి చెందిన 43 యాప్‌లను బ్యాన్ చేస్తూ తాజాగా ఉత్తర్వులు జారీ చేసింది. మనదేశ సార్వభౌమత్వం, సమగ్రత, రక్షణ, భద్రతకు ముప్పు వాటిల్లుతోందని పేర్కొంటూ ఈ 43 మొబైల్ అప్లికేషన్లను నిషేధిస్తూ సమాచార, సాంకేతిక శాఖ ఈరోజు మంగళవారం ఆదేశాలు జారీ చేసింది. కేంద్ర హోం మంత్రిత్వ శాఖ అనుబంధ ఇండియన్ సైబర్ క్రైమ్ కో-ఆర్డినేషన్ నుంచి వచ్చిన నివేదికల ఆధారంగా ఈ నిర్ణయం తీసుకున్నట్లు ఐటీ మంత్రిత్వ శాఖ ఒక ప్రకటనలో తెలిపింది. కొత్తగా బ్యాన్ చేసిన ఈ యాప్స్‌లో చైనా వ్యాపార దిగ్గజ సంస్థ అలీ ఎక్స్‌ప్రెస్ కూడా ఉంది. దానితో పాటు అలీబాబా వర్క్ బెంచ్, హీరోస్ ఎవాల్వ్‌డ్, డింగ్ టాక్ వంటి ఇతర అప్లికేషన్లున్నాయి.    ఇది ఇలా ఉండగా.. ఈ ఏడాది జూన్ 29న ఇన్‌ఫర్మేషన్ టెక్నాలజీ యాక్ట్ సెక్షన్ 69 ఏ కింద 59 మొబైల్ యాప్స్‌ను.. అలాగే సెప్టెంబర్ 2న మరో 118 యాప్‌లను ప్రభుత్వం నిషేధించిన సంగతి తెలిసిందే. వీటిలో ఎక్కువగా చైనీస్ యాప్‌లే. కాగా టిక్‌టాక్, యూసీ బ్రౌజర్, వీ చాట్, లూడో వంటి యాప్‌లు భారతదేశ సమగ్రత, సార్వభౌమత్వానికి భంగం వాటిల్లేలా చేస్తున్నాయంటూ గతంలో ఎన్నో ఆరోపణలు వచ్చాయి.

వ్యాయామం మీద అతి పెద్ద పరిశోధన

ఆరోగ్యానికి నడక ఎంత అవసరమో కొత్తగా చెప్పేదేమీ లేదు. జాగింగ్‌ చేయడం, సైకిల్‌ తొక్కడం, ఈత కొట్టడం... ఇవన్నీ కూడా మంచి ఫలితాలని ఇచ్చే వ్యాయామాలే అయినప్పటికీ... సులువుగా సహజంగా చేసే నడకే మన ఆరోగ్యాలను కాపాడుతూ వస్తోంది. కానీ ఈ నడక ఎంతసేపు ఉండాలి, ఎలా ఉండాలి అన్నదాని మీద ఇప్పటివరకూ ఎవరూ సరైన జవాబు చెప్పలేకపోతున్నారు. రోజుకి 10,000 అడుగులు నడిస్తే మంచిదన్న మాట ఉన్నప్పటికీ... అదేమీ అంత శాస్త్రీయం కాదని కొట్టి పారేస్తున్నారు నిపుణులు. ఈ 10,000 అడుగులు అన్నమాట జపాన్‌లోకి ఒక వాణిజ్య సంస్థ మొదలుపెట్టిన ప్రచారం అని గుర్తుచేస్తున్నారు. మరికొందరేమో వారానికి ఓ రెండు రోజుల పాటు వ్యాయామం చేస్తే సరిపోతుందిలే... మిగతా రోజుల్లో ఆఫీసుకి పోవాలి కదా! అంటున్నారు. మరి నడకకు సంబంధించి లోగుట్టును రట్టు చేసేదెలా!     