పవన్ కళ్యాణ్ మీద కేసీఆర్ సెటైర్లు

'

తెలుగుదేశం, భారతీయ జనతాపార్టీ కూటమికి ఈ ఎన్నికలలో ప్రచారం చేయడానికి అంగీకరించిన పవన్ కళ్యాణ్ శుక్రవారం నుంచి తెలంగాణలో ప్రచారం చేయబోతున్నాడు. ఇదిలా వుంటే, టీఆర్ఎస్ అధినేత కేసీఆర్ మరోసారి పవన్ కళ్యాణ్ గురించి వెటకారంగా మాట్లాడాడు. ఆమధ్య పవన్ కళ్యాణ్ ‘జనసేన’ పార్టీని ప్రకటించినప్పుడు కేసీఆర్ ఓ మీటింగ్‌లో పవన్ కళ్యాణ్ గురించి ప్రస్తావిస్తూ, పవన్ కళ్యాణ్ పేరు తనకి గుర్తులేనట్టు పక్కన వున్నవాళ్లని కనుక్కుని ‘‘ఆ... పవన్ కళ్యాణ్’’ అన్నారు. ఇది కేసీఆర్ ఎదుటివాళ్ళని కించపరిచే పద్ధతుల్లో ఒకటి. అయితే కేసీఆర్ వ్యవహరించిన ఈ తీరు పవన్ కళ్యాణ్‌ని బాగా హర్ట్ చేసింది. ఆ బాధని ‘జనసేన’ పార్టీ పెట్టిన తర్వాత ఏర్పాటు చేసిన మొదటి సభలో ఆయన వ్యక్తం చేశాడు.

కేసీఆర్ తన పేరు గుర్తురానట్టు చేసిన నటనను పవన్ కళ్యాణ్ అనుకరించి చూపించాడు. ఇలాంటి ఎన్ని వెటకారాలు చేసినా భరిస్తానని చెప్పాడు. అలా చెప్పినప్పటికీ కేసీఆర్ వెటకారం పవన్‌ని ఎంత హర్ట్ చేసిందో ఆయన ముఖంలో కనిపించింది. ఇప్పుడు కేసీఆర్ మరోసారి గురువారం నాడు ఓ ఎన్నికల మీటింగ్‌లో మాట్లాడుతూ పవన్ కళ్యాణ్ మీద అదే తరహా వెటకారం ప్రదర్శించాడు. పవన్ కళ్యాణ్ గురించి ప్రస్తావించి, ‘‘ఎవరా యాక్టర్’’ అని, పవన్ కళ్యాణ్ పేరు మరచిపోయినట్టు నటించి, వెనుక వున్న గన్‌మాన్స్ ని అడిగి పేరు తెలుసుకుని ‘‘ఆ పవన్ కళ్యాణ్’’ అన్నాడు. ఇది పవన్ కళ్యాణ్‌కి ఎక్కడో కాలేలా చేసే వెటకారం. కేసీఆర్ అక్కడితో ఆగకుండా.. ‘‘ఆ పవన్ కమాల్ కళ్యాణం’’ అనే మాట విసిరారు. అది పవన్ కళ్యాణ్ వ్యక్తిగత వివాహ జీవితం మీద కేసీఆర్ అంటించిన చురక. మరి కేసీఆర్ వేసిన చురకలకి శుక్రవారం నుంచి తెలంగాణలో పర్యటించబోతున్న పవన్ కళ్యాణ్ ఎలా రియాక్ట్ అవుతాడో చూడాలి.