బీజేపీ ఆకర్ష్ మొదలెట్టింది...ముందుగా వైసీపీ ఎంపీ ?

 

తెలుగు రాష్ట్రాల మీద మోడీ-షాల ద్వయం ఫోకస్ పెట్టిందని వార్తలు వస్తున్న నేపధ్యంలో ఏకంగా ప్రధాని మోడీతో నరసాపురం వైకాపా ఎంపీ రఘురామకృష్ణంరాజు  భేటీ కావడం ఏపీ రాజకీయాల్లో హాట్ టాఫిక్ గా మారింది. అయితే మోడీని తాను మర్యాదపూర్వకంగానే కలిశానని  రఘురామకృష్ణంరాజు చెబుతున్నా వీరిద్దరూ 20 నిమిషాల పాటు రహస్య మంతనాలు జరిపినట్లు తెలుస్తోంది. 

మోడీతో రఘురామకృష్ణంరాజు భేటీ వెనుక ఉన్న కారణం ఏమిటన్నది అంతుచిక్కడం లేదు. ఈ ఎంపీ నేపధ్యం చూస్తే అనేక అనుమానాలు కలుగుతున్నాయి, ఎందుకంటే ఒకప్పుడు తన వియ్యంకుడు వైఎస్ ఆత్మ కేవీపీ రామచంద్రరావు మంతనాలతో వైసీపీలో చేరిన ఆయన, జగన్ పద్ధతి నచ్చలేదని చెబుతూ బయటకి వచ్చారు. అయితే 2014 ఎన్నికలలో నరసాపురం ఎంపీ సీటు ఆశించిన ఆయన బీజేపీ తీర్ధం పుచ్చుకున్నారు. 

కానీ అప్పటికే ఉభయ గోదావరి జిల్లాలతో పాటు ఏపీ మొత్తానికి ఆర్ఎస్ఎస్ - వీహెచ్పీ రాజపోషకుడు అయిన గోకరాజుగంగరాజు పోటీలో ఉండడంతో ఆయనకు సీటు దక్కలేదు. ఈ నేపధ్యంలో రాజకీయాలలో సైలెంట్ అయిన ఈయన ఆ తర్వాత ఎన్నికలు ఏడాది ఉందనంగా 2018 మేలో తెలుగు దేశం తీర్ధం పుచ్చుకున్నారు. ఎటూ ఈసారి బీజేపీకి సీటు ఇచ్చే పరిస్థితి లేకపోవడంతో తెలుగుదేశం ఆ నరసాపురం సీటు తనకు ఇస్తుందని భావించారు. 

టీడీపీ అధినేత కూడా ఆ సీటు ఈయనకే ఫైనల్ చేశారు. నామినేషన్స్ వేసి ప్రచారం చేసుకోవడమే ఆలస్యం అనుకునే సమయంలో ఈయన మళ్ళీ పార్టీ ఫిరాయించి వైసీపీలో నరసాపురం సీటు తెచ్చుకున్నారు. అయితే ఈ నేపధ్యంలో రాష్ట్ర వ్యాప్తంగా వీచిన ఫ్యాన్ గాలిలో ఈయన కూడా తన చిరకాల కోరిక అయిన నరసాపురం సీటు సాధించేసుకున్నారు. ఈ క్రమంలో ఆయన మోడీతో భేటీ కావడం కలకలం రేపుతోంది.  

అసలే ఏపీ లో పార్టీ ఫిరాయింపులను ప్రోత్సహించాలన్న ఉత్సాహం తో ఉన్న బీజేపీ నాయకత్వం , వైకాపాను ఏమీ వెనకేసుకు వచ్చే పరిస్థితి లేదు. ఎందుకంటే శత్రువుకి శత్రువు మిత్రుడు అనుకుంది కానీ, అసలు శత్రువు బలహీన పడ్డాక ఇంకా మిత్రుడితో పనేముంది అని బీజేపీ అనుకున్నా ఆశ్చర్యం లేదు. బీజేపీ వారు ఈయన్ని రమ్మనా వచ్చు, ఈయన వెళ్లనూ వచ్చు, ఎందుకంటే ఈయన ట్రాక్ రికార్డ్ అటువంటిది. 

నిజానికి ఏపీలో వైసీపీ గెలుపు వెనుక బీజేపీ ఈవీఎంల సాయం ఉందని అంటున్నారు విశ్లేషకులు. బీజేపీకి అసలు బలం లేదు కాబట్టి వైసీపీని బీజేపీ గెలిపించిందని అంటున్నారు. అందుకే తమకి ఆప్తులైన కొందరు నేతలను ఎన్నికల ముందు వైసీపీలోకి పంపి గెలిపించుకుని ఇప్పుడు ఎన్నికలు పూర్తయ్యాయి కాబట్టి వెనక్కి పిలిపించుకుంటున్నారని  విశ్లేషకుల విశ్లేషణలు వినవస్తున్నాయి.  

ఈ మాటలకి ఊతం ఇస్తూ ఈ పార్టీ నేత, ఎమ్మెల్సే మాధవ్ వ్యాఖ్యలు చేశారు. ఏపీలో బీజేపీలో చేరేందుకు పెద్ద ఎత్తున నేతలు ఆసక్తి చూపుతున్నారని  వైసీపీ సహా అన్ని పార్టీల నేతలు తమతో టచ్ లో ఉన్నారని అన్నారు. అంటే వైసీపీ నుండీ మొదటి బీజేపీ ప్రయాణం రఘురామ కృష్ణంరాజుతోనే మొదలవుతుందని చెప్పొచ్చు. బహుశా జగన్ కూడా ఎదురు ఏమీ మాట్లాడలేకపోవచ్చని విశ్లేషకులంటున్నారు.



 
Disclaimer:
All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
 
You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.