అమెరికాలోని స్టాన్‌ఫోర్డ్‌కు చెందిన ‘అలెన్‌ యూంగ్‌’ అనే కార్డియాలజిస్టుకి ఇదే అనుమానం వచ్చింది. వేలమంది జనాల రోజువారీ కదలికలను క్షుణ్నంగా పరిశీలిస్తే కనుక.... వారి జీవిత విధానం, అందులో భాగంగా వారు ఎంతసేపు నడుస్తున్నారు, ఎలాంటి వ్యాయామం చేస్తున్నారు తెలిసిపోతుంది. వ్యాయామం చేయడం వల్ల వాళ్ల ఆరోగ్యం ఏమన్నా మెరుగుపడిందా! అన్న విషయమూ బయటపడుతుంది. కానీ ఇందుకోసం వేలమంది జీవితాలను దగ్గరగా పరిశీలించడం ఎలా సాధ్యం?     తన పరిశోధనను ఎలా ముందుకు తీసుకుపోవాలా అని బుర్ర బద్దలుకొట్టుకుంటున్న అలెన్‌కు హఠాత్తుగా ఓ ఉపాయం తోచింది. అప్పటికే యాపిల్‌ సంస్థ విడుదల చేసిన ఒక యాప్‌ గుర్తుకువచ్చింది. మన శరీర కదలికలు ఎలా ఉన్నాయి? మనం ఎంత దూరం నడుస్తున్నాం? అని పసిగట్టగలిగే ఈ యాప్‌ను డౌన్‌లోడ్‌ చేసుకోమంటూ ఒక పిలుపుని ఇచ్చారు. అలెన్‌. అలెన్ పిలుపునిచ్చిన తొలివారంలోనే దాదాపు 53,000 మంది ఈ యాప్‌ను డౌన్‌లోడ్‌ చేసుకున్నారు. ప్రస్తుతానికి లక్షమంది ఈ యాప్‌ ద్వారా అలెన్‌కు తమ కదలికలకు సంబంధించిన సమాచారాన్ని అలెన్‌కు అందిస్తున్నారు. అందుకే వ్యాయామానికి సంబంధించి అతి పెద్ద పరిశోధనగా ఇది పేరుగాంచింది.     అలెన్‌ మొదలుపెట్టిన ఈ పరిశోధన ద్వారా పూర్తిస్థాయి ఫలితాలు అందేందుకు కొంత కాలం పట్టక తప్పదు. లక్షమందికి సంబంధించిన గణాంకాలను విశ్లేషించాలంటే అంత తేలికైన విషయం కాదు కదా! కానీ ఈపాటికే ఈ గణాంకాలు కాస్త భయపెట్టేవిగా ఉంటున్నాయట. మనలో చాలామంది అసలు కదలనే కదలడం లేదంటూ ఈ యాప్ ద్వారా తేలుతోందట. ‘అందులో ఆశ్చర్యం ఏముంది? మన సమయాన్ని పూర్తిగా కూర్చునే గడిపేస్తున్నాం. అటూఇటూ వెళ్లడం మాట అటుంచి, కనీసం లేచి నిలబడేందుకు కూడా ప్రయత్నించడం లేదు’ అంటున్నారు అలెన్. మరి ఈ పరిశోధన ముగిసేసరికి ఇలాంటి భయంకరమైన వాస్తవాలు ఎన్ని బయటపడతాయో! మరైతే ఎంతసేపు నడవాలి? ఎలా నడవాలి? అన్న విషయమై అలెన్‌ తన పరిశోధనని పూర్తి చేసేదాకా మనం ఆగాలా! అమెరికాలోనే సుదీర్ఘ కాలం నడక గురించి అధ్యయనం చేస్తున్న ‘ట్యూడర్‌ లాక్‌’ అనే నిపుణుడి ప్రకారం మనషి రోజుకి కనీసం 8,000 అడుగులన్నా నడిస్తే మంచిది. సాధారణంగా మనిషి ఓ 5,000 అడుగుల వరకు తనకు తెలియకుండానే నడుస్తుంటాడనీ, దానికి మరో 3,000 అడుగులు జోడించేందుకు, ఓ అరగంటపాటు ప్రత్యేకంగా నడకసాగించమని చెబుతున్నారు ట్యూడర్‌. మరి అలెన్‌ పరిశోధన, ట్యూడర్‌ మాటను ఎంతవరకు రుజువు చేస్తుందో చూడాలి. - నిర్జర.

