రేవంత్ రెడ్డిని అరెస్ట్ చేసిన ఎస్పీపై వేటు
posted on Dec 5, 2018 1:41PM
తెలంగాణ కాంగ్రెస్ వర్కింగ్ ప్రెసిడెంట్ రేవంత్రెడ్డి అరెస్ట్ వ్యవహారంపై ఎన్నికల కమిషన్ చర్యలు తీసుకుంది. ఓవైపు కోర్టు ఏకంగా డీజీపీ కోర్టుకు హాజరై వివరణ ఇవ్వాల్సిందేనని ఆదేశించింది. మరోవైపు ఈసీ రేవంత్ అరెస్ట్ను పర్యవేక్షించిన వికారాబాద్ ఎస్పీ అన్నపూర్ణపై వేటు వేసింది. అన్నపూర్ణ స్థానంలో ఐపీఎస్ అధికారి అవినాష్ మహంతిని వికారాబాద్ ఎస్పీగా నియమించారు. ఈ ఆదేశాలు వెంటనే అమల్లోకి వస్తాయని ఈసీ ప్రకటించింది. అన్నపూర్ణను పోలీస్ హెడ్క్వార్టర్స్కు అటాచ్ చేయాలని ఈసీ సూచించింది. ఆమెకు ఎటువంటి ఎన్నికల విధులు అప్పగించవద్దని కూడా ఆదేశించింది. అన్నపూర్ణ స్థానంలో వికారాబాద్ ఎస్పీగా నియమితులైన అవినాష్ మహంతి ప్రస్తుతం హైదరాబాద్ సీసీఎస్ డీసీపీగా వ్యవహరిస్తున్నారు. ఎన్నికల కమిషన్ ఆదేశాలు అందగానే.. ఆయన వికారాబాద్ జిల్లా ఎస్పీగా బాధ్యతలు చేపట్టేందుకు హుటాహుటిన బయలుదేరి వెళ్లారు. అయితే రేవంత్ అరెస్ట్ వ్యవహారంలో ఐజీ శ్రీనివాసరావు మీద కూడా చర్యలు తీసుకోవాలని కాంగ్రెస్ నేతలు ఈసీని కోరారు. కానీ ఎస్పీ బదిలీకే ఈసీ పరిమితమైంది.