గొంతు నొప్పికి చక్కటి పరిష్కారం..!

చలికాలం వచ్చిందే చాలు అనేక అనారోగ్యసమస్యలు ముసురుకుంటాయి. కరోనా మహ్మమారి వ్యాప్తి కారణంగా ఏ మాత్రం జబులు, గొంతునొప్పి వంటి లక్షణాలు కనిపించినా భయంతో హస్పిటల్స్ కు పరిగెత్తుతున్నారు. అయితే అన్ని సమస్యలను కరోనా దృష్టిలో చూడటం మంచిది కాదు. ముఖ్యం గొంతు నొప్పి రావడానికి చాలా కారణాలు ఉన్నాయి. జీర్ణక్రియ అస్తవ్యస్తం కావడంతో కొందరిలో గొంతు ఒరుసుకుపోతుంది. గొంతు వద్ద ఏదో నొక్కుతున్న భావన కలగడం, తెమడ జిగటగా ఉండి బయటికి రావడం కష్టం కావడం, కొండనాలుకలో వాపు కనిపిస్తాయి. ఈ స్థితిలో సల్ఫర్‌, సేఫియా, ఆర్సెనిక్‌ ఆల్బ్‌ం  వంటి మందులు బాగా పనిచేస్తాయి. బ్రయోనియా, పల్సటిల్లా,  మందులు కూడా ఉపయోగించవచ్చు. కొందరిలో జీర్ణాశయ సమస్యల వల్ల గొంతు, గవద బిళ్లలు ఎర్రబారడం, గొంతు ఒరిపిడికి గురికావడంతో పాటు  గొంతు పొడిబారినా దప్పిక అనిపించకపోవడం వంటి లక్షణాలు కనిపిస్తాయి. కొందరిలో సాయంత్రం వేళ ఈ లక్షణాలు మరింత తీవ్రమవుతాయి. చలివేయడంతో పాటు గొంతులో జిగటగా అంటుకుపోతున్న భావన కలుగుతుంది. ఇలాంటి వారికి పల్సటిల్లా మందు బాగా పనిచేస్తుంది. గొంతు నొప్పి రాగానే భయపడకుండా గోరువెచ్చని నీటిలో ఉప్పు వేసుకుని గార్లింగ్ చేసినా మంచి ఫలితం ఉంటుంది.

ఆరోగ్యం దుమ్ముకొట్టుకుపోతోంది

మారుతున్న నాగరికత పుణ్యమా అని ఇప్పుడు గ్రామాలు కూడా పట్టణాలకు తీసిపోకుండా ఉన్నాయి. వీధుల్లో కార్లూ, నేల మీద టైల్స్, ఇంట్లో డియోడరెంట్లు ఇప్పుడు సర్వసాధారణం. ఇక ప్లాస్టిక్‌ వాడకం గురించైతే చెప్పనే అక్కర్లేదు. వీటి వాడకం వల్ల పెద్దగా నష్టం లేదనీ, ఒకవేళ ఉన్నా వాటికి కాస్త దూరంగా ఉంటే సరిపోతుందనీ అనుకుంటున్నాము. కానీ కొత్తగా జరుగుతున్న కొన్ని పరిశోధనలు మనం వాడే వస్తువుల నుంచి వెలువడే కాలుష్య రసాయనాలు, మన ఇంట్లో ఉండే దుమ్ములో సైతం పేరుకుపోతున్నాయని రుజువుచేస్తున్నాయి.   పరిశోధన గత పదహారు సంవత్సరాలుగా మన ఇళ్లలో ఉండే దుమ్ము గురించి అమెరికాలో పలు పరిశోధనలు జరిగాయి. జార్జ్‌ వాషింగ్టన్‌ విశ్వవిద్యాలయానికి చెందిన పరిశోధకులు ఈ పరిశోధనల ఫలితాలన్నింటినీ క్రోడీకరించి చూశారు. ఇంట్లో రోజూ కనిపించే దుమ్ములో దాదాపు 45 రకాల హానికారక పదార్థాలు ఉన్నట్లు ఈ పరిశీలనలో తేలింది. వీటిలో ఒక పది రకాలైతే దాదాపు అమెరికా అంతటా కనిపించాయట.      వేటి నుంచి? ఇంతకీ ఈ హానికారక రసాయనాలు వేటినుంచి వచ్చి దుమ్ములో చేరుతున్నాయనే విషయం ఆసక్తికరమైనది. ప్లాస్టిక్‌ వస్తువులు మృదువుగా ఉండేందుకు వాడే phthalates అనే పదార్థాలూ, షాంపూల వంటి ఉత్పత్తులు నిలువ ఉండేందుకు వాడే phenol అనే రసాయనాలు, నాన్‌స్టిక్ వంటి వస్తువులను తయారుచేసేందుకు వాడే ఫ్లోరినేటెడ్‌ కెమికల్స్‌... ఇలా మన చుట్టూ ఉన్న నానారకాల వస్తు సముదాయం నుంచి హానికారకాలు వెలువడి, ఇంట్లోని దుమ్ములో పేరుకుంటున్నాయని తేలింది. ఒక్క మాటలో చెప్పాలంటే... మన ఇంట్లో రసాయనాలతో తయారైన ప్రతి పదార్థమూ ఎంతో కొంత విషాన్ని, ఇంటి వాతావరణంలోకి వెదజల్లుతూనే ఉంది. ఇక బయట నుంచి వచ్చే దుమ్ము గురించి చెప్పనే అక్కర్లేదు. పరిశ్రమల దగ్గర్నుంచీ వాహనాల వరకూ ప్రతి ఒక్క యంత్రమూ ఎంతో కొంత కాలుష్యాన్ని మన ఇంట్లోకి చేరవేస్తోంది.   తీవ్రమైన హాని ఇలా దుమ్ములో కనిపించే రసాయనాలు ముఖ్యంగా సంతానోత్పత్తి మీద దుష్ప్రభావం చూపుతాయట. ఇక జీర్ణవ్యవస్థను దెబ్బతీయడం దగ్గర్నుంచీ కేన్సర్‌ను కలిగించడం వరకూ ఇవి నానారకాల రోగాలకూ మనల్ని చేరువ చేసే అవకాశం లేకపోలేదు. నేల మీద పారాడే పసిపిల్లలు, ఏది పడితే అది నోట్లో పెట్టుకునే చిన్న పిల్లలు వీటి బారిన పడే ప్రమాదం అత్యధికం.     దుమ్ము దులుపుకోవడమే! మనం రోజువారీ విచ్చలవిడిగా వాడేస్తున్న వస్తువులు, అవి వెలువరించే హానికారక పదార్థాల గురించి ఇంకా పూర్తిస్థాయి పరిశోధనలు జరగవలసి ఉంది. ఈలోపల మనం చేయగలిగిందల్లా, ఇంటిని ఎప్పటికప్పుడు శుభ్రంగా ఉంచుకునే ప్రయత్నం చేయడమే. ఇంట్లో దుమ్ము మరీ ఎక్కువగా పేరుకుంటూ ఉంటే, పాత పద్ధతులను వదిలిపెట్టి శక్తిమంతమైన వాక్యూమ్ క్లీనర్లను ఉపయోగించమని సూచిస్తున్నారు. నేలని ఎప్పటికప్పుడు తడిగుడ్డతో శుభ్రం చేస్తూ ఉండాలనీ, చేతులను తరచూ కడుక్కుంటూ ఉండాలని సలహా ఇస్తున్నారు. దుమ్మే కదా అని అశ్రద్ధ చేస్తే మన ఆరోగ్యం కూడా దుమ్ముకొట్టుకుపోయే ప్రమాదం ఉందని హెచ్చరిస్తున్నారు.   - నిర్జర.
Disclaimer:
All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.